19-7-2015:半熟手媽媽3m.曉曉百日宴

曉曉出世後嘅頭一兩個月,因為太辛苦,人哋話bb大得好快、時間過得好快等等,我都不甚認同,一日密密食密密喊密密抱,好不容易先大一日,但後來越來越上手,就覺得時間真係過得好快,而曉曉嘅長度同重量亦增長得好快丫﹗咁快就嚟到100日了~

螢幕快照 2015-07-22 上午11.14.59

有追開我個blog嘅讀者一定知道我有裝呢個app,由倒數結婚開始就有用啦,所以我哋先咁醒水可以慶祝結婚1000日同埋1234日(平凡之中找一些特別日期⋯啦啦啦~)(請參閱:1-8-2014:加州婚禮+夏威夷day 7(part 3).慶祝結婚1000日@Park Shore Waikiki &浪漫海灘煙花24-3-2015:慶祝結婚1234日@East Kowloon Kitchen),而曉曉出世之後當然要加上呢個重要項目啦﹗我之前打啲blog有day幾多幾多都係靠佢﹗heehee~

invitation

我哋揀咗100日後嘅weekend舉行百日宴﹗因為早咗開刀出世,我哋無啦啦爬頭做咗表姐,細曉曉兩日(出世)嘅靖曦表妹星期六開party,我哋就星期日啦﹗胡氏長輩連續兩日食一樣嘅嘢唔太開胃吧,不如我哋食西式buffet啦,氣氛又可以free啲﹗近近地又經濟啲,荃灣嘅熊貓酒店都不失為好選擇﹗

螢幕快照 2015-07-22 上午11.06.00

我哋嘅function上咗電子顯示板啦~

螢幕快照 2015-07-22 上午11.06.21

我哋五點半去到水晶廳佈置了,酒店已經set好場地,有六張圓枱,每圍10人,坐得都寛敞,最後方就係自助餐枱,樓底係矮少少啦,客人走動嘅空間都多嘅~螢幕快照 2015-07-22 上午11.06.03

酒店貼心地預備咗張bb床俾我哋,但我望到時都肯定曉曉唔會肯瞓啦,周圍咁熱鬧,瞓係床仔佢又乜都睇唔到,anyway,我好欣賞佢哋心思丫﹗

螢幕快照 2015-07-22 上午11.05.57

做好backdrop佈置就同曉曉換上白紗裙子,今次件裙裙係媽媽精心上網係英國訂番嚟㗎,只著一次都唔怕,當留念就好了~

http://hk.nextdirect.com/

著起裙仔效果都好好丫,不過唔記得帶條淺色底褲出來,露出深藍底褲就唔係幾好睇~:p因為婆婆強烈唔喜歡b女百日宴必備hairband,所以就咁樣展露自然髮型囉~原本襯定件粉紅小外套,但一直冷氣溫度都好適中,所以都冇著過了,仲好啦,睇到裙仔嘅原貌~10516736_10153149370889833_1930783982675779139_n

裝好身當然要影下相啦﹗後面嘅backdrop叫做爸爸媽媽合作設計啦,爸爸諗到沖曬100張相相出嚟砌「100 days」,媽媽就話不如只砌「100」另加氣球字﹗快圖美而家可以晒正方型相扮Instagram,而氣球字當然係經濟實惠嘅淘寶貨啦~老土嘅係,揀字母時鬼遮眼揀漏咗個「D」字,結果要訂第二次,俾兩次運費當然貴咗好多咯,下次有機會真係要對清楚﹗不過第二次時唔甘心俾RMB1.5訂一個字母+RMB35運費,所以訂多幾粒星星,而家顏色有得點綴下又好似靚啲喎~party結束後相相歡迎大家拎走,大家有嘢留下念又好,又幫我哋手處理﹗

螢幕快照 2015-07-22 上午11.06.08

曉曉今次做主角,好多謝各位長輩好友嘅厚愛丫﹗好多好多利是、好多好多禮物,媽媽代為收妥了,$$一定會存入曉曉個戶口度,大個要好好善用丫~螢幕快照 2015-07-22 上午11.06.19

