12-7-2015:半熟手媽媽3m.大包小包上班去

其實七月就開始返工啦,不過返咗三日、時間過咗差不多兩個星期先有時間有心機停低落嚟打打blog~係呀,暫時都係part time先,一星期兩個full day,多啲時間自己湊b嘛~對於返工其實都好緊張,一方面足足三個月冇睇過病人,都驚自己生疏晒,之前由full time轉part time中間嘅休息都只係一個半月,好怕唔識打字唔識問症又冇速度﹗另一方面因為要泵奶,又怕時間安排得唔好,又怕帶漏嘢,又怕會唔順利等等~仲有又擔心曉曉唔知係auntie度習唔習慣,會唔會蝦人哋,佢最近埋身得多又唔係幾肯食樽樽喎⋯總之一萬樣嘢擔心啦~

預備返工由執書包開始⋯

我個書包:奶泵連火牛接駁喉、奶泵parts、handfree泵奶bra、兩個Tommee大樽連蓋、大細樽adaptor、兩個Medela細樽連蓋、奶樽夾、微波爐消毒盒、Fridge to go、餵奶巾

曉個書包:四樽奶、四個奶嘴、冰袋冰種、後備衫衫、紗巾⋯仲有啲consumables已經放咗係auntie屋企

諗咗一大餐之後,決定由老公帶曉過auntie度,放工就由我接佢返嚟,所以一落樓就要分道揚鑣啦﹗分開嗰一刻有少少唔捨得,但一返咗工之後就冇掛住過個女了,因為忙到氹氹轉丫~

螢幕快照 2015-07-12 下午10.38.35

第一日返工嘅第一泵,影張相紀念先~考慮過我儲奶嘅需求同埋谷胸嘅情況,返工最少要泵兩次,開工之前一次、lunch一次,再視乎時間睇下放工臨走之前泵唔泵多一次﹗所以以前八點九先返到去診所,而家八點三就返到啦~話晒做咗咁多年,唔慣都係頭一晝嘅事啫,好快又上手了,good good﹗如果事情順利,原來仲可以同同事出去食lunch添,三日之中有兩日有同佢哋食飯丫~

螢幕快照 2015-07-12 下午10.38.42

好sweet sweet嘅祝賀~之前送薑醋券俾同事夾埋張相俾佢哋,佢哋整咗呢張小poster呢~

螢幕快照 2015-07-12 下午10.38.46

微波爐係我好朋友,要消毒泵奶parts就靠佢啦~雖然母乳group入面有媽媽話佢哋可能只用熱水沖下,or有啲就話成組parts雪入雪櫃再重用,不過我見而家曉仲細,暫時都係樣樣做到足晒好啲~螢幕快照 2015-07-12 下午10.38.49

返兩間診所,一間有育嬰室,一間就冇要係自己診症室度泵奶,有育嬰室真係唔同啲呢,乾淨啲又舒服啲~

螢幕快照 2015-07-12 下午10.38.52

不過都有狼狽事,話說返工第三日嘅lunch嗰泵呢,泵泵下電芯冇電,其實我有帶火牛,但啲插頭咁複雜,實在好難分辨邊啲拔得出嚟邊啲唔拔得家嘛,好在嗰陣已經到尾聲捱埋佢⋯下次都係帶定後備電芯穩陣啲﹗

so far都算順利啦,書包執多兩次,行程實戰多兩次,而家smooth好多,壓力又細啲,good~生活而家更充實了,做個半職媽媽半職醫生都幾好丫,又可以親手湊大BB,又可以繼續工作,分別做兩樣事情時都會更珍惜﹗

前往其他半熟手媽媽blog

Comments

comments

在《12-7-2015:半熟手媽媽3m.大包小包上班去》中有 11 則留言

  1. 叻叻媽媽,睇症同泵奶都應付得好好!
    要研究USB Battery 接奶泵!那便不怕沒電啦

    • 返工泵奶只望唔好泵得唔清變成塞or發炎就好了~
      有啲泵係可以駁尿袋丫﹗有啲媽媽用大陸牌子優合RMB99就可以了,不過Medela好似冇人咁做呢~

  2. 哈哈,留意左妳個blog一段日子
    我都係半職醫生半職媽咪,自己凑仔,依家十個月大 加油呀!!
    可以陪住佢地成長好幸福,雖然有時都幾辛苦

    • 唔知你覺唔覺得,湊b仲辛苦過返工⋯^^”
      不過每一日睇住佢成長、進步真係好開心~而且可以直接餵媽媽奶,又方便又新鮮,yeah~嚟緊佢加固就仲忙啦,要煮嘢食俾呢個小人仔食,將來識爬識行仲要時時追住佢添~

