述說辛酸血淚之前睇睇可愛相相，調劑一下心情先吧～day 3曉曉就返屋企了，好好彩陪月姨姨有檔期，可以day 5就嚟幫忙﹗因為之前簽約佢會預留預產期前後一週往後嘅一個月俾我，如果超出呢個範圍出世就要睇下佢有冇job在身，好在都ok呢～

唔再係著住醫院制服袍仔+人人一模一樣嘅粉紅包巾，曉曉都可以有自己style啦～不過我生得太細粒了，0-3m嘅fashion我都未carry到，NB size都鬆鬆地，所以我嘅日常衣著都係－－和尚袍咋～

一家三口回家自拍紀念﹗

好喜歡呢張﹗我用咗嚟做電話wallpaper呢(取代咗用咗三年嘅結婚當日嘅相相﹗)～好sweet丫～

返屋企後嘅日常：奶、片、瞓﹗好在爸爸大致上都好幫得手，而家換片片都好純熟了，不過沖涼就仲未試過～

陪月姨姨嚟返工之前嘅星期日，好在好朋友，同時又係媽媽前輩(佢個baby九個月大了)，最近做咗鄰居嘅金金過嚟探曉曉同我，我就搵佢幫手沖一次涼了﹗我傷口都仲好痛，行動唔靈活，而沖涼又未正式試過，淨係產前講座有睇過video同埋用膠公仔demo咋，有金金真好呢～

睇落曉曉瞓得好安靜，其實係夜麻麻勁扭計，一定要抱住至肯瞓，所以成間屋得我一個冇得瞓﹗﹗佢都好俾面我，一定要我抱至得，爸爸都唔得喎～

爸爸惡搞系列之一：攻擊兔仔嘅暴力曉～

爸爸惡搞系列之二：人前同兔仔扮friend，哈哈～

講番返到屋企嘅頭一至兩個星期啦，其實鎖鎖碎碎我都唔知由邊度講起⋯奶奶方面其實更加係呢個幾星期嘅重心，不過呢個問題真係好複雜，我暫時係呢篇blog唔講咁多住，下一篇全篇都講餵奶血淚史～

day請咗一個星期假陪下我，又有陪月姨姨係度，辛苦之中已經好少少啦～開頭埋身餵奶，日間都尚算順利，我諗頭幾日最印象深刻嘅應該係無眠嘅幾個晚上～我哋當時叫日頭嘅曉曉做「天使曉」，食飽飽就瞓得好安詳，又乖乖又可愛～但一到凌晨就化身「惡魔曉」，不停不停咁喊，仲要喊得好淒涼，喊到聲沙，瞓著咗一放低落床仔就喊，我攬係身就又瞓過，check過片片乾淨，又餵完無幾耐感覺唔係肚餓，我哋兩個無經驗嘅爸媽就好徬徨啦～第一晚有懷疑過係咪唔夠飽，就專登拿拿林拎啲奶樽用品出嚟擠出啲奶俾佢補補(原本諗住一直埋身餵應該未有耐用得著，所以冇打開嚟試用過⋯)～又有考慮過係咪唔夠暖，因為身就暖但手手腳腳又涼涼地，又試下加被著襪仔保暖～又諗到係咪初初要適應新環境冇安全感，所以要人攬攬～我哋真係no idea～我又已經超級攰喎，我都好需要休息一下，所以嘗試用唔同方法去「欺騙」佢，好似用蕉蕉攬枕堆到有個凹位，扮成人嘅懷抱形狀再放落去；又試過除咗件「媽媽味睡衣」落嚟當被咁蓋係佢身上，睇下係咪掛住我陣味⋯

我打第一篇blog時嘅狀況⋯^^”個身貼住我個大脾有少少暖意，用包被裹成臘腸卷有少少被環抱嘅感覺，加埋「米袋豹」定一定驚(呢個term未有曉曉已經出現，因為隻斑海豹公仔其實係我嘅，我仰睡時會放係心口上面，好似人哋放個米袋係BB胸前咁，day就稱為米袋豹)，佢都瞓咗一陣～我起碼可以free到對手出嚟做下其他嘢～

點知點都係唔得，唯獨要抱住，唯有搵個安全嘅方法可以攬住佢得嚟我又可以瞓下囉，第三晚我係抱住佢半坐臥係梳化上面瞓，起碼唔會碌走佢又唔會壓住佢，都叫做休息到一陣～其實到咗後來我哋至知原來佢呢幾晚其實都應該係唔係好食得飽至會咁，因為後來確保佢食飽飽之後就大覺瞓了，呢個係遲啲嘅blog blog再講～

另外有個新term叫做「徙片王」，最初預備曉曉出世前我哋唔知佢有幾大隻，用片量有幾多，首先只買咗兩包newborn片，係醫院時都還好，但返到屋企發現耗片量勁大﹗曉曉被冠上「徙片王」嘅寶號﹗﹗佢有時一篤便便會分開三次疴，我哋見片片污糟咗就換，點知乾淨了又「boot」一聲，反覆幾次丫，尿片急速消耗～而且佢好愛乾淨，疴咗少少就會喊，那管只有尿尿，換咗先至安靜，而且食奶奶途中如果便便咗唔換片就會停止進食，你唔換唔得～到咗而家第二個星期我哋開始去摸索佢嘅大小二便習慣，只係得尿尿唔喊就唔好換住，而且食飽飽尿尿咗的話好大機會會馬上便便，便便咗一小堆的話如果唔係怒喊可以等多一等，睇下仲有冇～我哋話佢呀，真係唔知啲片貴丫，仲唔係徙片王？﹗

有咗陪月姨姨真好，唔需要憂愁食嗰部份，三餐+湯水+小食+飲料都預備齊全，飯來可以張口，day都受惠埋可以食到好多新鮮靚餸～原來餵人奶真係會好大食，而家餐餐吸入量係平時嘅1.5倍，day唔添飯時我都要添﹗有啲產婦話食唔慣五更飯，我本來都不太抗拒早餐食飯，去到日本韓國旅行早餐都係食飯㗎啦，加上餵人奶真係勁易餓又時時都勁口渴，成日都jap jap jap～早上六七點食咗碗幾飯居然到十點十一點都可以餓到要追加第二次早餐，真係好誇張，咁究竟人哋話餵人奶容易修身，有冇考慮到增大食量呢一部份嘅呢？﹗陪月姨姨照顧曉曉方面又好幫到手，沖涼暫時由佢包辦啦，而我覺得更有用嘅係佢會了解小baby嘅需要，如果俾著我唔知佢發生咩事喊時，一定會諗到俾下嘢佢食睇下係咪餓，但佢就會考慮到其他可能性～夜晚就靠我哋兩個啦，到咗而家第二個星期尾都漸入佳景，瞓當然係奢侈品啦，但起碼每一截短短嘅睡眠質素都唔錯，加上日間一兩次小睡都夠維持到精神(同埋奶量)嘅～

其實頭兩個星期好困擾我嘅最重要係奶嘅問題，呢個下一篇講，而不能分割嘅兩樣嘢－－黃同埋體重下降－－亦要同奶一齊講，大家繼續留意我下一篇blog吧～

前往其他新手媽媽blog

Comments

comments