28-4-2015:新手媽媽day 20.媽媽奶辛酸史(二)之泵媽好幫手

先前講到由兒科回家度假要好好餵飽曉曉,等佢排多啲屎屎尿尿、排多啲黃出嚟,咁降低啲黃就可以正式出院啦~當我個乳頭仲未恢復之際,既然係醫院都食過兩次奶樽,我就暫時做個全泵媽,用樽嚟提供全媽媽奶先啦~係醫院用嘅係Nuk嘴嘴,我哋自己買嘅樽係同買泵時一整系列嘅Tommee Tippee,闊樽配唔到細嘴,但之前好朋友金金俾咗幾個佢個仔唔再用嘅窄樽俾我哋,既然醫院度講到Nuk個軟橡膠嘴嘴似乳頭,我哋專登落樓下百貨公司配番兩個Nuk嘴嘴嚟用~不過用咗冇幾多日,見佢用個Nuk嘴嘴食得麻麻地,啲奶又要闊樽窄樽倒嚟倒去,我哋索性俾佢試番Tommee樽,居然食得好好喎~good﹗

同朋友講起乳頭損同埋泵奶嘅情況,大家都介紹咗好多product俾我丫~螢幕快照 2015-04-24 上午10.33.28

當乳頭損嘅時候,姑娘醫生都只教你搽番自己啲奶落乳頭度,心裡面好想好想:有冇藥膏可以搽咗快啲好㗎?﹗因為真係好痛,好心急想好,又好想快啲埋得番身餵~朋友介紹我買Medela嘅乳頭Lanolin膏膏,其實唔係藥,不過都係再進一步滋潤乳頭,加多一層勁啲嘅保護膜吧?話成份純天然,餵奶之前都唔駛抹走喎~我買咗細支裝試下先,細細支都要$82,希望好用啦~螢幕快照 2015-04-24 上午10.33.31

另外又上網買咗呢兩件東東,右邊嘅「免提泵奶bra」係Helen好早時就介紹我一定要買了,我自己估唔到咁早就要時時泵,之前見網上商店未儲夠數免費送貨就唔訂住,而家要用嘛,點都執夠佢啦~另外陪月姨姨介紹我買嗰個Avent嘅盛奶器,兩樣配合使用非常good﹗﹗

螢幕快照 2015-04-24 上午10.33.34

話說我未有呢對孖寶之前,我一手拎住我個Tommee單泵(好後悔冇買雙泵,嗰陣怕自己太乳牛唔買雙泵,但雙泵真係快好多方便好多㗎~),一手拎住個empty嘅樽係另一邊⋯what?餵過人奶嘅太太們都會知道,餵一邊時另一邊個滴滴滴嘛,一方面唔接住佢會滴到周圍污糟晒,另一方面當滴滴都係甘露嘅時候,你唔會甘心用個乳墊嚟吸收咗佢囉~有咗呢個盛奶shell,蓋係唔泵嗰邊乳頭上面,好多時都可以collect到十幾廿ml㗎~螢幕快照 2015-04-24 上午10.33.36

有機會泵奶嘅媽媽們一定要買呢個Simple Wishes免提吸奶器胸罩﹗﹗100%推介~~個bra就似個adjustable嘅tube top,兩個乳房位置開窿用嚟放奶泵個「喇叭」,咁你兩隻手就可以free出嚟做其他嘢啦~我係單泵,所以一邊放泵,另一邊就放我個盛奶器~非常好~

螢幕快照 2015-04-24 上午10.33.51

有咗呢兩件法寶,我即刻變成快樂嘅乳牛﹗﹗唔駛拎樽拎到手痛,唔駛苦苦地望住個樽collect到幾多奶,對手可以做其他嘢(例如開韓劇嚟睇or打下soda crush啦,呵呵~),令苦悶嘅泵奶過程變得有趣啲~而且肩膀relax咗時,心情又relax咗時,產量都急增丫﹗

