呢個情人節活動早係2014年尾時已經定落嚟啦，其實只係有一日隨便上網睇下Cityline有咩節目表演出售門券，就偶然發現呢個馬術大師賽嘅活動了﹗當時正式宣傳都未開始呢～相請不如偶遇，與其要大家諗爆頭去邊度慶祝，不如我哋兩個大鄉里出去見識下新事物啦～當時早早買飛仲有early bird優惠，而座位都好正呢～

馬術大師賽一連三日舉行，2月14日係第二日賽程，有下午場次同埋晚間場次，我哋嗰張門票係6:00pm至12:00am，吓？﹗咁長時間？﹗有冇比賽比咁耐？﹗開頭買飛時個網站都仲得好少資料，所以都懞查查，後尾先至陸續post出時間表同其他details～哦，與其話係觀賞一個體育比賽，更加貼切應該係一個社交活動﹗因為我哋門票包括嗰六個鐘頭，原來有馬術訓練demonstration、正式嘅大師賽之一嘅Gucci Gold Cup、馬術藝術表演，係主場館旁邊有個大嘅area叫做Prestige Village，有各個贊助商嘅booth，簡直就似個小市集，又有啲雕塑同展覽，又有餐廳酒吧，大開眼界呢，唔單單係一個體育比賽嚟㗎～而主場館嘅活動結束之後，仲有DJ打碟到午夜12點，夜鬼們可以繼續social～

我哋入場時六點半左右，馬術訓練嘅demonstration至啱啱開始，係主場館暫時入座率都仲好低咋～

有兩個年輕馬術運動員，由一個資深騎師帶住佢哋做啲練習，嗰個德國藉嘅老師之後都有參加Gucci Gold Cup呢～其實教兩個年輕人之餘，更加俾廣大市民觀眾認識多少少呢項冷門運動嘅知識～我哋兩個對於馬術比賽嘅知識，並非來自2008奧運，而係來自一套漫畫－－「白銀之匙」，主要內容講北海道嘅一間農業高中嘅學生生活，而嚟自札幌呢個大城市嘅主角就加入咗馬術部，佢喜歡嘅女孩子就係馬術部嘅主將，佢哋都會參加比賽㗎，而主角好多時騎嘅馬係栗子號，所以我同day觀賞比賽時都會提起漫畫內容同埋栗子號呢～

有別於武俠小說嘅觀念，即是由人去駕馭一匹馬，似乎馬術更加係講求人同馬嘅共同合作，要俾馬感覺安心，讓馬去發揮最大嘅potential～呢度放啲桿係地上，要馬跳過去，步伐要協調得嚟又要快都唔容易，馬馬又唔可以太緊張，雖然只係簡單嘅練習我哋都睇得好肉緊呢，冇kick到桿就覺得叻叻咯～

練習大概進行咗半個鐘，我哋觀眾要全體退席咯，點解？因為要預備Gucci Gold Cup嘅場地了﹗

所以我哋被趕咗出去Prestige Village～都好丫，周圍行下增廣見聞﹗中間有個練習場地，而四周就係之前提及過嘅商鋪、餐廳，甚至有kids club同埋美髮salon添﹗﹗

影張馬嘅雕塑先，到此一遊﹗

我都影咗一張，不過day嗰張好似match啲～我唔適合騎馬乎？

呢度show咗呢幾日嘅schedule，第二行寫咗星期六晚有Gucci Gold Cup了～其他活動就寫係最右邊，大家可以按興趣去參加﹗底部嘅圖像講解少少馬術比賽嘅basics俾大家認識認識～

我哋買咗少少零食，重新入座﹗原來Gucci Gold Cup有一位香港選手參賽，特區小旗係工作人員派俾我哋，等大家幫香港選手打下氣呢，雖然最終表演未如理想，但有香港人參加大師賽都好威水啦～

我哋重新入場時個場都未set好～原來每一個賽事嘅setting都完全唔同，而選手亦只能夠比賽前行落去一次視察場地，馬馬就唔可以視察了～欄嘅design除咗有各個贊助商嘅大logo之外，仲有好多香港特色呢，我哋見到相入面有龍舟，另外又有啲欄係搶包山同埋燒賣，啲馬會唔會俾佢哋吸引住唔專心？

