30-6-2015:新手媽媽day 83.半熟手媽媽

原本想到曉曉三個月後我個blog嘅大標題先轉做半熟手媽媽blog,近排覺得各樣東西慢慢上軌道了,又趁而家佢豬豬緊我有啲自己時間,不如打下呢一段時間嘅感想啦~

11698803_10154031607768747_1315110322233027609_n

到咗兩個月大半,曉曉開始越嚟越多反應了,會對你笑,會眼定定望住你,會識得聽你講嘢,亦會識得用眼神去搵熟悉嘅爸爸媽媽~而家唔係再只係養隻食、瞓、疴嘅他媽哥池啦,佢變成個小小人仔了~

1517390_10154029600298747_4997538489207379820_n

識坐?梗係唔係啦,爸爸擺到佢挨挨傍傍先扮坐咋~不過可愛是真的﹗XD

點樣上軌道?我覺得最令人感覺良好嘅係開始掌握到佢想要啲咩,知道佢做咩事喊做咩事扭~以前聽啲媽媽講,「係啦係啦,眼瞓啦眼瞓啦~」會覺得匪夷所思,咁都知?個b淨係係度喊咋喎,原來知㗎,分辨喊聲係其次,其實最重要係了解佢嘅作息規律~

好慶幸嘅係,而家曉曉基本上已經戒咗夜奶,之前有刻意建立睡前routine,樽餵->掃風->換片->放床仔->錫錫->熄燈,但後尾有試過三幾次發現其實佢晚上十點幾埋身食完之後都可以瞓天光,就冇刻意要臨瞓食樽(諗住唔怕佢埋身唔認真食會食唔飽),而且媽媽係現場佢食樽食得完全唔乖,只想埋身啜啜啜,用樽餵又多嘢準備,而家索性唔多此一舉了,全天候埋身吧,反正下星期都開始返工,佢一星期有兩日要食樽就唔怕唔記得食樽技巧啦~

夜晚佢好瞓,我又好瞓啲,日頭媽媽就精神啲,多啲時間做屋企嘢做自己嘢啦~唔知係咪因為夜晚食疏咗,最長有成八個鐘唔食奶,日頭食密啲我都由得佢feed on demand了,為起嚟全日都係6-8餐,正常丫~

而日頭嘅生活一般都係「食、玩、瞓」嘅循環,食飽飽後嘅狀態我哋稱之為「可愛曉時段」,佢會眼仔碌碌咁望人,喜歡笑、喜歡聽人唱歌、同佢傾計,媽媽由bb話「ung古古」到好複雜嘅人生大道理都會同佢講,不過每日唔少得嘅係教佢自己個名同埋邊個係爸爸邊個係媽媽﹗唱嘅歌由聖詩到兒歌到民謠到流行曲,中文到國語到英文都有~之前佢鍾意聽我唱「主禱文」同埋「God is so good」,發現最近口味變咗了,瞓覺鍾意聽互祝平安歌「祥」,玩時鍾意聽「Que Sera Sera」同埋「cha cha cha」,cha cha cha可能佢純粹鍾意睇媽媽跳舞吧,哈哈~不過可愛曉時段一般只有大半個鐘至個幾鐘,之後就開始攰要扭眼瞓了,可能要抱抱、拍拍pat pat、行下路甚至un un,瞓瞓瞓就到下一餐啦~咁就係一個cycle~不過有時佢超眼瞓會skip咗玩嘅部份,一食完就瞓到下一餐,尋日有兩轉係咁,可能因為前日出街出得長時間吧?佢瞓得多時亦係媽媽自己嘅黃金時間,可以做做煮飯嘅準備、可以睇睇電視等等~

聽落好似幾開心咁,不過其實都攰,身體上嘅攰啦,特別係抱得多,肩膀嘅攰,手腕嘅攰~而家右手手指公會痛,痛嘅位置確實係DeQuervain tenosynovitis(媽媽手)會痛嘅位置,但Finkelstein test又negative喎,通常係瞓得耐咗一郁番就痛,但郁動多咗就好好多,我都唔知係抱佢抱到痛丫,定係餵奶時、抱佢時成日單手㩒電話(仲要係大部嘅iphone 6,好在唔係plus)所以痛,anyway都係同湊佢有關㗎啦~所以而家都盡量唔單手㩒電話,老公係度時亦盡量少抱,睇下去買個band戴下會唔會好啲啦~

下星期就開始返工了,不過繼續係part time,一個星期兩個full day,我同大家講起時都話,「當返工嗰兩日係休息囉~」係呀,湊b辛苦過返工好多又困身,大家要愛你嘅媽媽,更更更更更加要愛湊完你長大再幫你湊b嘅媽媽﹗

前往其他新手媽媽blog

Comments

comments

在《30-6-2015:新手媽媽day 83.半熟手媽媽》中有 3 則留言

  1. Rita,你好!我係公關公司Edelman嘅 Jessica.
    我哋注意到你有關育兒同親子教育嘅Blog,由於我哋公司嘅客戶都會有一啲有關嬰兒用品或親子嘅活動,希望與Rita你喺不久嘅將來有合作機會。
    如果方便嘅話,希望你可以留低聯絡方法,包括姓名﹑電郵﹑手提電話號碼及其他網誌(如有),或電郵至 jessica.leung@edelman.com, 我哋好期待與Rita你合作!
    期望好快會得到你嘅回覆,謝謝!
    Jessica

Catherine 發表迴響 取消回覆

你的電子郵件位址並不會被公開。 必要欄位標記為 *