開頭時泵得唔多,餐餐清,每次只泵到剛剛夠B食嘅份量,因為冇乜安全感,雪櫃永遠都只有一樽奶,如果阿B突然胃口增加或者我哋唔少心倒瀉咗,就免不過要補奶粉,所以頭幾日我都特別辛苦呀,曉曉三個鐘食一次,即是一日食八次,我就泵密啲,兩個半鐘泵一次,咁先至會有盈餘~你諗下,兩個半鐘泵一次,每次泵半個鐘,加埋前前後後嘅預備善後功夫,都要大半個鐘,每日仲唔係乳牛嘅生活?﹗不過見BB啲黃逐漸退,而體重增加得好好,咁就辛苦都值得了~

啱啱呢幾日個乳頭情況好轉,我就逐步增加多番埋身餵,果然埋身餵先係奶量嘅關鍵,電泵嘅吸力完全不能比擬~俾B啜過,之後泵嘅三幾次,產量可以係一日之間變成double囉~即刻變成富媽﹗(呢啲term我都係join咗FB有個母乳support group先慢慢學識,甚麼窮媽富媽~)有盈餘之餘仲可以儲冰奶(雪奶、冰奶呢啲term都係新學﹗:p)~不過今日返健康院見醫生,醫生特別提醒,唔駛返工住就唔好泵太多啦,奶太多就容易塞,塞就會痛同埋好麻煩,都啱嘅,我而家有安全感了,所以唔駛追奶啦~多埋身,泵就樽餵一餐泵一餐啦~

因為乳頭損過,所以好想嘗試各種埋身餵奶姿勢,之前一直學嘅係環抱式,就係將BB抱係胸前餵~早幾日金金上開嚟屋企時教咗我瞓係度側身餵,好似都幾啱我同曉曉喎~希望嚟緊佢會啜得越嚟越叻,多多埋身少少泵,咁就新鮮啲又方便啲,出街、去旅行都ok啦~螢幕快照 2015-04-24 上午10.33.53

食得飽曉曉就係瞓得安靜嘅小天使了~

螢幕快照 2015-04-24 上午10.36.34

你睇佢個滿足樣~BB食咗滿足,媽媽當然都滿足啦~

螢幕快照 2015-04-28 上午11.09.56

見幾時母乳姑娘時嘅體重,wow,長得好好﹗﹗由2.89kg到3.23kg隔咗一個星期,姑娘話呢啲年紀應該每日長20-50g,而家曉曉係max嘅50g囉,勁﹗要長番多啲肉,但係唔好變肥妹丫~而黃亦退到九十幾度了~

希望下一次再講餵人奶嘅topic時係繼續開心share啦~

前往其他新手媽媽blog

Comments

comments

在《28-4-2015:新手媽媽day 20.媽媽奶辛酸史(二)之泵媽好幫手》中有 9 則留言

    • 而家漸入佳境,心情都好啲~:)
      係呀,開始carry到啲newborn size嘅衫衫~(慘~0-3m仲未有耐得﹗)

  1. 媽媽加油!!
    埋身啜真的不容易啦,她再大個些會更進步吧!
    現在有很多存貨啦~不用憂慮啦,錫!

    • 爸爸都加油~你都辛苦了~
      希望慢慢掌握到唔同姿勢都ok啦,咁樣出街去旅行都方便啲~
      雪櫃有啲奶個人都安心啲~:p

  2. 昨晚公公初次用奶欂餵曉曉飲奶,她起初有點張狂,但吃得不錯呀!最後,剩下一點點時,顯然啜得有點累了,不過(我們終於)也順利完成任務了。

    • 佢食樽樽不嬲都好叻,比好多其他BB食得快同埋企理,食奶子都好落力,不過有時落力過頭啫~^^”

  3. Hi 我叫yuri
    我喺一間NGO做緊internship
    遲啲喺IFC會有個exhibition
    我哋希望搵到中小企工作嘅媽媽站台分享
    帶出無論大企業定中小企業 都可以支持母乳媽媽 嘅訊息
    唔知你哋會唔會有人可以出席?

    Contact: raynights@hotmail.com/ yuri.li@unicef.org.hk

發表迴響

你的電子郵件位址並不會被公開。 必要欄位標記為 *