9 ~ 11-4-2015:新手媽媽day 1 ~ 3.醫院產後房的二人世界

嚟到day 10先得閒打番開頭嘅blog blog,都好丫,最緊要有打﹗﹗今日精力充沛,因為尋晚終於係咁多日以嚟前所未有咁好瞓呢,斷斷續續有五個鐘丫﹗可以趁機打打blog~講detail之前睇睇相先啦~:D

螢幕快照 2015-04-16 下午9.36.00

係醫院時因為傷口仲痛,郁動唔方便,影到嘅相相都係睇機緣㗎咋~

螢幕快照 2015-04-16 下午9.36.03

頭幾日冇乜幾多款表情,都不外乎係沉睡,皺眉,仲有--喊﹗﹗不過曉曉都算乖,可能知道媽咪辛苦又痛,醫院嗰幾日佢喊親都叫做有原因,濕咗片片啦、餓啦、或者俾附近嘅BB喊聲嚇親(我係咁interpret啦),都冇話特別扭計扭抱~

螢幕快照 2015-04-16 下午9.36.05

媽咪以外第一個抱到曉曉嘅唔係爸爸,而係婆婆~hee,嗰陣曉曉都仲未收水,仲係包包面呢~

螢幕快照 2015-04-16 下午9.36.08

要到咗生之後嗰日嘅探期至有機會影到全家福咋~大家睇咗呢張相話曉曉好多頭髮,冇錯,佢多頭髮係真嘅,但留心,額頭嗰啲頭髮⋯其實係⋯我啲頭髮嚟嘅~

螢幕快照 2015-04-16 下午9.36.10

姨媽姨丈去咗法國旅行,估唔到曉曉搶閘出世,佢哋一知道喜訊都遠道安排咗驚喜禮物嚟俾我哋呢~而家花花雖然謝咗,但汽球同bear bear都裝飾緊曉曉嘅香閨corner㗎~螢幕快照 2015-04-18 上午9.47.30

開眼啦開眼啦﹗有咗眼睛靚少少~到咗第四第五日左右,雙眼皮開始出現添呢~

螢幕快照 2015-04-16 下午9.36.23

呢張係最醜樣嘅豬豬﹗﹗我成日話阿女唔好生得咁靚,費事有太多無謂男人追,真心愛你嘅soulmate一個就夠~不過⋯都唔好咁醜﹗哈~好在係表情問題啫~

螢幕快照 2015-04-18 上午9.47.40

好多小動靜,呢個手係睡寶寶手?佢仲經常有蘭花手同埋日本動漫美少女手(雙手托腮)仲有投降手~

講番呢幾日嘅經歷啦,由產房手術室出嚟就直接推番去產後病房了,因為未到探期,爸爸同婆婆都只可以係走廊見一見我同曉曉一眼咋~原本我抱住曉曉,但到咗產後房就要分開了,因為BB要先去沖個涼,之後要焗一焗(係暖箱休息一陣),所以到咗探期都未出得嚟,公公婆婆爸爸嚟到都只可以係育嬰室外面隔住玻璃望一陣咋~

因為我係開刀,所以頭一日都唔可以、亦冇能力落地,返到產後房連半身麻醉藥都未退晒,右腳變番自己的了,但左腳都仲係唔自然,好重又郁唔到,郁到少少腳趾自己又好似冇乜feel咁~可以准許有嘢落肚都算係咁,雖然只係流質餐,但有得飲奶飲水飲粥水我都高興得不得了~小便喉都仲駁住,因為半身麻醉藥未過,明明有小便喉應該幾唔舒服嘅都冇乜感覺~差啲嘅係自己唔係好換到衛生巾,要人幫一幫~未落床期間姑娘姐姐會幫我手湊住B先,就只係定時定候會抱過來俾我埋身餵奶~聽過嘅理論聽過嘅講座無數,我用口都識得話俾人聽點樣餵奶,但做起上嚟真係唔容易㗎,因為唔係淨係媽媽要點做點做,而BB都要配合,大家都冇經驗當然會好糟糕啦~阿B埋到嚟又瞓瞓瞓,醒嘅時候又唔識搵乳頭,含咗落去又唔識啜,做媽媽嘅怕佢食唔到梗係會徬徨啦~啲姑娘姐姐又忙,仲要night shift少啲人做嘢,唔係隨時可以幫到手~我好唔掂時有個姐姐行過,佢居然問我有咩可以幫到手,我話阿B唔啜,想佢幫我睇下出咗咩問題,佢答我嘅答案我諗我一世都會記得:「補奶粉我就幫到你,人奶我就真係幫唔到你~」咁你又問?﹗?﹗心裡面又想爆炸又想流淚,又話醫院support母乳餵哺,點解BB出世冇幾多個鐘頭就咁樣discourage人,仲要馬上提到補奶粉呢三個字﹗﹗好嬲~不過大概一個鐘左右之後有個姑娘主動走過嚟問我餵奶嘅情況,唔知係咪阿姐姐純粹口衰但都同我轉達呢?教咗之後都只係好少少咋,側躺住咁餵其實傷口都幾痛,後尾再夜少少頂得順我直情坐係度餵了~成唔成功?大家要留意我之後嘅blog,講餵人奶嘅辛酸史⋯>.<”

