15-3-2015:懷孕扎記34w1d.腰背痛的拯救隊孖寶

本身我條腰都差差地,如果唔係都唔會大學時join咗一個research做研究對象,去俾人照下磁力共振同埋抽下血咁啦~不過後來改善咗坐姿同埋多啲運動之後,那管係GOPC工作要坐好多個鐘頭,其實呢個問題已經消失咗好耐~直至到BB呱越來越大,呢個腰背痛「老朋友」又返嚟搵我﹗

之前嗰一兩個月都唔太嚴重,通常都係練歌要坐係個琴前太耐or坐巴士大半個鐘唔郁得至會辛苦,一個星期一次嘅瑜伽班(請參閱:3-12-2014:懷孕扎記19w4d.孕婦瑜伽@香港瑜伽舍)同埋兩個星期一次嘅孕婦按摩(請參閱:19-11-2014:懷孕扎記17w4d.纖與美孕婦按摩)已經可以安撫到我~但呢兩個星期越來越嚴重,老公係我旁邊見我郁身郁勢又面容扭曲時都會主動伸隻手幫我按下個背,直至到達臨界點--今日去咗大會堂睇兩個半鐘頭嘅芭蕾舞演出睡美人,實在太辛苦了,乜姿勢都唔舒服,坐係度又唔可以伸展,向前彎腰個肚又頂住⋯救救我丫~螢幕快照 2015-03-16 下午4.50.52

好在呢個世界上有呢項偉大發明--托腹帶﹗﹗之前同同事傾開佢哋都叫我買,但諗住仲有冇幾耐時間(冇錯,距離預產期只有五個幾星期,而距離足月BB隨時可以出世只有兩個幾星期﹗),忍得就慳番啲$$,一直拖住拖住~今日我決定要大開「殺(shop)」戒了﹗係屯門令我諗到有得賣嘅就只有玩具反斗城入面嘅010 Maternity同埋Aeon嘅孕婦用品部,我去咗010,同sales講我都用得冇幾耐,佢就介紹咗呢款比較平嘅俾我~一試上身,wow,馬上天堂與地獄嘅分別﹗﹗腰即刻support起,即刻冇咁攰~俾錢後就直情著住係身走了,day話我行路即刻行得快咗﹗真係由心而發嘅讚歎,呢啲係全physical嘅方法,冇藥物冇化學成份,居然有咁大分別,多謝發明嘅人~

不過之前聽講座都知道,托腹帶唔好戴太長時間,一來會weaken咗自己肌肉嘅support,而且太緊的話又會阻礙BB生長,所以返屋企就除低落嚟先,諗住瞓下伸下條腰,但都仲係麻麻地⋯day提議搵番佢出嚟:螢幕快照 2015-03-16 下午4.50.57

呢個OGAWA嘅Mobile Shiatsu AC按摩器好耐之前就買咗了,不過冇用一排放咗入房~買時同Mobile Seat XE一齊買,安裝係頸部位置~今次拎番出嚟單獨使用按下腰背好舒服丫,又暖暖地,又幫我按鬆最繃緊嘅兩條肌肉,我諗直至生呢段時間佢都stand by係度陪住我啦~

按一輪,鬆一下,出門口前再「束上腰」,行遠少少都冇有怕﹗

010孕婦裝嘅網址:

http://010maternity.com/hk/

OGAWA網站:

http://www.ogawaworld.com.hk/main.php?p=home

前往其他懷孕扎記blog

Comments

comments

在《15-3-2015:懷孕扎記34w1d.腰背痛的拯救隊孖寶》中有 6 則留言

    • 我諗應該係咁上下feel,不過肚肚嘅沉重感消失係你難以想像的吧~

Rita 發表迴響 取消回覆

你的電子郵件位址並不會被公開。 必要欄位標記為 *