29-1-2015:蠢蠢地的除塵小露寶ViRobi

早個星期同老公去逛實惠,主要係想買個櫃俾BB呱,櫃就都買到嘅,不過買多咗一件冇諗過嘅東東--螢幕快照 2015-01-28 上午11.45.35

就係佢﹗微力達Vileda出嘅自動除塵寶ViRobi﹗﹗有個小counter set咗係度做promotion,個姐姐特別賣力,尤其見到我大住個肚就更親切,因為佢女女都啱啱大緊肚~呢個ViRobi睇落個樣似係一般嘅自動吸塵機,其實冇咁高科技㗎,佢係「自動」,不過係「黏塵」而非「吸塵」,底部個黑網網貼上靜電除塵紙,你可以放佢每次30分鐘or兩個鐘係地度轉轉轉,佢就會周圍走黏黏黏,碰壁咪調轉行第二條路囉,理論上可以清潔成個屋企⋯不過現實呢⋯

哈哈,我哋一買番嚟第二朝叉好電就試用,ViRobi的確充滿幹勁咁周圍走,而且都好靜~不過發現兩大問題,第一係佢有時會被困,佢會自己走咗入去四腳圓櫈嘅中間然後出唔番嚟,當你發現好耐唔見佢就要睇下佢係咪被果係某處啦~見佢好努力咁係四隻腳中間掙扎個樣真係好搞笑~第二呢因為平時都掃唔到梳化底,但盡力嘅ViRobi當然會義不容辭咁走埋入去打掃啦,但問題係佢細細個承受唔到呢個咁沉重嘅責任,佢會由梳化底黏咗啲塵出嚟--然後黏唔實掉落四處﹗﹗所以佢行完一趟之後會發現有啲超大舊塵四散屋企各個角落,要幫佢執手尾﹗﹗又唔會好生氣嘅,不過覺得好似照顧寵物咁,你睇住佢周圍轉就好似睇住啲貓貓狗狗咁走嚟走去,你又要幫佢執手尾,搞笑多過麻煩嘅~梳化底嗰個問題我唔會怪佢,我諗入多去幾轉應該可以清到啲「千年塵」,希望我哋兩個嘅鼻敏感都會好啲啦(天真地妄想中⋯)~螢幕快照 2015-01-28 上午11.45.38

行完30分鐘之後嘅戰績﹗﹗

ViRobi絕對唔可以替代吸塵機啦,因為佢冇眼睛,唔係睇住邊個位污糟嚟吸,而且入唔到去啲細微位,不過都有好處嘅,如果就咁隨便都見到個地好多塵,但又累到不得了,就由呢個忠心又蠢蠢地嘅小幫手幫幫忙啦~$399一部,仲送多兩pack除塵紙+抹布,仲想點~

微力達Vileda官方網站介紹ViRobi:

http://www.vileda.com/int/virobi-robotic-mop.html

Comments

comments

發表迴響

你的電子郵件位址並不會被公開。 必要欄位標記為 *