18-6-2015:新手媽媽day 71.Aprica超輕巧BB車用後感

我嘅懷孕扎記blog之中有「we are ready」一系列關於BB用品嘅挑選過程,之前承諾過,用呢堆東東之後會逐一寫番用後感,我諗我可以陸陸續續咁推出用後感系列了﹗今次揀咗BB車嚟寫先,因為同我天天在一起嘛(請參閱:12-3-2015:懷孕扎記33w5d.we are ready之Aprica超輕巧BB車)~

螢幕快照 2015-06-18 下午4.48.35

由差不多滿月時第一次坐(嗰日係落屋企樓下only,由Joe叔叔手中借來VTO姨姨嘅Medela雙泵),到而家日日坐,感覺佢已經知道,上車車即是出街街了﹗近至落一落街買餸食飯,中距離至個個星期返教會,以至最遠過埋海陪我哋去北角食自助餐,曉曉已經開始習慣佢嘅座駕啦﹗媽媽亦開始熟習操控架車同路線~吓?推車都有技巧?有㗎~

呢架Aprica車仔最特別嘅地方就係輕,只有3.6kg,亦因為輕,所以車轆細同幼,經過路嘅凹凸不平,小石壆都要特別小心,輕輕抬起前轆再推過去先唔會反車~雖然轆細,但我又覺得推得都幾順,手柄高度同質感都好舒適~因為車細,所以車底嘅小網袋其實比較細,出街放買番嚟嘅戰利品就唔係幾夠用啦,所以我哋亦外配咗呢個﹗螢幕快照 2015-06-18 下午4.50.39

係母乳媽媽group認識咗台灣嘅蔓蒂小鋪,除咗主打嘅孕婦衫餵奶衫之外,都有唔少嬰兒用品,我買呢個袋仔純粹係貪佢可愛,買時冇諗實唔實用,其實之前已經配咗嗰兩個黃色嘅鈎仔,不過後來發覺呢個袋仔好good呢﹗只係落街一陣唔駛揹好大個袋放BB嘢,只需要帶換片三寶--片片、濕紙巾、換片墊,同埋開餐用嘅餵奶巾就ok,用呢個袋仔剛好﹗(本來落街買嘢or食飯都只係呢個袋備,但由聽日開始要加多一項--spare嘅衫衫,因為今日落街飲茶,好不幸地屎屎上咗背脊,冇衫換陰公豬⋯>.<“)至於個鈎仔用嚟掛少少買嘅嘢都ok~不過要謹記,車仔得3.6kg,曉曉得5kg(截至兩個月大),唔可以掛太重嘢,小心反車﹗所以我去超市買嘢多數都係放啲又重又乾淨嘅係車底,之後先按重量掛少量係鈎仔度~

講多一樣,好多BB車都話自己可以雙向推車,開頭覺得,BB細時向住自己可以時刻留意到佢,大時可以向外面等佢睇下嘢,好似幾好咁~但後來發現,車嘅後轆冇360度,所以反轉推的話就會好唔順,轉彎要轉超大個圈,呢個function有等於冇,所以大家買車可以唔駛理呢一點﹗

整體都好滿意啦,function同外觀我都好喜歡,用之後比起買時冇乜失望,至於而家期望嘅係希望佢夠耐用啦,如果第時生多一個都可以用到埋都未爛就100分了﹗

蔓蒂小鋪網站:

http://www.mandyshop.com.tw/Shop/

前往其他新手媽媽blog

Comments

comments

在《18-6-2015:新手媽媽day 71.Aprica超輕巧BB車用後感》中有 4 則留言

  1. 最衰都係姨媽喇,叫左曉曉媽媽出來吃飯,如果今日買左大家樂外賣咪唔駛著住屎屎衫無得即刻換囉!

    • 唔怕唔怕﹗帶住個B係預咗有各樣突發事件﹗叫做經一事長一智啦~

    • 真係要乖乖坐車車,呢個人仔最鍾意抱抱黐到實一實﹗
      唔知遲啲變成巨曉仲瞓得舒唔舒服呢?

David 發表迴響 取消回覆

你的電子郵件位址並不會被公開。 必要欄位標記為 *