  3. 你好呀!多謝您嚮網上分享湊bb同其他實戰經驗的分享,資料真係好有用呢!我bb最近都出左世,而家一個月多dd。我都係由懷孕到生bb後一直想全人奶媽媽。
    但不幸地,由於我無做好資料搜集,唔知道原來開刀生bb都可以即時埋身。。。所以頭24小時未落得床前bb食奶粉的。到可以落床之後,就算幾辛苦,幾痛,我都按住傷口行去老遠育嬰室埋身餵bb。
    之後幾日都食得唔錯,到出院前一晚,我已經上左奶,但bb又唔響身邊,自己又無經驗無帶定泵,同姑娘講話個胸谷到硬曬,佢又話你今晚抖下先,聽日先俾bb啜。
    結果我出院果日谷奶谷到塞曬,仲要係塞到好嚴重果隻。返到屋企俾我屋企人亂舞一輪(過程我真係呢一世都難忘,仲慘過生仔,超痛苦),之後仲要俾bb啜損,又頸塞,所以唯有密密泵。
    因為有陰影,我到而家都係泵俾bb食,有時會補奶粉。(之前補身飲中藥醫生話啲人奶要隔耐啲先可以泵俾bb食。。。所以要補奶粉)
    但我其實一路都好想埋身餵番bb,但又驚所有野要重新黎過(而家bb食奶份量,時間都穩定)驚一轉番埋身會擾亂啲時間。再加上我而家未可以飲湯水+唔係埋身,奶量由一開始太多漏到成床係,到而家bb大食左要開始追奶,我好擔心遲啲會唔夠。。。
    可以俾啲意見我嗎?
    另外,我都係用TT單奶泵同奶樽,而家轉左優合泵,但又唔可以直駁TT樽,可以請教您啲adaptor 嚮邊度買嗎?
    您之前介紹過嘅hand free bar 同埋Avent milk collection shield 嚮邊度買嗎?(因為我揾過好多間都無

    • 加油媽媽﹗我哋做女人嘅,做咗媽媽之後,因為愛錫bb,好多唔可能都會變成可能﹗
      首先多謝你睇我個blog,我用心打除咗為自己留個紀念之外,都希望可以幫到有需要嘅人呢~
      你遲啲駛唔駛返工呀?定係會做全職媽媽?如果ftm的話全埋身一定係王道,bb唔識埋身可以去健康院搵母乳姑娘教你,即使要返工,早晚可以埋身都好㗎,萬一塞咗都可以有bb幫你啜通佢﹗
      至於奶量問題,其實人奶係供求問題,刺激乳房越多(either埋身啜or泵),身體就會製造越多奶,當然原材料都好重要啦,唔一定要湯水or上奶食品,飲多啲水最實際,飯都要食得多,心情放鬆同休息足夠都好重要﹗如果唔靠埋身單靠泵的話就要密密加泵了,現階段起碼bb食一餐要泵一次,每次每邊半個鐘,冇奶出都要空泵,等身體知道唔夠奶,追奶的話你要額外再加泵嘅次數,例如本來三個鐘次(開始時間計)就要加密到兩個半鐘頭一次,係呀,好辛苦㗎,所以埋身最正﹗
      你有冇加入「媽媽牌同盟」係Facebook search佢哋,入母乳餵哺支援區,有幾千個經驗媽媽可以幫忙母乳疑問㗎﹗
      TT個adaptor我係美國住嘅阿姨幫我買,唔sure香港邊度有得賣?不過你可以泵咗倒過去都得嘅,我阿女而家都唔用TT樽lu~
      Hand Free Bra同埋盛奶器我係網店「新生堂」買,買夠相當$$可以送貨~
      有咩隨時留言搵我啦,我會盡力解答﹗祝長餵長有,奶路亨通﹗

      • Rita, 多謝您的回覆呀!
        認同呀,做媽媽的,真的會張不可能變成可能!
        好的,我會盡我的能力的

      • Rita, 多謝您的回覆呀!
        認同呀,做媽媽的,真的會張不可能變成可能!
        好的,我會盡我的能力的!
        想問你而家用邊隻泵同奶樽?
        另外,我有個迷思,你會泵完先埋身?定埋完先泵?
        如果泵完先埋會唔會唔夠bb食?

        • 我最初自己買咗Tommee Tippee電單泵,但覺得單泵實在太花時間,後來朋友借咗Medela Swing Maxi電雙泵俾我,用到而家囉~
          奶樽開頭又係用TT,但到兩個幾月時阿女突然間唔肯食,嗰陣都唔知係樽嘅問題定係淨係鍾意埋身嘅問題,乜都試下,換咗Pigeon樽+母乳嘴又用到而家了~
          基本上而家淨係返工或者出去唔帶阿女至泵啦,平時埋身都唔泵了,總之阿女唔埋嗰餐就要泵番代替啦~如果你想增產預備返工,當然埋身之餘都要泵,有啲人會埋身食一邊就泵另一邊,有啲人就會埋完至泵,雖然泵完先埋唔會冇奶,因為奶係即啜即造,但如果泵完至埋,奶嘅流量速度一定會慢好多,BB可能會食得好meng憎﹗

  4. 多謝你的回覆呀Rita!
    想問問如果bb埋完身30分鐘,自己離口後;再餵埋支泵奶(4 orz) 竟然食得曬
    感係咪代表bb 埋身無野落肚?純粹當奶咀啜啜?
    同埋點知bb幾時需要食埋另一邊?
    謝謝

  5. 想問下你會建議我應該泵左先埋身?定埋身後先泵?
    因為而家bb啱啱轉番埋身我未知bb時間,但如果等到佢喊先埋,我又會好谷。。。
    但又好似你感講,如果泵左先,bb要啜耐d,我又想佢食得好d。。。
    而且我遲啲都要返工(半年後),都想學下儲備。。。

Bodi 發表迴響 取消回覆

你的電子郵件位址並不會被公開。 必要欄位標記為 *