手術後12小時可以拔小便喉,流質食得不錯亦可以拎走鹽水,我自由得多了,但都仲未可以落床,一來痛啦,二來姑娘都話第一次落床一定要有人扶~到真正落床應該係手術之後嗰日,因為病房有人奶講座要聽,如果唔聽就要再下一日至有,早聽早啲用得著吧,痛都去啦~搞鬼嘅係,講座分兩part,part 1係出院講座,what?﹗我啱啱先做完手術就講出院,未免太快了吧?不過有啲順產第二胎阿太24小時就可以出院,對佢哋嚟講真係唔算快~part 2就講人奶,雖然內容同之前聽過嘅有好多相同(請參閱:7-2-2015:懷孕扎記29w0d.屯門醫院產前講座(6).嬰兒餵哺),但實踐後再聽真係多好多嘢學到㗎,有好多係咪叫「常識」呢?我冇經驗真係唔知﹗﹗要知BB食得夠唔夠,屎屎尿尿好重要,但我真係唔知有冇尿尿可以睇尿片嘅尿濕顯示囉~sorry,太無知了~:p而唔好俾阿B埋身太耐以免影響下一餐我都唔知~

而我正式落床之後,照顧曉曉嘅重任亦交番俾媽媽我了,其實覺得湊初生B有少少似玩「他媽哥池」,你要定時餵佢,同佢清除屎屎尿尿,見佢好安靜咁瞓覺又會好安心,冇乜太多mode,不過到BB越嚟越大個,應該會越嚟越複雜了~我諗最辛苦應該係因為同時要忍受住傷口痛,而病床附近嘅格局亦不太user friendly~床好高,冇得調較高度,捱住傷口痛上落床就好辛苦,而床同床之間嘅空間太少,BB床仔推唔到入嚟,所以下下都要行去床尾去睇BB,而窄窄嘅空間只放到一張椅,坐係度餵奶都好似會郁到隔離床咁~餵飽飽阿B,放低係小床,我好不容易上番張大床,好不容易瞓低⋯「哇~」一聲,又要再重覆呢個process,有時要三次丫﹗﹗另外就唔係好瞓到覺囉,即使自己阿B唔喊,同一個cubicle有六個阿太,佢哋啲阿B喊你一樣瞓唔到,而且此起彼落,又或者嚟個大合奏﹗S醫生嚟探我時,帶嚟「產後房必備孖寶」送俾我,係優質嘅Muji眼罩同埋耳塞﹗眼罩真係好有用丫,因為夜晚都唔熄燈,而產後房媽咪要趁任何機會嚟瞓瞓瞓,所以基本上我個眼鏡同眼罩係交替頻繁使用~耳塞我就冇用了,雖然唔想聽到其他嘅嘈吵聲,但我都要聽到自己個B嘅喊聲嘛~

慢慢傷口少啲痛,又round the clock食住Voltaren嚟止痛,我動作都開始靈活少少,行得快啲啲~飲食方面手術後嗰日已經轉做粥餐then正餐,食多啲有氣力啲﹗而day 2嘅血色素亦唔錯,我Hb只係由12.0跌到11.5咋~但係那管自己感覺有幾良好,規定開刀生B最快都要day 3至走得,冇辦法啦~之後嗰日再聽多一個講座,係物理治療師講產後運動,因為唔係compulsory,所以參加嘅人少好多咯~我哋啲開刀太都唔係好follow到治療師嘅動作⋯>.<”

講起幾時出院呢個問題,我自己就想快啲,不過另一方面我都想阿B安全晒至出院嘅,怕兩樣嘢囉,怕佢黃,又怕佢輕得太多囉(唔駛怕,後尾要發生都會發生⋯),好在day 3我哋兩個都順利一齊返屋企啦~

接住落嚟我會繼續打blog blog,大家留下言支持下我吧~:p希望好快又再有新blog同大家見面~

前往其他新手媽媽blog

Comments

comments