22-4-2015:新手媽媽day 14.媽媽奶辛酸史(一)之面黃與體重

早係未懷孕之前,我已經決定如果要生B,一定會餵人奶,呢個唔係益處唔益處,決心唔決心嘅問題,而係我覺得BB飲人奶係天經地義,最自然不過嘅事~而我同家姐都係飲人奶大,而媽咪亦對呢件事感到非常自豪(我哋80後出世嗰個年代,人奶真係唔普遍呢)~雖然聽過無數餵人奶好難嘅故事,但我都充滿信心,感覺夠勤力唔放棄就一定ok~不過要實行出嚟又真係困難重重呢~呢篇blog title係day 14,其實講嘅應該係day 0至day 14嘅辛酸史丫,我命名係(一),因為我絕對相信往後會繼續有更多挑戰~

之前嘅blog都有講少少產後房同返到屋企嘅狀況~我好開心嘅係,雖然意外地要開刀生B,但難得地都可以達到產後半小時skin to skin contact埋身餵B,而曉曉第一次埋身亦成功啜到奶子,有冇奶入肚我就唔知道了,話晒懷孕期間我一次都未試過「漏油」,我都唔sure啲奶係裡面預備成點⋯:p返到產後房BB沖完涼保暖完畢之後,即使我未落得床姐姐姑娘都會每兩個鐘左右抱曉曉過嚟俾我埋身啜﹗不過初時真係好frustrating呢,因為理論就聽得多,甚麼環抱式、欖球式,叫我講都識得講,但落實逐個step係點都真係唔知,加上初時傷口好痛,郁一郁都難,即使個B個口已經對正個乳頭,佢都唔識得啜,即使含咗落去佢都會瞓著覺⋯第一晚感覺support好差,心情亦不安,感覺明明係手術室recovery都識得啜,點解再埋身時又唔識啜㗎?﹗好在之前聽講座講過,B出世有懷孕時嘅reserve,頭幾日都只係食得幾ml,佢個胃又得波子咁細,唔駛擔心佢會肚餓唔夠~不過要啜要啜要密密啜,先至可以盡快上奶丫﹗即使唔知有幾多嘢落肚,我都好堅持俾曉曉每兩個鐘埋身,之後落得床自己湊番B時甚至較定鬧鐘,所以叫做手術day 2就開始谷胸上奶了﹗

其實到咗第二朝之後support就好好多了,因為有母乳顧問朝朝巡房,親身單對單睇你埋身餵再俾意見,當時母乳姑娘話技巧唔錯,雖然我乳頭開始有少少痛,但感覺都放心啲~個胸又開始谷,知道要準備上奶,雖然痛但我都開心嘅~神奇嘅事係,我以前從來唔知道自己有副乳,但懷孕時胸部升cup,同時亦發現右邊腋下前方有舊軟軟的小肉突出,中間有細細啡色一點,我估應該係副乳了,到咗谷奶,原來呢個non-functional嘅小乳房居然都會谷﹗﹗仲要好鬼痛﹗﹗因為係腋下,所以只不過係手臂垂低都會好痛~痛到甚至我當時諗,不如我又諗,究竟入面啲乳腺會drain去邊呢?同真正嘅乳房有冇連結嘅呢?雖然唔能夠確認答案,但後來兩個正常乳房唔谷嘅時候,呢個小副乳都唔谷了~谷奶點算?姑娘教用熱敷+按摩,但係醫院入面熱敷嘅工具就只有毛巾一條,因為傷口痛,我行路已經慢啦,去洗手間用熱水整濕條毛巾,返到自己床時已經冇咗一半熱,敷兩嘢就凍晒添,真係inefficient,自己按亦不太有效,反而到咗探期時叫老公幫我按就鬆啲,講到最有效嘅莫過於俾阿B啜﹗佢啜得好就會鬆好多,正~於是呢幾日醫院嘅生活就係兩個幾鐘兩個幾鐘咁樣餵餵餵,乳頭好似越來越痛嘅?但又未見到有損,我都唔理了,照餵了~

