15-5-2015:新手媽媽day 37.第一天的獨立FTM

FTM--呢個term呢,我自己未係我都唔知stand for咩,原來入咗呢個圈子之後就會接觸好多新term,FTM就係Full Time Mother,嚟緊到七月先至返回工作崗位,由而家開始我就係FTM,到七月時就變成PTM了﹗^^”

不過產後頭一星期有老公請咗侍產假,情緒上對我嘅支援最多,而返屋企之後嘅一個月仲有陪月姨姨幫手添,實實在在地幫我好多~基本上有陪月姨姨嘅時候,我日頭嗰八個鐘所做嘅,就只係食食食餵飽自己,同埋製造奶奶奶餵飽BB,其餘時候可以大覺瞓,BB沖涼、BB換片、BB食樽樽、BB扭計我都可以放心交俾佢,而陪月姨姨亦精心預備一日無數餐嘅營養美食+湯水俾我,我張開眼就有得食同飲--不過唔知點解過去一個月都仲係好攰,可能佢唔係度嗰三分之二嘅時間都被搾乾了⋯

但陪月姨姨幫手足足一個月之後,就到我要獨立嘅時候啦,今日係值得紀念嘅日子~我同老公講「好在係星期五啫」,佢笑說話我到星期一就會「星期一咁嘅樣」,唉,連佢返工都未有「星期一咁嘅樣」,我留係屋企反而有,大家可想而知做個FTM有幾大壓力呢~好在而家餵奶換片都已經上咗手,其實我最最最驚嘅就係BB大喊特喊,佢喊起上嚟可以拆天,當已經食飽+片片乾淨+室內溫度適中+抱住佢之後都仲係喊,我就會好無助了⋯

要嚟嘅終於都來臨~現在打blog時間係下午六點十分,距離爸爸返到屋企只剩低一個半鐘左右,都算so far so good~尋晚曉曉都瞓得好好,一覺有五個鐘,四點幾食奶後第二覺都瞓到九點左右~所以我都算有得休息下,不過其間谷奶谷醒咗,冇佢瞓得咁多啦~埋身九點幾餵一餐,之後嗰兩個幾鐘我成功洗咗衫晾咗衫,又自己食咗飯~全日最失敗都係十二點幾嗰餐啦,決定餵樽,好醒目咁提早半個鐘開始預備座熱雪奶,但居然steam漏咗個嘴嘴﹗﹗因為上一餐係埋身,所以「沙漏曉」(即上一餐食過之後開始倒數嘅時間)並非完美嘅三個鐘﹗死火,嘴嘴未ready又已經餓到大喊特喊,哎吔吔,隔離屋太太拍門問我哋有冇咩事,太失禮了~曉曉,你嘈親隔離屋啦~如果唔係一早諗住餵樽熱咗支雪奶,塞俾佢埋身就最快夾妥⋯冇得早知嘛,我知啦~我見三點幾嗰餐前又要同佢沖涼,自己又開始眼瞓要小睡一下,都係三點幾至食嘢啦,反正我個早飯食得好晏⋯

媽媽覺得自豪嘅係,今日只係第二次同曉曉沖涼都算順利,最怕嘅事冇發生,第一曉曉安然無恙,第二曉曉冇同屎屎尿尿一齊沖涼﹗:p

螢幕快照 2015-05-15 下午5.51.04

香噴噴豬豬陪媽媽落去食飯啦﹗食嘅頭大半時間佢好在都乖乖瞓覺:D,食飽飽我飲咗半杯飲品時佢boot一聲之後就狂喊,我拿拿臨飲埋就埋單走人,好在客人唔多,waitress姐姐都致以諒解嘅眼神俾我instead of嫌棄嘅眼神~雖然屋企好近,反正商場育嬰室就係餐廳旁邊,一於試下啦,住屯門咁多年都未入過育嬰室~入面就係換片枱了,仲有兩隔獨立嘅餵奶房,我換片後佢就即刻靜咗八成啦,但個垃圾桶呢?﹗點解設計到係最入面嘅??唔係好user friendly喎~我唯有留低架車車係門口入去丟垃圾同洗手~

接住落嚟都算係咁啦,係扭眼瞓要抱住瞓著囉~下次會寫篇blog講呢隻豬豬有幾嗲幾黐身﹗而家夠鐘了都唔想叫佢食奶丫,因為好困難至噯到佢瞓著呢~

做媽媽唔容易,做FTM更唔容易﹗﹗trust me,要愛你嘅媽媽,做媽媽真係難過做醫生丫﹗又攰過做醫生丫~Fighting﹗﹗

現在嘅狀態:等爸爸返嚟頸都長了,期待之後連續兩日有爸爸都全日係度嘅時間~:D

前往其他新手媽媽blog

Comments

comments

在《15-5-2015:新手媽媽day 37.第一天的獨立FTM》中有 8 則留言

  1. 都叫不錯啦!叻!
    其實她又不是第一天狂喊,為何隔離屋今天會拍門呢?

    • 都算可以啦,嚟緊一個星期有更大挑戰﹗要出埋街買餸同埋煮飯~加上不可預知嘅猛長肥(又﹗),如果下下未夠三個鐘就餓又會「拿手唔成勢」~
      因為喊嘅位置係廳,更近隔離屋吧?

  2. 經驗無價,凡事能輕鬆面,皆因有了經驗。嬰兒初臨人間,更是全無經驗,喊是她唯一的有效表達方式。不管她是否聽得懂,都要跟她用各種方式溝通,過幾個月,就會漸入佳境。

    • 而家都開始了解佢嘅日常習慣嘅,起碼片片都徙少咗~
      我都成日同佢講嘢呀,我都相信由唔知邊一個point開始佢會漸漸聽得明白~

  3. 媽媽真係好偉大!
    鄰居拍門是關心/擔心你們instead of投訴太吵吧^^”?
    你要加油啊~~~

Rita 發表迴響 取消回覆

你的電子郵件位址並不會被公開。 必要欄位標記為 *