24-1-2015:懷孕扎記27w0d.屯門醫院產前講座(4).初生嬰兒常見的問題及準父母的角色

彷彿已經習慣咗每個星期六下晝去聽講座,今日嚟到第四講了﹗題目係「初生嬰兒常見的問題及準父母的角色」~唔知到聽晒咁多堂之後會唔會有失落嘅感覺呢?IMG_5273

原本講座分開兩部份,點解叫「原本」你陣間就會知道~:p上半部份由兒科醫生主講,講好多關於初生BB常見嘅問題,下半部份由社會福利署保護家庭及兒童服務課嘅社工主講,講下點樣預備新生命降臨係家庭入面~

唔好以為我自己係醫生聽第一part就冇乜用,雖然講嘅以前讀書都有讀過,但日常工作唔係成日都見到,所以都會唔記得,與其話要預見自己個B第時會唔會出現呢啲狀況,更加覺得似溫書多啲,事關雖然話「常見」啫,但會出現係BB嘅比率都唔係高到人人都中嘛~病理性嘅反而記得多啲,因為以前做houseman同埋fam med hospital based training rotate paedi時真係有落手落腳做過,生理性的就唔係好記得了,因為佢哋極少數會present到醫生嗰度吧,早期的可能係產科nursery時已經解釋咗俾父母聽,後期少少時嘅都係母嬰健康院解決咗,嚟到general practice再問醫生嘅真係唔多囉~講到NNJ(初生嬰兒黃疸)真係勾起好多houseman時期嘅回憶,嗰陣做QEH嘅SCBU(Special Care Baby Unit),絕絕大多數都係NNJ嘅baby,on call重要嘅工作就係「畢腳板」,因為抽血係用小針頭拮係BB腳踭皮膚,然後用迷你試管載上滴滴嘅甘露,有時啲腳仔凍血液循環唔夠好,真係「滴滴偕辛苦」~講講下講到離晒題添﹗:p其實physiological嘅東東都有houseman時期嘅回憶,做O&G houseman係post-natal ward時都成日要寫物理治療referral,俾嗰啲有positional clubfeet嘅baby父母去學幫baby做啲stretching咁~今次記番起多啲「書料」就係physiological嘅各種胎痣啦,邊啲幾時出現、幾時消失、駛唔駛理之類⋯哈,心態上係醫學生唔似準媽媽添~爸爸聽落時又有咩感想?

螢幕快照 2015-01-28 上午11.45.19

下半部份反而我哋兩個都唔太專心,就講嘅內容細細聲吱喳彼此發表個人意見﹗社工講嘅主要係夫婦二人係懷孕前計劃要小朋友、懷孕期間、產後嘅各種實際準備同埋心靈支援問題~大致上都係講金錢嘅預備、BB嘅照顧、夫妻二人嘅壓力同紓緩、家居安全等等~可能自覺上我哋已經各方面準備充足吧,感覺唔係好到肉,就叫做完整地同專家cover咗一次內容啦~螢幕快照 2015-01-28 上午11.45.25

社工嗰部份仲有禮物送呢,係兩種家居安全用品﹗﹗枱角嗰個膠我哋應該都好有用,但門嗰個可能未必吧?因為我哋屋企全部門都長期開晒緊緊地用磁石貼住的﹗anyway,要用得呢啲用具都係好耐之後啦,起碼都到BB會落地爬下爬下之後嘅事咯~

頭先咪講「原本」係兩部份嘅講座嘅,後尾臨時多咗第三部份,係做MC嘅助產士姑娘額外醒咗大家20分鐘嘅精華﹗﹗同今個topic無關,不過姑娘講番啲關於生產嘅重點資訊,點樣分辨肚痛見紅穿水啦,點解有呢啲跡象時要即刻去醫院,唔好沖個涼or食埋個團年飯至出發啦,生動得嚟好到肉,聽過叫人印象深刻﹗另外又講咗點解生仔可以生得快啲,簡單教授一次各位準媽媽2nd stage時由頭到腳嘅姿勢,仲有呼吸同用力嘅方法,希望到時跟住做真係ok啦~呢個吱喳又熱心嘅助產士姑娘令個講座變得更豐富同informative呢﹗﹗勁﹗

接住落嚟仲有兩堂講座呢,大家都繼續留意我個blog啦~

屯門醫院婦產科產前講座:

http://www3.ha.org.hk/tmh/ch/services/02_01_obs.asp#s6

前往其他懷孕扎記blog

Comments

comments

發表迴響

你的電子郵件位址並不會被公開。 必要欄位標記為 *