到咗最後一次產前講座啦，第七講我係上一個循環時已經上咗，如果大家有興趣想知多啲可以經呢篇blog底部條link去目錄度搵番﹗其實對於第五第六講我都特別有興趣，因為真係唔識湊baby呢～
關於嬰兒餵哺我都好sure會講餵人奶，以前medical student時都講好多關於餵人奶嘅東東，但主要講餵人奶好處呀、點樣餵呀、常見問題及處理等等，都係以醫生角度出發～但原來以媽媽角度出發都有好多其他考慮㗎，都係做咗準媽媽至知道，埋身餵嗰啲我唔太擔心唔明白(唔擔心唔明白並唔代表肯定做得到﹗﹗)，我比較關注要回任職場時泵奶嗰個問題，希望都會講下啦～
今次主講都係產後病房嘅助產士姑娘，其中一個上一堂有出現過啦～開場當然係講咗餵人奶對媽媽好處對BB好處對社會好處嗰啲先啦，當然我知道人奶嘅成份好有益，所有奶粉都只係模仿人奶啦，仲有甚麼甚麼促進親子感情，BB少病啲健康啲等等啦～其實我自己覺得餵人奶係大自然嘅定律，係本應如此嘅安排，所以準媽媽唔應該所謂「選擇餵人奶vs奶粉」，而應該「個個自然都餵人奶unless有其他特殊原因」，正如唔應該所謂「選擇順產vs開刀生BB」，而應該「個個都應該陰道產unless有其他特殊原因」～所以對於餵BB呱嘅方法我從來都冇考慮過，肯定係人奶了﹗而餵人奶對於我嚟講最大嘅好處，應該係衛生同埋簡單﹗:p平時煮飯我都好懶洗嘢，但初生BB咁fragile，樣樣都要消毒超乾淨，對我我呢個嗱渣人嚟講都有挑戰﹗餵人奶的話啲奶直接由我身上供應去BB個嘴，contamination嘅機會降到最低吧﹗﹗heehee～而我期望返part-time可以持續埋身餵奶，咁到咗半歲後加咗固體食物，我哋一家出動去旅行時咪可以帶少好多嘢囉～正﹗
除咗講好處甚麼嗰啲之外，當然有講餵人奶嘅方法啦，姿勢嗰啲以前student時代都有學過，不過我諗都係生咗之後實戰緊要啲﹗我同老公都一致認為側臥式恐怕唔適合我，因為我實會側臥側臥下就瞓著咗，太危險了～後來又講咗餵人奶嘅常見問題，好似谷奶呀、乳頭損呀、「唔夠奶」呀等等，呢啲以前都有聽過學過，而家叫做鞏固番知識啦﹗
今個講座對於我嚟講嘅新知識，其中一樣係極度強調嘅初乳，我明白初乳好有益，當然越早開始餵母乳越容易成功，呢個唔需要多講，不過我唔知嘅係，原來第三日開始谷奶之前，奶量其實好少，但重要嘅係－－唔駛怕BB唔夠食﹗﹗原來係媽媽肚入面時出生前已經儲定足夠嘅能量可以供應day 3谷奶前嘅使用，所以頭兩日BB得2-3次小便已經足夠，每次埋身餵可能只得幾毫升，但滴滴甘露滴滴精華，唔好睇小嗰幾毫升，媽媽最緊要聽姑娘講密密埋身餵就ok，時辰到奶量自然增加，good﹗咁樣好似放心多了～:D
另外一樣highlight就係徒手擠奶、按摩乳房嘅重要性，之前一向覺得，可以埋身餵梗係埋身餵啦，到咗返工梗係用電動奶泵啦，駛乜學徒手擠奶？又慢又累又辛苦﹗﹗原來徒手擠奶唔單單係擠嚟俾BB飲，有時係要用嚟解決問題的﹗﹗如果初期太谷奶，可以按鬆乳房乳暈，擠部份嘅奶出嚟，純紓緩媽媽不適的話可以discard咗啲奶，要俾BB飲的話就要用消毒器皿～而如果其中一邊乳頭損咗的話，媽媽可以繼續用另一邊埋身餵BB，但損嗰邊啲奶就要擠出來，呢個短時間嘅需要嚟講唔一定要出動電動泵咯～
後尾都有講少少泵奶，不過都係我本來知嘅東東呢，可能實質運作我到時要請教一樣做GOPD嘅同事咯～
呀，仲有一樣叫我impressed嘅，就係派發嘅小冊子，今次有好幾份，有啲係一般嘅資料性嘅、正正經經嘅小冊子，但其中一本係漫畫書﹗﹗由一個餵母乳媽媽親手繪製，非常吸引、非常繪形繪聲，好好睇，內容又好practical，主要講佢餵人奶嘅開心經驗同埋成功之道，我本來想post出來俾大家睇睇，但老公執咗屋之後唔知去咗邊，有機會再補番～
祝各位準媽媽餵人奶餵得開心、餵得成功﹗
前往其他懷孕扎記blog