出院繼續如是者餵餵餵,乳頭痛痛痛,到出院第四日,返去母乳姑娘度覆診時,我個乳頭已經去到唔係好接受到嘅痛嘅地步,雖然未見血,但都結咗層焦係上面,我真係唔係好想埋身餵了⋯想俾乳頭休息,又怕乳頭混淆唔敢餵樽,姑娘見曉曉又極度頑固,唔係短時間之內可以改善到吸啜嘅習慣,所以教咗我哋杯仔奶~螢幕快照 2015-04-24 上午10.33.26

杯仔奶就係用小膠杯將小口小口嘅泵出來嘅母乳貼係BB嘴唇邊,等佢用舌頭舔下舔下好似狗仔咁,姑娘教要60ml,兩個鐘頭一次,我哋同曉曉都一齊努力學習中~佢要努力啲食丫,因為已經發現有少少黃,要排多啲大小便排走啲黃至得﹗﹗可惜佢食杯仔食得麻麻地呢,根本俾60ml倒瀉咗一半,而且過程好慢添~我哋又試過非常labour intensive地用匙羹餵,好似比起杯仔好少少,但進食量都係好少,真令人擔心呢~

我哋都知佢食得唔好啦,之後嗰朝早去健康院覆診,果然,醫生一嘟話佢黃多咗,要去屯門醫院抽血,睇下駛唔駛照燈~嗚嗚,我最擔心嘅事發生了﹗我唔怕佢黃,但怕佢會因為住院而影響餵人奶嘅問題~去到醫院原來已經要當係住院病人,去到病房職員介紹探病時間,餵奶時間,我眼淚就忍唔住哇啦哇啦咁流出嚟~令我震驚嘅係,係產科嘅post-natal ward非常推動母乳,但去到兒科嘅SCBU,政策上係極力阻止母乳囉,一日得四個餵奶時段,你要知道初生嬰兒食人奶係on demand家嘛,而且可能密到要兩個鐘就食,點可以fix死時段㗎,而夜晚就冇餵奶時段,只可以帶泵好嘅奶俾姑娘用樽餵,諗到呢度就覺得好傷心了,之前咁堅持嘅一下子就被打破幻滅,諗到最壞最壞嘅一步就係從此BB唔識得再埋身食奶了~當BB要先沖涼俾醫生檢查時,我哋係外面聽到佢嘅喊聲,冇錯,雖然出世後我哋只相處咗一個星期,我認得係我個女嘅喊聲呀,喊到人心都碎埋,眼淚又繼續流了~原來未做過人哋阿媽真係唔會明白,初生BB面黃咁普通咁小事,阿媽仲要自己做醫生嘅以前有係兒科病房做過,都會喊到豬頭咁嘅樣~一來又擔心餵奶問題啦,二來又唔捨得同佢分開啦,三來又唔知係病房職員會點樣對佢啦⋯嗚嗚嗚⋯哇哇哇~~~辦好晒入院事宜係食奶時間,姑娘問我埋身餵定係佢哋餵奶粉,吓?﹗奶粉?﹗嗰一刻我真係接受唔到囉,痛就痛啦,痛我都俾曉曉啜咗~不過佢人生到呢一刻為止嘅唯一一餐奶粉就係係兒科度食咗,因為再下一轉餵奶我哋返屋企食lunch之後趕唔切出嚟餵,呢個係我覺得遺憾嘅事⋯原本打算下晝四點幾嗰一轉由爸爸帶泵好嘅奶出去,點知出門冇耐我就接到電話,話BB抽血度數唔高唔駛照燈,可以返屋企度假,第二朝至返去再檢查,yeah yeah yeah~唔駛留係醫院已經好好了~

返到屋企當然仲要好努力餵奶啦,我下一篇blog再同大家講埋其他嘅﹗﹗

前往其他新手媽媽blog

Comments

comments

發表迴響

你的電子郵件位址並不會被公開。 必要欄位標記為 *