雖然已經係好耐以前嘅事，但荔園嘅點點滴滴依然記得呢，細個時爹媽帶我同家姐去，印象最深刻嘅反而唔係大象or叮叮船，對我而言最深刻嘅係人生嘅第一次過山車﹗個車頭係一個龍頭，就只有高高低低嘅兩個圈，而安全設備其實只係一條橫金屬bar係腰前，刺激度以過山車嚟講應該係最低級別嗰種，但對小小嘅我嚟講已經係大大嘅新挑戰﹗當然我都記得人哋餵大象食蕉同埋叮叮船啦～今次係中環新海傍重新打造臨時荔園，我哋都要去捧下場，睇下似唔似先～
又係開放嘅最後一個weekend至有時間嚟，即使落住毛毛雨都冇辦法啦，曉，我哋唔做嬌嬌女，落雨出街都冇有怕，帶定遮就得啦～不過嘛，呢張自拍⋯好似睇唔出係去邊喎～
都係分開影啦～
曉就同爸爸影～
之前睇家姐去嘅相都知道有大象，神奇嘅係，真係時代進步得好快，呢隻機械象像真度好高呢﹗而且佢唔單單係一個裝飾，仲係遊戲設施，大家可以餵佢食香蕉呢～
為咗玩得盡興啲，我哋一入場就換咗代幣先，雖然唔知物價如何，反正我哋換咗$100十個代幣，$100餐飲咭～隨便逛逛先，除咗有啲影相位同少量嘅大型遊樂設施之外，其實大多數位置都係吸金嘅攤位遊戲～我哋花費嗰堆代幣之前逛咗展覽館先～
好在有一對情侶幫我哋手影，可以影到靚靚一家三口合照～:)
個展館資料都幾豐富，可以睇到荔園嘅歷史，甚至係比起我細個嘅印象更早期嘅荔園﹗又有啲舊相片俾大家回味回味～
出到嚟有哈哈鏡－－又一荔園經典﹗
我哋又渴渴地曉又差唔多夠鐘食奶，我哋兩個大嘅先填一填肚子先，先買咗$25嘅雜果賓治，係頹頹地㗎啦，似乎只係加咗罐頭雜果係七喜入面，不過價錢都算係咁啦，之後食咗個$45嘅漢堡飽餐，連果汁一杯，漢堡飽舊肉幾厚又即煎都幾好味～
抵讚嘅係，今次臨時荔園設有育嬰室﹗其實之前已經係平時追開嘅母乳媽媽group得知呢件事，所以去玩都去得放心啲～有兩間獨立冷氣育嬰室，size就係地盤更亭咁，入面一張枱一張櫈，乾乾淨淨舒舒服服，夠晒good啦，換片餵奶一take過，如果冇育嬰室要係戶外用巾餵都真係幾唔方便，尤其係落雨濕濕，又焗又熱的話曉都食得唔舒服～
大家都食飽飽就去玩攤位遊戲啦，收費都唔算過份嘅，大多數遊戲都係1-3個代幣不等，勁勁遊樂設施我哋就冇玩啦，for細路嗰啲曉細到咁都未玩得，for大人嘅鬼屋又唔啱我喎～我哋得奬嘅兩個項目，分別係⋯
彩虹乒乓波－－其實冇技巧可言，只係碌個波落去計分，其實我個角度根本睇唔到邊格幾多分，我哋啱啱夠8分有細獎，有綠箭襟章一個﹗
另外又玩咗碌波波、擲階磚、傘乒降落，都係無功而還～^^”竟然冇我最愛嘅擲彩虹喎～
另外我話想玩嘅係夾波子，感覺係唯一一個可以靠實力贏取獎品嘅遊戲﹗有少少練習時間，我表現唔錯丫⋯但到真正計時時，oops，發台瘟﹗結果都係夾得5-6粒～太失禮了﹗
淡定嘅day夾到剛剛12粒，又有細獎，yeah～
叮叮船我哋唔坐都影張相留念啦～:D
乜小露寶同荔園friend嘅咩？我都唔知添～
最後我哋用埋剩低嘅餐飲quota食多個薯條就走啦～
玩完都天黑咯，雖然天氣唔好行得辛苦啲，但可以同day同曉一齊去玩就好開心了～
上一次影呢個摩天輪時，曉仲係肚入面(請參閱：26-12-2014：聖誕南丫島悠閒遊)，今次佢已經四個半月大了﹗再大少少我哋坐埋上去玩啦～