睇番上一次嘅濕地公園blog，原來已經係2007年時嘅事lu(請參閱：3-2-2007：濕地公園)，好似中間我哋都冇嚟過，所以有八年冇嚟過啦～適逢復活節連續五日假期，不如搵地方行下啦，但個肚又大大時唔好去咁遠咁多人嘅地方了，近近地嘅濕地公園剛好﹗又可以親親大自然～
一大早食完早餐就過去啦，搭西鐵再轉輕鐵都好方便～我哋先同黑臉琵鷺雕塑影張相先～
仲有呱呱～
正門～我哋入場時都係十點幾，人暫時都唔係好多～
啱啱上晝十一點有個導賞團，全程一個半鐘，會帶大家參觀大半個濕地公園，就join下啦﹗有三個導賞員，兩個「姐姐」一個「哥哥」(from細路嘅角度:p)，帶我哋睇唔同嘅動物、植物、生態～我哋一團25人，有好多細路仔，令問答環節更熱鬧，氣氛亦更活潑～
我哋由遊客中心出發，先去探下貝貝，不經不覺貝貝已經被發現十幾年了，佢係2003年時被發現，2006年搬嚟濕地公園嘅～而家有成兩三米長，真係嚇死人﹗導賞團幾好嘅係，會將教育融入講解之中，講起貝貝時就教小朋友養動物前要三思，要作好心理上同資料上嘅準備，如果好似養貝貝咁中途放生搞到咁大件事就好麻煩又好危險了～
又介紹下遊客中心嘅環保建築，外牆嘅攀藤植物不單單為咗美觀，而且有散熱功能，相信大人們都會知道，但我唔知嘅係，原來到咗冬天啲葉又會自然脫落，吸收多啲太陽嘅熱能～
開始行入大自然了﹗有個小河流生態，上游嘅水急，下游嘅水慢，各種當中生活嘅動物都有佢哋適應嘅方法，上游嘅龜有扁平嘅殻，冇咁容易俾水沖走，而兩棲類(一日後已經唔記得叫咩名了⋯)嘅手腳亦有大吸盤﹗到下游就水流慢，周邊可以開墾成為水田，濕地公園裡面仲咗啲米添呢～另外又介紹咗啲有特色嘅生物，好似豬籠草同埋福壽螺，我諗以前都有聽過，但恐怕又係唔記得了，今次趁仲記得時寫低佢先～豬籠草識食蚊食小昆蟲就好多人都知，一直以為係好似卡通入面嘅食人花咁樣「張大口」食入去，原來係個「桶」入面有啲黏液，吸引咗小昆蟲入去之後就浸死佢哋，慢慢腐化後就可以吸收佢哋嘅營養，因為豬籠草自己嘅葉都可以做光合作用，足以維持需要嘅營養，導賞員形容嘅小昆蟲只係佢哋嘅「補品」咋～至於福壽螺嘛，個名好似好有福氣咁，原來佢哋係香港係邪惡嘅角色嚟㗎﹗其實動物本身冇所謂邪唔邪惡，但因為佢哋係人類由南美帶返嚟嘅外來物種，係香港冇天敵，所以可以瘋狂繁殖，瘋狂咁侵佔大地，如果係水上嘅岩石上見到粉紅色好似香口膠咁嘅一pat嘢黏係上面，嗰啲就係福壽螺嘅卵喇，原來佢哋嘅卵一定要係乾身嘅環境先生存到，一落水就會死，所以要盡量減少福壽螺過分繁殖，保育人員會將佢哋啲卵整入水，不過呢個動作都不太有效，因為清理冇幾耐，好生養嘅福壽螺又會生好多好多卵出來了～所以人類真係唔好隨便將啲動植物由世界各地帶來帶去丫～
下一站係演替之路，講池塘植物點樣一步步變成乾地植物，當中最吸引我哋嘅，莫過於睡蓮了～
而家正值睡蓮盛放嘅季節呢，橙紅色的、紫藍色的都盛放得好靚﹗我哋成日搞亂蓮同埋荷，原來係睇葉子嚟分﹗蓮嘅葉係食鬼形狀，圓形之中有個缺口(同團嘅小朋友同我哋有generation gap，講起食鬼佢哋充滿問號，要變成話「pizza拎走咗一片」至明白^^”)，而荷就有原整嘅圓形，蓮嘅葉子浮係水面，荷嘅葉子就可以撐係水上面空間～所以上次去北京圓明園嗰啲係荷而唔係蓮丫(請參閱：2-6-2014：三十登長城day 4(part 1)．四爺的圓明園)﹗
到咗紅樹林步道入口個導圓團就解散了～都好滿意丫，學到好多新知識～因為太留心聽講，我又要趁機會坐下休息，太忙碌了，冇乜點影相添～入到去到紅樹林，我哋都成功見到招潮蟹同埋彈塗魚丫﹗
本來諗住返去遊客中心間大家樂食lunch，嗰度有靚靚濕地景觀，但人開始多得不得了，所以都唔去睇展館了，反正我而家帶住「肥佬嘅身軀」(1.56m有70kg﹗)又開始覺得累了，留下次再逛啦～我哋出番去銀座商場嗰邊食lunch同埋補水丫﹗(有個大缺點要report番俾濕地公園知丫，我哋一大早十點幾去到，遊客中心所有嘅飲品自動販賣機都全部賣光光，好在帶咗一樽水啱啱夠我哋兩個飲，再留耐啲都唔得了～)
香港濕地公園網頁：
http://www.wetlandpark.gov.hk/