係醫院嘅產後房有兒科醫生恒常為初生嬰兒做全身檢查，姑娘通知我話曉曉要睇物理治療，吓？一問之下知道係for佢隻腳仔，我自己檢查一下，I see，喚起當年做houseman嘅記憶，冇錯，嗰陣都成日幫手寫物理治療嘅referral去睇clubfoot，而絕大多數係屬於位置性嘅馬蹄足，唔係結構性問題，所以唔駛擔心～講都唔容易明白，睇下相啦～

影完先醒起醫生其實係話曉曉係左邊有問題，我影錯咗右邊添，但因為係位置性，其實右邊都偶爾會出現～講緊嘅就係腳腕位置係靜止時會向內屈，但用力伸時又正常～

即係咁，隻腳仔又可以係正常姿勢～所以我都唔太擔心，主要原因係係子宮入面腳仔屈得太耐造成～既然話去物理治療，就不妨去睇下，去睇下有咩意見啦，媽媽又可以學下嘢～

去交轉介信時已經大開眼界了，以前見過大人嘅物理治療，感覺好似個gym咁，但原來兒童組嘅治療室就好似遊樂場咁，充滿歡笑聲，同埋好多小朋友係各種儀器上玩咁～而且入治療室要除鞋，我諗主要係想乾淨啲吧，但又會令小朋友relax啲﹗

到真正去治療嗰日，登記嘅全部都係小babies﹗﹗不過就屬曉曉最細了，只有15日人仔，真係估唔到咁細個都可以做物理治療呢～有兩個物理治療師係一個類似換片台嘅工作台度同逐個BB治療，叫咗名，媽媽就抱BB過去，原來絕大多數係去睇頸仔，有啲B時時擰向同一邊，就要同佢鬆番條筋，等佢兩邊都擰得到，「一、二、三、四、五⋯」咁擰啲B條頸，結果？梗係大喊特喊啦～

終於輪到曉曉，治療師問咗少少產前同出生嘅history之後就檢查腳仔，佢都好sure係postural嘅clubfoot，所以一啲都唔擔心﹗教咗我番去做兩樣嘢，要掃下佢腳背仔外側，佢就會有個反射動作向番外屈，多啲練練向外屈嘅肌肉～另外就係按摩下小腿內側嘅肉肉，等佢鬆啲～冇乜大問題，一個月之後覆診多次可能就唔駛睇啦～過程曉曉豬都好合作，叻叻﹗

返到屋企其實都要搵機會同佢做練習，因為小baby太多時間都係食同瞓了，只有少數清醒時間要趁機會做～加油﹗

前往其他新手媽媽blog

Comments

comments