另外啲花花草草亦係專登設置嚟distract啲馬的～

好喇，選手入場視察場地了﹗你會見到佢哋大跨步咁去量度距離呢，應該呢個時候已經開始制定比賽策略了～

兩個專業旁述同埋一個美女主持人亦落場順住賽道行一圈，介紹俾觀眾聽今個比賽嘅特別之處，螢光幕上面就顯示咗賽道，其實啲欄只有1234嘅number，選手要記住順序㗎～旁述介紹俾我哋聽各個欄嘅難度，例如4ABC就係三個欄嘅combo，個rhythm要掌握得好，5號欄有小水窪係底，馬可能會驚驚，另外又有個唔記得幾多號欄，佢係一個double欄，而兩支桿嘅高度係一樣的，即是馬馬係遠處會以為只有一支桿，呢個又要考起選手點樣同馬配合得好了﹗不過主持人講嘅幾個特別難關似乎選手們特別小心呢，馬有踢跌得多嘅反而係另外一啲欄呢～

好咯好咯，比賽開始lu～好搞笑，鼓掌歡呼都要提水嘅咩？

賽事係我之前諗唔到嘅緊張刺激，尤其係決勝局﹗賽事分開兩局，第一回合係排名爭取入決勝局，選手第一要少罰分，踢跌一個欄扣4分，馬匹不服從扣4分，超時又要扣分～第一回合28個選手之中，居然只有5個係0罰分呢，其他相同罰分嘅就要睇下完成速度快慢去爭取入圍咯～只有10隊可以入決賽咋～大家估唔到嘅係，首名入決賽嘅居然係一位18歲嘅妹妹，佢第一次參加大師級別嘅賽事咋～

觀賞賽事除咗睇選手、馬匹嘅表演，邊個快邊個慢，邊個贏邊個輸之外，觀賞馬嘅姿態亦係一大樂事，選手馬果然同平時見嘅馬唔一樣，好高大，身材好fit，有腰有肌肉，而且有經過打扮呢，毛色非常油潤有光澤，馬尾好順好有亮澤，鬃毛有啲仲梳咗小辮子添呢～有啲馬跑得好優雅，有啲又會好肥大好笨重，但呢個唔直接反映實力㗎喎～

經過首輪回合，進入決賽嘅10隊選手決定了﹗﹗我哋又要退席喇，工作人員又要再set新場地for決賽啦～

決賽嘅新場地欄嘅數目少啲，限時亦由之前嘅72秒縮短至54秒，應該除咗講求穩定性之外，更加講求速度，所以更加刺激呢～

而比賽之中亦有「寶座」，一、二、三位會隨時變動，要讓座俾新主人咯～坐係上面嘅「暫時領先選手」都會感覺危危乎吧～因為決賽出場次序係由初賽嘅第10名開始先，所以陸續出場嘅選手應該係越來越勁﹗

比賽結束，頒獎禮之前大會都繼續炒熱氣氛，由著住中國衫嘅鬼佬大派紀念cap帽俾大家，坐我哋前面帶住兩個小男孩嘅爸爸成功接到呢～仔仔一定好開心了﹗

比賽最後18歲妹妹得亞軍，而冠軍都係老練嘅選手，嚟自英國嘅John Whitaker得到呢，呢個大叔真係好勁，我賽後都忍唔住wiki一下佢，原來佢1955年生，即是今年生日就六字頭了，真係寶刀未老呢，而且國際賽事經驗豐富，而且家族都係馬術運動員呢，有好多個Whitaker都係唔同賽事競逐，好似今晚都仲有另一個Whitaker添～得獎嘅組別除咗人可以上台拎獎之外，佢嘅partner肥壯馬亦有得披上錦袍，一齊分享光榮﹗頭先我咪話唔可以以貌取馬嘅，老當益壯嘅Whitaker隻馬正正係馬腳好短身裁肥大跑起來呼呼呼的，但居然為主人奪冠，勁﹗

驚驗刺激嘅馬術大師賽之後，亦有柔和嘅一部份﹗

西班牙馬術藝術家Santi Serra帶同佢嘅兩隻寶貝馬同狗狗一齊嚟香港表演﹗

馬馬會跟從佢嘅指示，作出唔同動作，企高、伏低、轉身，馬馬幾乎以為自己係海獅了～

馬馬同狗狗都好聽話，但感覺唔太似馬戲團嘅絕對服從，更加似屋企嘅主人同狗狗嘅親密關係呢，伴隨柔揚悅耳嘅音樂同埋燈光，睇起嚟好賞心悅目呢～

完晒演出都十點幾啦，DJ打碟嘅party時間唔啱我哋兩個了，都係早啲返屋企咯，話晒路途遙遠﹗臨走見到呢個縮小號嘅障礙架，我叫day扮馬馬咁係前面跳，佢都係怕醜唔肯啦～

非常充實嘅一個晚上，呢個情人節好特別呢～豪華餐廳、名貴禮物都唔重要，兩個人開開心心一齊嘅時間就係最好了～

浪琴表馬術大師賽官方網站：

http://www.mastersgrandslam.com/en/longines_hong_kong_masters/home

John Whitaker官方網站：

http://www.johnwhitakerfanclub.co.uk/

Comments

comments