切蛋糕﹗不過主角瞓咗添~大個時睇番相相補數啦~蛋糕係媽媽精心訂製㗎~上網睇呢啲3D蛋糕好多入場費都>$1000,難得經過Hey Yo發現都可以訂自家設計,又平少少,good﹗我話要自己設計時,婆婆同姨媽都非常擔心,因為當年裝修媽媽親自畫咗床嘅設計圖俾師傅,結果⋯衣櫃、書枱、書櫃都好正常好靚,但張床⋯同我嘅設計圖一模一樣,實在太忠實地表達出來了﹗﹗所以今次嘅設計圖由爸爸嚟操刀﹗

螢幕快照 2015-07-22 上午11.05.43

媽媽非常喜歡爸爸嘅「星空」作品,所以蛋糕亦以呢張相為藍本,意境上有高下,但意義上就完整表達出來了,有著住睡袋安睡嘅曉曉,夢中好朋友兔兔同埋斑海豹﹗因為怕太多要求整得唔好,所以俾咗師傅最大嘅自由度﹗:p左下角嘅鍊係乜東東?爸爸送俾媽媽嘅禮物,係彎月+三粒水晶,意義上亦係媽媽喜歡嘅呢張相呢~blublublu~媽媽非常喜歡丫﹗多謝老公~螢幕快照 2015-07-22 上午11.14.55

同時老公都係水晶店買咗呢隻teddy bear俾曉曉做出生紀念,呢隻熊早係我大緊肚時我哋就睇中咗了~:D

螢幕快照 2015-07-22 上午11.06.23

七點半自助餐正式開始,雖然唔係咩名貴嘅食物,但味道都算係咁啦,而refill得好快,總算冇乜失禮啦~

螢幕快照 2015-07-22 上午11.05.40

到散席時嘅小插曲,大學朋友VTO帶咗三歲仔仔Ethan嚟,佢見曉曉流口水,主動問媽媽拎tissue,要幫曉曉抹嘴仔,好gentleman丫,奕朗豬有情敵了,冇辦法啦,人哋大個啲梗係見識多啲啦~

再一次好多謝各位親戚朋友嘅賞面來臨丫﹗曉曉好扭計都唔好意思呢,希望想抱嘅想影相嘅都做得到啦~等佢大個少少又再同大家玩﹗

螢幕快照 2015-07-22 上午11.05.45

不過「百日宴後遺症」只有媽媽知道囉,雖然嗰晚一放落床就瞓天光,但似乎只靠一晚嘅睡眠未能消除疲勞呢,星期一whole day都要黐住媽媽瞓呀瞓呢,好在星期二變番正常可愛曉了~辛苦晒啦主角~

其實我細個時係擺滿月酒的,本來都想幫曉擺滿月,但啱啱嗰個weekend撞正母親節,唔太合適,所以改擺百日宴,當時覺得好在改擺百日宴,因為我哋滿月時仲未習慣做爸媽,亦唔習慣帶佢出街,喊起上嚟都搞唔清開邊瓣,但今次百日宴後又發覺可能各有各嘅好,滿月酒的話當時佢仲係一舊飯,任何時候都可以瞓瞓瞓,俾人手過手都懞豬豬,但有得三個月知道發生咩事了又會扭計,所以決定擺邊樣都要好好衡量呢~好在唔少親戚朋友都表示佢當晚表現算好叻叻,媽媽都安心啲~

過咗100日,曉曉要繼續健康開心成長啊﹗爸爸媽媽會陪伴住你行啊~錫錫﹗

前往其他半熟手媽媽blog

Comments

comments

在《19-7-2015:半熟手媽媽3m.曉曉百日宴》中有 4 則留言

  1. 係呀~好熱鬧!除咗曉曉仲有好多小朋友~~~
    見到大家都笑笑笑 ^^
    曉曉都辛苦了!已經算好乖豬啦~~~
    我地下次早餐會再見~哈哈~~

    • 係丫,即使長輩們冇得抱曉都仲有好多其他小朋友~XD
      大家開心就好了~
      yeah,早餐會﹗

Rita 發表迴響 取消回覆

你的電子郵件位址並不會被公開。 必要欄位標記為 *