BB車都係BB展買嘅(請參閱：1-2-2015：懷孕扎記28w1d．興奮買買買@BB春季購物節)﹗都係老公好記性，之前係一田百貨見到覺得唔錯嘅BB車， 當時覺得時間仲早，未即刻決定買住，同埋諗住等埋BB展睇下會唔會抵啲，去到BB展佢又居然認得出同一部喎，仲要平成幾百蚊，咁就啱啦，買﹗
其實我媽咪之前講過佢唔太贊成買BB車，我同家姐兩個其實細個時都仲未坐過BB車的，早期時就手抱，到識得行路就盡早俾我哋自己行～媽咪覺得BB瞓係車仔上面成日曬住對眼睛唔好，另外又坐慣車仔唔肯落地行～不過我諗始終都有一部方便啲嘅，唔好濫用就得啦，如果返到教會、去酒樓食飯等情況BB要瞓的話有架車仔好似方便啲，遲啲我去買餸甚麼都要帶住佢，如果抱住的話又唔係點買得到多嘢，都係有架車好～BB有得歲半，行得穩陣時就要開始戒車車啦，我都希望訓練佢行路叻叻，因為要跟住我去旅行嘛～
家姐之前問我睇中嗰架BB車係咩顏色，我都啞咗答唔到，因為外觀顏色唔係我哋重點吧～睇好多購買嬰兒用品嘅文章呀網頁呀嗰啲都話，一定要係最常用嗰個人(即是我啦)覺得啱用至得﹗既然唔會好長途咁推BB車，又唔駛太舒服嘅，避震甚麼當然好，但如果換成大轆粗車框變得好重的話又好似唔係好值得⋯所以我哋挑選嘅目標係要「穩陣得嚟盡量要輕身」﹗呢部Aprica BB車都算係日本名牌子啦，好似話連日本皇室都用佢哋出嘅車仔喎～而且最重要只有3.6kg，我單手拎起上落樓梯都好容易，單手開合時都唔會太重，我估自己一個人帶BB出街時冇咁狼狽吧～不過輕身真係輕身，BB細個時我諗都唔太適合掛東西係個手柄度，怕會反車，等BB有啲重量時先安裝掛鉤吧～
既然咁輕，梗係車仔細細、車轆細細啦～應該係冇豪華大車坐得咁舒服啦，BB，到識行路就盡快脫離車仔啦～
我覺得神奇嘅係，以前見街上啲BB車真係分唔出邊部打邊部，但自己買咗之後，即使未開始用都已經係街上認得出相同嘅款式，行行下街會捉住老公：「我哋嗰部丫～」
聽落就好似幾好咁，不過要用落至知好唔好囉，希望BB出世之後我唔會忙到打唔到blog blog啦，大家要留意我遲啲寫嘅用後感丫～
Aprica Karoon嬰兒手推車：
http://www.aprica.com.tw/products/babycar/typea/karoon.html
前往其他懷孕扎記blog