之前參加過其他奶粉媽媽會嘅產前講座(請參閱：10-1-2015：懷孕扎記25w0d．美素佳兒講座滿載而歸)感覺良好，所以今次美贊臣媽媽會send短信嚟邀請參加產前講座，見時間地點題目都ok，所以又join咗～可惜今次令人失望呢～第時如果再有機會都要考慮下了～

地點位於柯士甸道嘅童軍中心，其實都幾方便，由佐敦或柯士甸站行過去都好近～不過時間麻煩少少啦，係平日嘅晚上七點半，day放工趕過嚟都食唔切飯了，要餓住肚子辛苦了﹗上次美素佳兒係weekend嘅下晝當然方便在職人士多啲啦～場地方面冇人哋酒店宴會廳咁靚都唔太重要，坐得都算舒服，不過女廁四格壞咗三格要排隊等好耐又真係差咗少少～

我哋早咗少少到，睇下免費派發嘅「健康創富」雜誌，又睇下大螢光幕播嘅短片，感覺已經比上次差咗一截咯～雜誌就算數啦，本身對呢啲興趣一般，我哋結果都冇拎到返屋企，短片嘛，可能真係要target唔同人士嘅需要～上次美素佳兒真係走「情感路線」，有講下胎兒發展嘅超聲皮片段，自己奶粉嘅廣告片亦唔講咩成份咩成份，而係focus係親子關係同小朋友嘅自由成長歷程等等，睇得人笑咪咪又會眼濕濕～但呢個就走「精英路線」，講甚麼成份會令BB眼仔發展得好啲、點樣聰明啲、點樣領先人一步等等～我就唔係好信呢啲，反正所有配方奶粉都係扮人奶之嘛，餵人奶咪ok囉，而且BB聰唔聰明到頭來都係取決於爸爸媽媽嘅gene同埋對佢哋嘅培育～呢啲片真係不是太得我歡心⋯

有趣得嚟又有啲恐怖嘅係，會場放咗好多個一模一樣嘅(假)BB﹗﹗嚇死人了﹗﹗你睇，公仔都咁恐怖，如果未來真係有複製人真係唔得掂﹗﹗點解咁多baby公仔？因為今日第二個topic係嬰兒按摩，等大家有啲「實習機會」嘛～

呢個假BB就可以抱得好輕鬆﹗哈哈～只有頭同埋手手腳腳係硬的，其他都係軟軟嘅cushion，又冇乜重量又唔怕會整親佢～呢兩個鐘頭嘅「babysitting」好簡單﹗:p

講座開始了，上半部份係由婦產科醫生主講，講題係「輕鬆分娩」～睇個topic我以為係講呼吸方法、止痛方法、用力方法、坐波波等等⋯點知佢第二張slide已經係點樣揀開刀定順產﹗﹗吓？﹗輕鬆嘅意思居然係開刀？﹗感覺又同我嘅標準太唔同了～我覺得生產係自然嘅事情，唔應該由產婦去選擇，除非有醫學上嘅需要，即對BB或媽媽有威脅，先應該由醫生決定去開刀囉～我覺得內容有少少引導性囉，所以唔－－鍾－－意－－﹗﹗﹗好似佢show咗啲開過刀，好細嘅疤痕嘅照片，另一方面又show剪過會陰傷口嘅陰道同埋未剪過嘅陰道嘅分別，咁人哋梗係怕怕陰道產啦～另外又show陰道產BB擠長咗嘅頭仔，又show開刀產BB圓圓嘅頭仔，咁即係變相鼓勵人開刀咁講啦～又描述有啲產婦要痛幾十個鐘頭結果要開刀嘅例子等等⋯咁即是要嚇啲本身已經有啲怕怕嘅準媽媽？﹗聽咗佢講有成個鐘，最有用嘅可能只有一句，就係2nd stage要push嘅時候，push完唔好透番啖大氣，因為BB會縮番上去，所以要輕輕呼同埋盡快再push，過咗個窄位就好好多～其他嘛，都係聽得嬲嘅居多﹗﹗

下半部份由註冊嬰兒按摩教練主講，其實我去上孕婦瑜伽嘅miss都係嬰兒按摩教練，所以之前都聽佢講過少少，而佢都有開班，而且係爸爸媽媽帶埋自己baby去上堂嘅實用班，本身都有考慮BB出世之後去上下，今次既然有得聽又不妨聽下啦～嬰兒按摩嘅用處我信嘅就一半半啦，我絕對認同嘅包括增強親子關係，BB入睡容易啲等等，半信半疑嘅就係甚麼按胸部會呼吸好啲、按手手腳腳會反應靈敏啲之類～anyway，學多樣嘢我又覺得冇壞嘅～教練都講得幾好，又有用BB公仔示範，而按摩肚仔部份甚至邀請咗兩個準爸爸上台學習添～不過講座開始遲咗，所以佢講得都有少少趕呢～遲啲BB出世我哋考慮下要唔要去瑜伽miss嗰度上一堂啦～

講座另一個亮點當然唔少得禮物啦，呢方面我嘅讚賞都唔會吝嗇嘅，heehee～奶粉袋都幾輕巧又有分隔，不過一拎出嚟人哋就知係美贊臣贈品，所以都要改裝下至用～裡面有張絨絨被仔都幾靚，又有件初生和尚袍質地幾舒服，同款嘅手套仔配襯番，仲有一條紗巾～另外又有一盒aqueous cream，係藥房買都要$30㗎～仲有一條尿片sample同埋一包濕紙巾﹗禮物都算實用～其實最名貴嗰樣禮物唔係度，就係媽媽奶粉一罐﹗因為上次惠氏媽媽會送嗰罐我都冇乜點飲(請參閱：7-1-2015：懷孕扎記24w4d．媽媽會厚禮)，去BB展申請做荷花VIP再送多罐惠氏我都冇要到(請參閱：1-2-2015：懷孕扎記28w1d．興奮買買買@BB春季購物節)，今次都無謂帶番屋企了，都只會係浪費，所以好唔俾面咁樣放低咗罐奶粉囉～

仲有一樣唔合我心意嘅就係份問卷，內容非常「政治不正確」，其中一條問題係話，母乳係嬰兒最佳食物，咁你打算餵哺母乳定係配方奶粉呢？仲要你簡述原因﹗﹗咁原因你都自己講咗咯～另外續問係，如果餵喂母乳，打算餵幾耐呢，重點係，幾個choice分別係一個月、兩個月、三個月同埋其他，而家明知世界衛生組織同埋任何一個權威團體都係建議餵哺全母乳到六個月大，你居然問啲咁嘅問題，分明係拆自己招牌囉～份問卷design得唔夠醒目囉～咁或者，可能只有我呢啲咁sensitive同埋咁撐母乳嘅人先至會咁大反應嘅，但感覺都係唔夠pro～美素佳兒嗰次真係從來冇暗示你俾初生嬰兒食配方奶粉，反而係不斷提及母乳好好，而佢promote嘅只係叫哺乳媽媽飲媽媽奶啫，感覺品牌形象好好多，反而我會考慮要唔要幫襯佢買奶米糊之類⋯

所以奶粉商嘅講座都真係有高下之分，呢個唔單單係成本嘅問題，而係用心程度，當然佢哋市場策略上都可能有唔同concern係我哋行外人唔明白㗎啦～總之呢，都係唔好單單貪禮物而去參加呢啲講座，去之前都係聽下人哋去過嘅口碑同埋經驗先，免得一肚子氣丫～

前往其他懷孕扎記blog

Comments

comments