嚟到三個幾月，餵奶已經變成生活嘅一部份，抱埋嚟就餵，非常習慣了﹗之前第一個月怕嘅唔夠奶、怕佢啜損已經冇有怕，曉曉已經啜得好叻啦，而冰箱嘅盈餘亦令媽媽非常安心～兩個月鬆啲基本上已經自然戒咗夜奶(雖然人哋話會反彈)，十一點幾十二點食完最後一次到天光，而去到接近三個月，夜晚瞓覺嘅時間亦更長更安穩了，而家九點幾食完最後一次奶，唔駛抱唔駛哄，放落床仔拉好睡袋嘅拉鍊就可以自然入睡瞓到六七點﹗非常好～話說今日又同中學嘅babies聚一聚，仔仔一歲嘅金金同我都變成早起行列，未夠八點就去金金屋企食早餐～哈，以前約朋友總會食dinner，而家最近幾次都變成早餐會，係屋企meet仲可以傾耐啲添，等嚟緊Mandy十一月生埋，佢都變成早起行列啦，yeah～
返嚟主題先～
未餵過人奶嘅讀者見以上呢個東西應該唔知係乜，但用過嘅人一眼就認得出了～冇錯，係乳墊﹗
可能好多人都知道餵人奶辛苦，bb食得密要成日餵，返工又要泵泵泵冇得安落食個lunch，其實脹奶、漏奶嘅辛苦實在不足為外人道，要試過先知有幾麻煩～乳墊就好似乳房嘅M巾，吸收溢出嘅乳汁～^^”
最初入院生b不知好歹執咗幾對乳墊落個走佬袋度，其實嗰陣未上奶，你擠都冇乜幾滴，想漏奶都難，所以當然完封不動帶番屋企啦～但返到屋企之後奶奶漸漸多就要用乳墊啦，即棄乳墊同可洗乳墊都有用過，各有各嘅好，其實可洗乳墊貼住身體舒服啲，但多得滯時吸唔晒，會濕到透bra到面衫，如果出咗街就非常尷尬﹗即棄嘅梗係冇咁環保啦，但真係可以吸好多﹗有次朝早起身，重到好次阿女用完嘅尿片咁重，但依然非常乾爽～
最近漏奶又多咗，其實同佢夜晚瞓覺時間長咗有關，如果完全唔泵，九點幾啜過之後到第二朝七點起身有成十個鐘，但九點幾佢只啜一邊嘛，冇啜嗰邊其實係由六點幾就開始儲，到第二朝就會谷得不得了﹗試過就知，谷得好緊要時前面兩團會超硬超緊，瞓覺都唔可以側瞓，否則會好痛，即使平瞓都瞓唔著～辛苦都係其次，最重要係勁怕會塞會病，塞就會有一舊腫起，要又按摩又熱敷又俾b啜啜啜先會通番，唔好彩發炎的話仲會發燒發冷嗰個位置勁痛，所以定時放奶對於人奶媽媽嚟講係生活最重要嘅一環﹗我而家都係臨瞓前泵清vs忍耐幾日等身體調節之間掙扎緊，臨瞓泵清就唔可以任性地眼瞓就瞓，否則慣咗日日泵，有一日唔泵就會凌晨半夜三更谷到醒咗要泵咗先瞓得番﹗但忍耐一排等身體自己調節嘛，就少咗泵清嗰餐奶嘅奶量做走棧，因為而家返工嗰兩泵其實唔夠供應阿女下一個返工日時食，如果晚晚有多一泵就肯定夠，但冰箱又越嚟越冇位啦～等我再諗諗先啦～
前往其他半熟手媽媽blog