都係要趁扭抱嗲嗲豬瞓咗，媽媽先至可以隔十七後再打blog～果然，冇咗陪月姨姨之後忙好多，要擠時間同精神出嚟打blog真係唔容易﹗﹗有時間都可能用嚟瞓咗先啦～攰？我就話隨時隨地可以話瞓就瞓話醒就醒，但呢隻麻煩豬仔唔係咁易丫～

關於抱定唔抱，真係有好大學問，其實由佢出世開始已經接收兩大陣營嘅忠告，以我媽咪為首嘅「抱抱陣營」，加上健康院小冊子都係咁講，認為初生BB由母體出嚟之後容易冇安全感，佢需要抱抱時回應佢嘅需求可以俾一個安心嘅環境佢成長，對將來性格發展較好；另一大陣營就叫我要「有時要忍心啲」、「唔好抱咁多」、「慣咗成日抱你就麻煩」，主張BB抱得多會習慣，而且會操控大人～我其實比較buy第一type，話晒我都係被抱大嘅，heehee，不過最重要嘅一點係，我比較崇尚大自然嘅法則，BB喊扭抱係天性，而聽到BB喊聲而媽媽感到心痛、有個衝動要去抱去安撫亦係天性，都係嗰句，回應大自然嘅呼喚吧﹗現實嚟講，同老公傾過，我哋都覺得，得閒咪抱囉，唔攰咪抱囉，暫時係咁運作啦～

不過嘛，由扭扭到抱抱到放低真係一種藝術，亦充滿技巧上嘅挑戰，係陪月姨姨同其他經驗媽媽身上學咗幾招～

初生嗰段時間包成蟲蛹，俾到BB被環抱嘅感覺，有安全感，係成功放低落床嘅關鍵﹗不過而家接近兩個月開始唔係好work，佢大隻咗又有力，一般包被唔係好裹得實，通常都係夜晚熄燈瞓覺嗰一轉先同佢包包～不過經驗得知，即使唔變蟲蛹，用被輕輕裹住再放低，成功機會都較高～

瞓著後，放低落床仔時要輕輕的，甚至你嘅胸膛唔可以離開佢個身體咁放落去，繼續拍拍屁股，或者放隻手係心口度⋯

側睡似俾人抱住多啲﹗背脊後面攝啲嘢，像真度就更高了～

佢瞓得到嚟講，有時姿勢都計較唔到咁多～不過有好幾次我抱住曉瞓到呢個pose之後，我再輕輕轉身向左邊，輕輕拎開抱住佢嘅手，再輕輕由後方移離，都可以成功鬆脫～

呢隻豬仔係會捉實人件衫唔放㗎～

如果出完街返到嚟係瞓緊嘅狀態，就唔好郁佢了，繼續係車仔度瞓住先啦～哈，雖然呢張相唔係今日影嘅，但我而家打緊blog嘅狀態正正就係咁，曉係車仔度瞓緊﹗等媽媽做多幾樣自己嘢先再貼上嚟啦，好唔好？

講起呢個話題，要安撫喊喊嘅曉曉，除咗抱下，拍下pat pat，行下路之外，我哋都會唱下歌仔，不過有趣嘅係，爸爸同媽媽都有自己嘅主題曲，我唱day嗰首唔work，佢唱我嗰首都唔work，早排day唱緊嘅係陳綺貞翻唱過嘅「天天想你」同埋David Choi嘅「By my side」，我就唱緊兒歌版嘅主禱文，但day話呢排佢嘅品味變咗鍾意聽快歌喎～真唔真？

前往其他新手媽媽blog

Comments

comments