30-3-2015:懷孕扎記36w2d.乙型鏈球菌篩檢

到咗做乙型鏈球菌篩檢,亦意味住越嚟越接近生產嘅日子啦,因為呢個檢查係for懷孕35-37週嘅孕婦的,檢測到有帶菌的話可以分娩時注射抗生素,減低初生BB感染嘅機會~之前聽產前講座好似話係近呢幾年先至開始人人篩查的,都好事丫,因為乙型鏈球菌可以引起BB嚴重感染,好似肺炎或腦膜炎等,如果預防得到就好好多咯~

今日去檢查其實過程好簡單,姑娘要take兩個swab,一個lower vaginal swab(低陰道樣本),一個rectal swab(直腸樣本),幾分鐘內就完成﹗始終係人生第一次做呢個檢查,都想記錄低佢~其實LVS感覺唔太差,始終婦科檢查放鴨嘴鉗又試過,經陰道婦科超聲波又試過,細咁多嘅取樣本棒棒實在不算甚麼,不過要係入面撩一陣又係我冇預計到嘅,好在姑娘好溫柔咁樣用聲音安慰+鼓勵,好快就完成﹗反而rectal swab我印象深刻好多,姿勢就係採取平時我哋幫病人做探肛門嘅「側身躺下蝦米姿勢」,而支swab的確比平時我哋做PR嘅手指或proctoscope都真係細好多,但嗰種感覺真係不太舒服,果然窄窄嘅肛門天生只係適合俾軟軟嘅便便經過,靠住大大深呼吸至捱過嗰十幾廿秒(大約咋,我都冇心情count⋯),檢查完之後肛門嘅感覺都持續好一陣子,直至搭lift時都尤有餘悸⋯(會唔會誇張咗少少)差啲唔記得出lift⋯:p跟住我諗到嘅係,平時同patient做完PR佢哋係咪都沉醉係身體殘餘嘅感覺上而唔太清醒呢?﹗我馬上同佢哋講探肛門結果、痔瘡治療等等會唔會左耳入右耳出?﹗我第一次考慮呢件事情⋯平時為咗安撫病人,都係同佢哋講「檢查唔痛,係少少唔舒服咋」,但似乎都幾唔舒服⋯^^”以後要更體貼病人了~

姑娘話報告起碼4-5日出,希望我冇菌菌啦,不過好在而家都有預防BB感染嘅方法,而且即使媽媽有帶菌,都係100至200個帶菌媽媽之中有一個B會感染啫~

衛生署關於預防新生兒乙型鏈球菌感染網頁:

http://www.fhs.gov.hk/tc_chi/health_info/woman/478.html

前往其他懷孕扎記blog

Comments

comments

在《30-3-2015:懷孕扎記36w2d.乙型鏈球菌篩檢》中有 2 則留言

  1. 自己或親人有相類似的經驗,的確作為醫生的,對安撫病患會有更體貼的話語。好的牙醫尤其如是,可預先告知可能的反應,因為在口腔的檢查與手術等,感覺都好震撼。

    • 唔一定係咩大手術咩大事至有幫助,小至吊鹽水,未試過都唔知道都幾唔舒服~試過真係會更體貼病人~

wuchihung 發表迴響 取消回覆

你的電子郵件位址並不會被公開。 必要欄位標記為 *