8-4-2015:懷孕扎記37w4d The End + 新手媽媽序章.曉曉出生了﹗

啱啱至大鑼大鼓咁慶祝BB滿37週足月隨時可以出世,我哋實在估唔到真係快到37w4d佢就會嚟到呢個世界﹗﹗

螢幕快照 2015-04-12 下午12.36.38

我哋嘅女女--邱曉--Regina--出世了﹗

因為有流啡流粉紅,所以入院,開頭諗住可能係見紅但未有作動,斷估做做檢查,瞓一晚可能第二日都可以出院等,所以連走佬袋都冇帶去,只帶咗少少日用品就去醫院~第二朝巡房醫生檢查覺得似係流血多過見紅,而且又冇明確原因知道點解流血,最擔心係微量胎盤出血超聲波照唔到,如果胎盤出血的話對BB有危險,所以既然足月了,認為早啲出世會安全啲,但子宮頸又未成熟,催生的話失敗嘅機會好大,所以建議緊急開刀,俾BB出世﹗我一下子都好難接受呢,估唔到幾個鐘之後就會同呢個小生命見面,另一方面都滿意嘅,因為呢排都心裡唔太安穩,怕臨到尾會有咩問題,加上早幾日月山金弓土咗個港台節目,蒙嘉慧飾演婦產科醫生,故事裡面其中一個case係胎死腹中,我睇電視到喊添,心裡面更加忐忑不安,所以BB早啲出世都係好事~

之後一連串東東好忙了,禁食、抽血、吊鹽水、連續監測BB心跳、簽手術同意書、見麻醉科醫生、姐姐來同我換衫剃毛執行李⋯除咗好好同老公電話上解釋狀況之外,都未能好好同爸媽講,send個message俾佢哋都分開幾次~最後八點食過醫院早餐,即是我最早下晝兩點就可以做手術了,好快丫~除咗同朋友message下傾訴之外,要玩下Soda Crush紓緩一下醫張情緒~說時遲那時快,毫無先兆之下聽到出面姐姐講起我個床號,馬上就有車嚟接我去手術室了,我只趕得及怱怱send個message俾老公話我出發了~

今次被推去手術室時嘅心情同上次大大唔同呢,上次小產時去做刮宮手術,瞓係輪床上望住郁嘅天花板,難過得流眼淚,今次就集緊張興奮於一身,因為出嚟嘅時候我人生就有好大變化了,我會有個女女,我會成為媽媽,呢個係一生一世嘅轉變啊~手術之前好在有媽咪同我祈一祈禱,多咗個支持﹗﹗

開刀生BB嘅手術做學生時、做houseman時就見得多、幫得多,但自己成為枱上面嗰個都係第一次,睇嘢嘅角度唔同,感受當然唔同啦~我諗除咗阿B出世之外,感覺最神奇嘅其中一樣經歷應該係半身麻醉,以前同病人講嘅經典句子就係「你會有拉拉扯扯嘅感覺但係唔痛囉」,趁而家都仲記得(打blog呢一刻BB day 6了)就記低我嘅真實感覺~半身麻醉係要係脊椎中間打入麻醉藥,等肚子到下半身嘅痛感消失,從而可以係病人清醒情況之下做手術,多數係婦科或者骨科手術比較常見吧~打局部麻醉藥時就好小事啦,之後入針入去脊椎都唔係點痛喎,而醫生注射麻醉藥入去時有種好脹好脹嘅感覺係背部裡面擴散,慢慢延伸到腿部,當中有一下閃電嘅感覺係腿上,醫生話係正常嘅,接住落嚟佢哋都未幫我攤番平身體,已經開始覺得對腳唔係我嘅了,好沉好沉又冇感覺又郁唔到,醫生同冰凍嘅液體spray嚟同我測試成效,真係好得喎~手術開始﹗開始之後我望到嘅就只有吊係前面嘅藍色消毒布,手術做緊咩步驟就唔知,但可以由聲音(儀器碰撞)同氣味(diathermy止血的bbq味)估下去到邊~我覺得唔係拉拉扯扯嘅感覺,反而係似著住好厚好厚嘅衫加蓋上好厚好厚嘅被,然後有人係你身上面放嘢,又拎起上嚟,又放嘢咁,真係零痛﹗﹗直至到「出仔」前,麻醉科醫生同我講嚟緊有少少唔舒服,因為幫BB出嚟要用力係子宮頂按壓,呢個時候我覺得好似坐係一隻小舟上面大大地被搖晃,搖咗好多下之後突然聽到「哇~~哇~~哇~~」嘅喊聲,BB出世了﹗﹗雖然未見到樣子,但感覺好真實,遺憾老公唔係身邊一齊經歷,但我眼角都有少少濕濕地了~BB初步檢查之後,護士包好佢帶佢哋我頭邊俾我望下,哇,好皺呀,但仲係暖笠笠濕濕地的,姑娘俾佢錫錫我,原來BB係2015年4月8日下午3:05出世,體重2.9kg,要記實呢啲資料㗎~接住落嚟就係埋尾了,我個心已經飛咗去BB度,好想同佢更親密更長嘅接觸呢~手術順利完成,好多謝咁多位醫生姑娘手術室助理丫~~

我係recovery時問姑娘幾時可以餵人奶,好快佢就帶咗BB俾我抱抱,skin-to-skin contact同埋開始餵奶了,姑娘都好有心機教我呢~醒起想打個電話俾係外面等嘅老公同媽咪,要將喜訊講俾佢哋聽丫﹗媽咪好驚訝30年後嘅今日原來咁早就會開始俾產婦餵人奶呢~由手術室推番去產後房嘅一段路,BB第一次同爸爸、同婆婆短暫地見面了,媽咪話day興奮開心嘅笑容係由個心發出嚟呢~ 🙂

接住落嚟嘅經歷我會再打係之後嘅blog,希望可以記低呢啲人生咁重要嘅moment,將來自己、俾女女重溫應該都會笑咪咪~:D

前往其他懷孕扎記blog

前往其他新手媽媽blog

Comments

comments

2 關於 “8-4-2015:懷孕扎記37w4d The End + 新手媽媽序章.曉曉出生了﹗” 的評論

  1. 我都有睇到港台個節目,我都睇到眼濕濕:p

    跟住睇曉曉的出生,感受到day由心發出的興奮開心,我又眼濕濕了~
    為你們高興,一家三口加油喔~~~

    • 個節目都拍得幾真實,而且感同身受,眼淚就不受控制⋯
      Mandy姨姨快啲嚟探我哋啦~
      大家加油﹗

發表迴響

你的電子郵件位址並不會被公開。 必要欄位標記為 *