到人哋開咗幕成兩個月我先第一次搭其實已經好遲，但話晒係我第一次搭，而且係對我人生之中其中一個重大意義嘅地方，點都記錄一下啦～
今日去開HKU附近探望啱啱生完baby嘅好朋友，與其搭小巴落山，不如散步過去香港大學站試試新嘢﹗由後山嘅入口行過嚟，我都係第一次由Graduate House嗰邊入HKU呢，好長嘅行人樓梯，綠蔭處處，雖然路有少少遠，但都行得舒服﹗嗰邊啲路其實本身都唔係好熟，但知道地鐵站係黃克競樓嗰邊，所以按方向前進就ok，行行下直情有港鐵標誌了～
說時遲那時快，已經到咗傳說中嘅電梯群，可以高速落到地底嘅車站～我正係度咕嚕究竟呢度係邊度之際，見到國殤之柱個頂頂係呢個平台嘅邊緣路咗出嚟～吓？乜原來係黃克競平台上面起咗整整新嘅一層樓呀？難怪唔係好認得行過嚟時條路啦，處處都充滿新鮮感～西港島線啱啱開幕時好似話啲電梯處理人流嘅速度唔係好support到，不過我今日搭車時係下晝三點左右，人好少，所以過程都好smooth～
落到電梯底部，行過去車站大堂嘅一段路，有好多HKU嘅歷史舊照片呢，令個車站添上特色～而且對新生、對遊客嚟講都係一個了解香港最耐歷史嘅一間大學嘅機會丫﹗睇下會唔會有我張相？﹗sorry，冇丫～
到此一遊﹗﹗
有咗地鐵真係方便咗好多呢，而且返HKU，由屯門出嚟的話，中環上嚟嘅小巴行般咸道轉嚟轉去又搭到想嘔，係西隧口等970巴士嘛，又時時爆滿飛站冇義氣～有咗地鐵，而家嘅師弟師妹返學就應該輕鬆得多了，不過幾時延長去到醫學院？