8-5-2015:新手媽媽day 30.曉曉滿月了﹗

人哋話嘅時間過得好快,曉曉滿月了﹗作為媽媽,無分晝夜咁餵奶、換片、照顧哭啼嘅B,一個月嘅時間一啲都唔快,但我都好開心曉曉滿月啦~大粒咗,肉肉多咗,眼仔開始識得望人,夜晚瞓得長咗,又可以同佢出街街,實在太好了~螢幕快照 2015-05-11 下午5.04.34

滿月嘅早上﹗之前去健康院同母乳姑娘度覆診密啲,就一直知道佢嘅體重長成點,但而家退黃同增重穩定咗就要打一個月針至返去健康院覆診了,每一日都覺得佢大粒咗、重手咗,滿月嘅呢一日實在好好奇而家曉曉有幾重﹗雖然唔太準,但我哋都用屋企嘅電子磅試下減法磅重~結果⋯

爸爸+曉曉-爸爸=3.9kg

哇﹗﹗﹗比起出世嘅2.9kg重咗好多丫~雖然冇剝光豬,仍著咗薄單衫同乾淨片片,但都有啲代表性吧~到14號就可以正式磅下「淨重」了~果然媽媽奶嘅辛酸冇白費,亦證明咗「暴食曉」係有成果嘅﹗由最初係醫院時啜啜啜嘅幾滴奶奶,到第一次用樽餵媽媽奶嘅60ml,到而家食每餐120ml,真係嚇死人,同朋友講起至知原來你特別大食,難怪媽媽要追奶啦,產量已經每日超過1L,都間中先儲到啲冰奶,唔怪得知啦~螢幕快照 2015-05-11 下午5.05.20

滿月人仔,手仔比起媽媽隻手都仲係超迷你呢~

螢幕快照 2015-05-11 下午5.06.40

雖然之前出去健康院同醫院都好多次,但今次叫做可以正式出街了﹗仲可以坐自己嘅坐駕添~曉曉坐住車仔都算適應啦~

雖然落去市廣場食飯過程感覺唔太順利,媽媽顧住喊喊嘅曉曉亦唔太專心食飯,又要蓋住餵奶巾餵奶少少論盡,中途佢好扭計要抱起身行下,仲要一張相都冇影實在太遺憾了~希望遲啲多啲外出佢會適應啲啦~螢幕快照 2015-05-11 下午5.06.45

因為身心俱疲,只想快啲返屋企,原本滿月想同大家切下蛋糕都取消了,只係我哋三口子買咗一小件cake影張相算了~紀念照就叫影咗啦,雖然媽媽有少少蓬頭垢面(過去呢個月經常處於嘅狀態,早晚嘅刷牙應該都miss咗好多次)⋯結果件cake得媽媽食咋,曉曉可以隔奶取cake粒子嘅,哈哈~

螢幕快照 2015-05-11 下午5.06.58

一個月大嘅曉曉--視力開始可以fix住望人望東西,亦開始認得我同爸爸嘅聲音(自覺如此咋⋯)~話說之前睇健康院派嘅共享育兒樂(二)小冊子,即是一星期至一個月大嗰本,入面講到一個月嘅development,話一個月時BB會望人嘅面孔,我兩個星期左右時睇,嗰陣嘅曉曉眼睛仲係一臉茫然咁,我同佢講嘢佢唔知望去邊度咁,緊張嘅媽媽曾經一度無聊地擔心佢對眼睇唔睇到嘢,果然人哋話一個月嘅development係夠一個月時先作準嘛,而家好清楚知道佢係望到抱佢嗰個人了﹗但究竟第時曉曉係似媽媽嘅近視眼定係似爸爸嘅supernormal勁勁眼呢?

螢幕快照 2015-05-11 下午5.06.52

滿月後嘅星期日曉曉第一次返教會,第一次返兒童崇拜(點名時嗰聲「到」由媽媽講+手仔由媽媽協助幫你舉,期待你第一次聽到自己名字之後舉手叫到嘅一刻﹗﹗)~佢哋傳統會派烚雞蛋俾教友們﹗好warm呢~辛苦曉曉嫲嫲了﹗今個星期崇拜時有爸爸一齊照顧曉曉,但下星期爸爸要彈結他,媽媽自己要加油﹗

螢幕快照 2015-05-11 下午5.07.03

星期日亦係母親節,第一個母親節別具意義呢~爸爸用曉曉張包被摺成心心,再放曉曉係中間,sweet到媽媽要融化了~而家更體會到做媽媽好辛苦,我係呢度都要多謝我自己嘅媽媽丫﹗

過去呢一個月,除咗我辛苦之外,另一個好辛苦嘅就係新手爸爸了,我就話做實習同埋頭兩年rotate hospital based training時要call訓練有素啫,我老公本身真係超級唔捱得夜㗎,呢段時間多得佢夜晚起身幫手,佢唔怕見住曉曉喊,所以安撫佢時更有耐心,而佢對於我嘅情緒嘅support更加重要,hormone影響+唔夠瞓嘅肝火上升+對於早期BB身體狀況同餵奶問題嘅擔心,實在流咗唔少眼淚,好在有老公係度我先繼續做到快樂嘅媽媽~另外都要多謝幫我陪月嘅淑華,有咗你幫我預備咁多營養食物我先有咁多奶,有咗你幫手照顧BB我先可以日頭安心休息,夜晚先有精神再努力﹗又要多謝媽咪好多時過嚟幫我手,老公放完侍產假之後多得你一齊陪我去健康院同醫院覆診,有時候幫手照顧曉曉我哋可以休息得好啲﹗另外好重要好重要嘅係兩位前輩媽媽好朋友嘅支援﹗﹗同金金同Helen傾計真係開心好多,佢哋啱啱早我少少做媽媽,經歷過相似嘅事,係最最最明白我感受嘅人,無論係經驗上嘅support定係實實在在係身邊嘅support對我嚟講都係咁重要﹗I love you金金~曉曉返屋企後嘅第一日你幫佢沖涼,你嗰晚掛心我而夜麻麻過咗嚟陪我兩個鐘,仲有嗰日假期陪月姨姨休息時你煲湯俾我飲,太感動了﹗﹗﹗kiss kiss + hug hug~

真㗎,做咗媽媽知道,「養兒一百歲,長憂九十九」,大家要多啲疼錫你哋嘅媽媽~另外,過多幾日陪月嘅任務就完成了,直至七月重新返工之前我有一個半月做全職媽媽嘅時間,係呢個月我已經覺得做媽媽比起做醫生更困難⋯我要努力﹗要加油﹗

前往其他新手媽媽blog

Comments

comments

在《8-5-2015:新手媽媽day 30.曉曉滿月了﹗》中有 2 則留言

  1. 嬰兒的樣子百變,睡覺時天真清純,抱抱時安閒文靜,哭啼時粗魯急躁,吃奶時認真投入,張望時迷離惶惑。偶然嫣然一笑,令人陶醉不已!

Rita 發表迴響 取消回覆

你的電子郵件位址並不會被公開。 必要欄位標記為 *