10-1-2015:懷孕扎記25w0d.屯門醫院產前講座(2).分娩止痛方法、產前產後的情緒處理

今日真係馬不停蹄,我哋上晝去完尖沙咀嘅美素佳兒講座之後,下晝要趕返嚟屯門醫院參加產前講座,雖然話醫院嘅講座三個月一次循環好似都幾密,但計計條數,下一round嘅時候BB呱應該已經出咗世啦,所以呢兩個月都係要密密出席了~IMG_5273

今次兩堂分別講分娩止痛方法同埋產前產後情緒處理,上半場由麻醉科醫生主講,其實我最想聽多少少係關於無痛分娩嗰part,因為笑氣、打Pethidine呢啲其實以前做houseman時都見好多,但epidural(無痛分娩)就唔係咁多見,見有啲阿太好似打咗之後會生得慢啲,又聽過打完針嘅併發症好似驚驚地,但話說笑氣其實聞同唔聞都唔差得太多,生B嘅10級痛我真係唔知自己頂唔頂得住,但打無痛分娩如果冇咗feel又好似唔似生過B咁⋯真係好頭痕~咁當然,無痛分娩即使你想打都唔係一定有,係公立醫院要office hours先有service,office hours即是佔咗一日嘅三分之一時間only,阿B作動嘅時間都未必踏正呢段時間啦~不過講起呢個talk我真係唔係幾好意思,可能今日太頻撲,到下晝我已經累累地,坐入lecture theatre開始眼瞓,努力撐住自己唔俾瞓,聽笑氣、Pethidine都仲清醒,偏偏到咗無痛分娩嗰part我真係陷入昏迷狀態⋯好在老公有聽﹗後尾問佢我打唔打好佢好似都十五十六咁~我諗都係睇下到時痛成點,頂唔頂得順至算啦,因為講座有講,要try咗笑氣同Pethidine都唔掂至准用無痛分娩囉~到超級超級痛,而service又available之際,我諗我應該乜都肯~

第二堂我瞓醒咗就好精靈咁樣聽晒了~由精神科護士主講,其實講得都好standard,由產前到產後嘅幾個psychiatric disorders逐樣按步就班咁講,所以都係書本知識,叫做溫習一次啦~其實我覺得老公聽好似重要啲,因為我相信mood disorder呢啲嘢有時都屬於幾「生理性」嘅病instead of「心理性」嘅病,當事人都未必了解自己點解會有啲咁嘅情緒變化,反而身旁嘅人嘅awareness好重要,先可以盡早detect到問題~我老公對我嘅support就一定好夠㗎啦,我哋兩個都超期待BB呱出世,而家各方面就開始做好充足預備,加上其他家人嘅大大支持,如果我出事都應該係內分泌問題,到時有咩誇張嘅情緒反應請多多包涵,同埋帶我去求醫please~

接住落嚟仲有四堂講座呢,大家都繼續留意我個blog啦~

屯門醫院婦產科產前講座:

http://www3.ha.org.hk/tmh/ch/services/02_01_obs.asp#s6

前往其他懷孕扎記blog

Comments

comments

發表迴響

你的電子郵件位址並不會被公開。 必要欄位標記為 *