陸續推出BB用品嘅用後感﹗今次講下個浴盆啦(請參閱：18-3-2015：懷孕扎記34w4d．we are ready之Karibu摺疊浴盆)～買嘅時候諗住摺埋薄薄地可以節省空間，又靚靚地就揀咗咯～用後呢⋯
個浴盆用咗差唔多四個月啦﹗買嘅時候其實冇諗過要放係邊個位嚟用，係直至曉曉出院返到屋企沖第一次涼先至考慮呢個問題(請參閱：12 ～ 20-4-2015：新手媽媽day 4 ～ 12．曉曉回家適應篇)，原來個浴盆都幾大，而我哋個浴室都幾窄，放唔到馬桶廁板上面用，因為係細嘅企缸，亦唔可以放係裡面用，餐枱面又太高啦⋯結果唯有係廳嘅地下用﹗好在可以打開浴盆係浴室地下，伸個花灑出嚟放好水先拖個盆出廳﹗因為冇諗過要係地下沖，所以第一次金姨姨幫手沖涼時冇合適嘅矮櫈仔坐住嚟沖，要搵幾本厚書疊起嚟坐，辛苦了﹗所以爸爸臨急臨忙先出去買咗張紅A矮櫈仔之後有得用﹗所以未買浴盆嘅準爸媽要諗諗屋企邊個位沖涼，放唔放得落至好買丫～沖完涼拖番個盆入浴室放水都幾難，因為個盆大，要打直入浴室道門，有水係入面時又重，仲要捧高就個去水位係馬桶上面，我都好怕終有一次會扭親條腰～好在下個禮拜搬屋，個企缸大啲，到時可以直接放係嗰度沖，順便直接去水，咁就(對我哋)安全好多了～
欣賞個盆嘅係，底部有個去水位，所以打開個塞就可以放水，唔駛下下傾側嚟倒水﹗另外個塞嘅物料會因應溫度而變色，熱會變白，凍水時就藍色，所以大約可以知道水嘅溫度～我哋由最初開始其實都冇用溫度計，只用手踭試水溫，加上有個塞嘅顏色做reference又安全啲﹗
至於佢嘅賣點－－可以摺疊嘅浴盆－－其實反而用用下冇用呢個功能囉～沖完洗乾淨個浴盆我哋會放入企缸度晾一晾乾，但你得閒再進一步處理呢啲東東時通常都係個B瞓咗覺嘅時間，摺番起個盆又要捧出嚟，收埋時又會好大聲嘅「嗒嗒嗒」聲，瞓著都嘈番醒，加上我呢啲懶鬼，覺得今日收埋咗聽日又要用，不如算數啦﹗:p所以而家都係長期開咗係度囉～亦因為可以摺疊，所以個盆嘅盆口比較闊，底部面積其實比較細，所以而家接近四個月大都開始逼逼地㗎啦～
另外買個浴盆貪佢有個浴網，同個初生B沖涼會安心好多，但結果用咗兩次左右都唔冇用了，用手臂托住都好方便﹗:D
結論係，個盆都唔係唔好用嘅，但係值唔值得花$400買個咁貴嘅浴盆又好似要考慮下囉～
講開沖涼嘅話題，我哋用緊施巴嘅嬰兒泡泡浴露，啲浴露好唔好用我都冇乜意見，味道幾香，曉曉又冇敏感，所以都ok～不過個樽真係麻麻地，唔知點解明明都仲好多係入面，每一日要泵出嚟都要按幾十下先出到，我同老公都笑說話按嘅時候係「浪費生命」囉，真係要的起心肝自己換個樽去「珍惜生命」﹗
曉曉一直都怕沖涼，由陪月姨姨到爸爸到媽媽幫佢沖都大喊特喊，好似虐待佢咁可憐>.<“，直至最近呢個星期先至放鬆啲冇喊，而家盡量趁佢「可愛曉」狀態時同佢沖涼﹗喊都係其次，最重要係佢緊張時啲摺摺都收埋晒，頸頸好難洗得乾淨，沖完涼諗住攬實錫錫面珠時聞到仲係勁臭﹗﹗希望曉曉持續進步啦～其實佢都叻咗好多啦，之前step 1抹面時已經喊，而家抹面唔鍾意都會忍住﹗媽媽好期待下個夏天同你去游水，同埋再大少少同你去浸溫泉丫，唔好怕水丫～
p.s.上面嘅相相係曉曉第一次沖奶奶浴，因為雪奶過咗期唔飲得，開頭怕沖完會成個B好羶，但原來唔會羶之餘仲好滑滑添～正﹗嗰排講起美國有正式人奶庫，有公家有私營，有價有市，呢個人奶浴認真矜貴﹗不過媽媽都係寧願你飲咗啲奶奶佢好過用嚟沖涼～
前往其他半熟手媽媽blog