10-6-2015:新手媽媽day 63.媽媽奶辛酸史(三)之漸入佳境yet乳腺炎突襲

曉曉兩日前滿咗兩個月了﹗去咗健康院磅重我非常之高興呢,有5.17kg了﹗由出世嘅2.9kg,一個月嘅4.04kg,至而家5.17kg,增長非常理想呢~唔夠具體?2.9kg係10-25 percentile生長線,一個月時已經貼實25條線,而家?去到50 percentile條線啦﹗唔單止增重,仲追埋生長線添呢,佢新長嘅呢2kg,完全都係靠媽媽奶建立㗎,入面有我食咗嘅白飯粒子、三文魚粒子、菜心粒子⋯等等等~多謝曉曉咁俾面啜啜啜,吸收吸收吸收,再長肉長肉長肉﹗叻叻﹗螢幕快照 2015-06-05 下午4.14.14

餵方面都大大長進呢﹗出生後第一個星期啜損咗,休息咗個幾禮拜做咗全泵媽,乳頭慢慢復原再逐漸埋番身,全埋身四日後又損咗,屢敗屢戰,休息後又再埋身﹗而家曉曉越大啜得越叻,除咗媽媽唔帶佢出街要食樽樽之外,已經可以全埋身了,又冇啜損媽媽,我甚至唔記得要搽羊脂膏保養乳頭了﹗而啜啜時間亦縮短,食出奶快嘅左左,可以十分鐘就完成一餐﹗叻女~

媽媽亦去到邊餵到邊,由屋企餵到婆婆嫲嫲屋企,餵到上港鐵,又餵到去聖堂,茶樓餐廳cafe都有試過,我諗最勁都係係錦華商場發現個育嬰室只有換片枱而冇餵奶房,唔好話餵奶房,連張椅都冇,育嬰室細到連bb車都放唔入,點算?企係走廊末端企係度餵囉﹗媽媽牌同盟嘅媽媽用嘅term--「一巾走天涯」﹗

螢幕快照 2015-06-10 上午10.26.22

做人奶媽媽都可以享受生活﹗同老公出咗去旺角新世紀,食咗個美味嘅乳酪新地,yummy~螢幕快照 2015-06-10 上午10.26.05

餵奶巾底下突出嚟嘅腳仔非常cute呢~

係呢度我真係要推介下媽媽牌同盟Facebook嘅母乳餵哺支援區,真係超多正能量﹗多謝day嘅表嫂推薦我入group~有過萬會員嘅FB群組,入面發post回post都非常踴躍,而且大家對於被周邊親友打沉嘅人奶媽媽都非常支持,無論係情感上定係實務上嘅支援都好強勁,而且reply超快~我亦係group入面睇到好多媽媽餵人奶受到好多家人嘅阻撓或批評,而好好彩我身邊嘅人都好支持,更感覺自己幸福,我擁有嘅,無論係經驗定知識,亦更樂意share~大家如果preg緊或者已經餵緊人奶一定要入group﹗你去FB search呢個group名,PM佢哋admin就得啦﹗有睇尋晚嘅東張西望嗎?熱血咁舉行快閃活動就係呢班叻叻媽媽了,不過天星小輪快閃時曉曉都未滿月,我又仲係餵得一團糟,唔可以撐場,不過FB上嘅like總冇少~:D大家加油加油﹗

正係呢段時間咁高興之際,又發生不太順利嘅事,啱啱星期日去飲,原本好妥善安排曉曉去嫲嫲度湊,媽媽帶埋泵去飲,應該會ok,唔知係咪未試過著住晒衫係街用手拎住泵(因為平時係屋企慣咗hand-free咁用simple wishes bra嚟泵),係咪泵得唔順呢,嗰晚返到屋企發現左左又一個部份紅腫熱一舊又推唔開,之後仲發冷發燒,莫非就係傳說中嘅乳腺炎?﹗拿拿臨叫醒最強啜啜部隊成員--我個女--幫手啜清佢~之後嗰日就返健康院,好在母乳姑娘話唔嚴重,只係作初起而已,唔駛食抗生素,只要密密啜同敷椰菜(?﹗)就ok了~day對於敷椰菜特別覺得好奇~:p冇錯,係草藥咁敷上去,等嗰part唔好造奶咁澎湃,涼涼地又有舒緩作用~好在有老公同媽咪幫手照顧我同曉,好好休息咗兩日,而家好咗好多了,又變番鮮繃活跳﹗下個星期又有得去飲,我要諗諗計睇下點樣會泵得好啲,可能都係要乖乖離席20分鐘搵間餵奶房處理啦~

anyway,少少事唔會打沉到我嘅~各位人奶媽媽加油﹗

前往其他新手媽媽blog

Comments

comments

在《10-6-2015:新手媽媽day 63.媽媽奶辛酸史(三)之漸入佳境yet乳腺炎突襲》中有 2 則留言

    • 加油加油﹗第時你都加油~
      啲漫畫好耐㗎啦喎,你太耐冇上過海景了~

發表迴響

你的電子郵件位址並不會被公開。 必要欄位標記為 *