22-2-2015:童年經典回憶新作之STAND BY ME多啦A夢

作為超級叮噹fans嘅我,當然要趁農曆新年超旺檔期捧捧呢排熱爆嘅叮噹新電影啦~知道家姐姐夫打算大年初四去睇,不如一齊啦~雖然只係屯門嘅巴倫紐戲院,但早一日買飛我哋都要坐第四行丫﹗同過去呢一年睇嘅好幾套電影好唔同,今次特別多小朋友觀眾,有佢哋嘅笑聲,令年電影睇得更熱鬧呢~

56831420564837562

其實之前都冇睇定電影預告,但係門口等開場時睇睇簡介,吓,講叮噹要返回未來?咁傷感嘅題材會唔會唔啱農曆新年呀?咁樣做完呢齣會唔會等於以後冇得再做?

入場之後一幕一幕嘅情節令我釋懷~電影標榜新科技,人物用CG做,背景係用模型,總之像真度提高,總算係立題叮噹電影嘅第一次,令角色、情節更加活靈活現~不過嘛,原來內容係由叮噹嘅幾個經典短篇故事串連起來㗎,心水清嘅超級fans就會記得一個一個嘅片段,叮噹來到野比家(不過原著就冇設定強制程式逼叮噹幾時返回未來)、少年大雄意圖去未來救登山遇難嘅靜兒反而被照顧從而贏得美人歸、第六集單行本尾嘅「再見叮噹」同埋第七集單行本頭嘅「叮噹回來了」﹗見到「再見叮噹」嘅格局之後,我就唔擔心了,因為肯定接住落嚟係「叮噹回來了」﹗嗰個愚人節說謊藥水好似叫做「說謊707」?﹗

螢幕快照 2015-02-22 下午6.49.17

哈,原來記錯咗,check番漫畫香港釋本係「說謊800」至啱﹗

整體都好好睇丫,故事既然係舊嘅、係藤子.F.不二雄老師嘅舊作改編當然無可挑剔啦~而人物都整得好cute,多咗頭髮嘅小朋友們,增強咗質感嘅衣服、家具,營造女神氣質嘅靜兒嘅出場,靜兒去捉住飲咗乞人憎藥水嘅大雄隻手嘅愛情電影感覺,都係舊之中有新嘅好idea、好作品﹗

多謝你哋承傳藤子.F.不二雄老師鉅著嘅團隊﹗亦多謝林保全先生多年來為香港嘅叮噹配音,由童年開始陪伴我哋一眾八十後長大~

Comments

comments

在《22-2-2015:童年經典回憶新作之STAND BY ME多啦A夢》中有 4 則留言

  1. 我真係無你咁熟,雖然將「說謊800」記錯左為「說謊707」,但已經好勁﹗
    我最喜歡是那些佈景,立體感同空間感強左好多,DETAIL位亦多左好多,令大雄的家和附近周圍的環境有更強的真實感。不過,美中不足的是立體了的大雄好像跟漫畫看起來有點不一樣。
    唔知係咪因為這是已經睇過好多次既短篇結合的電影,所以我完全沒有催淚的感覺。

    • 幾個角色睇落都有少少唔同啦,表情可能太豐富,因為同印象中唔同,所以唔太習慣~
      係囉,我都奇怪有啲朋友話睇到喊咗半場,我明明都係睇戲易喊嘅人,可能因為劇情太熟了~

  2. 我終於睇咗,所以返轉頭睇你呢篇blog~

    終於有人明白我講嘅,第六卷尾、第七卷頭同電影的關係!!
    成日有人問我套戲講乜、係咪結局之類,唔熟呢兩卷的人真的不會明白!
    而我一下子講出期數,亦被老公說我”痴線架,咁都記得”

    雖然係舊故事,但我覺得串連得好好,加插一啲漫畫無嘅片段亦令成件事整體、圓滿左~~總之睇完好開心吖~~~

    • 可以答:唔係大結局,係集合幾個短篇故事而成嘅長篇故事﹗
      我都一下子講出期數丫,所以「痴線」嘅人有兩個﹗哈哈~
      係呀,對我嚟講係笑咪咪多過催淚呢,可能因為好懷舊吧~

發表迴響

你的電子郵件位址並不會被公開。 必要欄位標記為 *