說來慚愧，之前有一篇blog叫做超級大掃除(請參閱：16-11-2014：懷孕扎記17w1d．超級大掃除)，嗰次好有決心咁樣執執執嘢，丟掉咗好多嘢，屋企空間多咗好多，為咗有位置添置BB嘅用品，打篇blog改咗個不知羞恥嘅標題⋯^^”其實嗰次只算係執屋，但並冇深層清潔，屋企都仲係好污糟～到咗34週尾，仲有五個星期就到預產期，即是仲有兩個星期BB就37週足月隨時可以出世，我諗我哋要作最後階段嘅預備了⋯

而家大住個肚我都有啲力不從心啦，而且打掃都真係從來唔係我嘅強項(可能係懶，被爸媽寵慣)，所以今次決定搵專家幫手解決﹗其實睇番17週嗰篇blog，嗰陣都有呢個諗法，到而家先請佢哋嚟都啱嘅，太早清潔又會污糟番晒，我諗而家差不多了～

今次上網search「家務助理」就搵到長者安居協會屬下機構管家易服務，服務範疇、登記預約及收費都一目了然，而且除咗有恒常家務助理服務之外，有一項更啱我哋－－四季大掃除服務～我哋呢啲千年污漬真係唔係好見得人呢⋯(繼續慚愧中⋯)400呎以上單位，管家易建議請兩位家務助理一齊做四小時，收費會比一般家居清潔服務貴啲，我覺得啱嘅，辛苦咁多喎～好簡單上網填咗form，好快就有職員電話聯絡confirm資料，接住落嚟e-mail會收到帳單，可以上網用信用卡付款或者去便利店交都得，服務前一日兩位家務助理再打電話嚟確認，感覺專業又可靠～

其實而家兩位家務助理係度努力工作中，佢哋見到我大住個肚吧，不住叫我唔好行嚟行去，怕啲水呀雜物會絆倒我，所以我咪坐係度打blog blog囉，佢哋暫時工作咗一個鐘，已經見到個屋企大大地唔同咗了﹗勁﹗廚房隻窗從來未試過咁明亮，抽油煙機亦閃令令，浴室嗰位嘅工作進度我就睇唔到住，但我都充滿信心丫﹗所以專家即是專家，再配備合適嘅用品(我從來唔知道橙色威猛先生好用過白色裝，家居亦冇用漂白水清潔嘅經驗～)，就可以發揮佢哋方面嘅能力﹗唔該晒你哋丫～我諗到咗37週左右day就可以砌埋張BB床，作最後衝刺準備了﹗

管家易家務清潔服務網頁：

http://www.ezhome.com.hk/index.php?option=com_content&view=section&id=4&Itemid=145&lang=tc

前往其他懷孕扎記blog

Comments

comments