28-12-2014:聖家節婚姻祝福禮

聖家節係紀念模範家庭嘅日子,幸福嘅家庭建立係融洽嘅夫妻關係之上,所以聖堂特地係聖家節舉辦婚姻祝福禮,讓參與嘅夫婦們再一次回顧當年嘅承諾,亦祈求主繼續賜福家庭~爹媽特地提我哋報名參加呢,家姐姐夫咁啱唔係香港所以就冇佢哋份咯~我諗住打blog之前搵下人哋嘅「聖家節婚姻祝福禮」嘅經驗,所以google了一下,哈,居然第二條搵番我自己個blog喎﹗我自己都唔記得打過呢一篇了,原來7年前--2007年嘅聖家節爹媽都參加咗聖堂嘅婚姻祝福禮呢,7年前我個髮型太樣衰,我都係唔post條link係度了,有心人自己search下啦,呵呵~

今年由堂家組主辦嘅婚姻祝福禮同7年前有啲唔同,以前係十一點彌撒中舉行,但今年就係晚上八點鐘彌撒舉行,而令到件事更豐富、更有意義,感恩祭前嘅下午就開始活動了,有影片欣賞、夫婦分享、自助餐等項目~IMG_5499

我哋三點前去到時已經見到地下雨天操場set up好非常靚嘅backdrop了﹗好似結婚會場咁呢,我哋報名時交嘅相相掛咗係上面呢~我哋嗰張咭上面有個「3」字,開頭以為係分組編號,但點解其他夫婦嘅number係跳下跳下嘅呢?哦,原來係三週年嘅意思﹗﹗(我係蠢材丫﹗﹗)每對夫婦一張當年嘅婚照、一張近照,我哋交嘅唔係pre-wedding相而係婚禮當天禮成後係真理堂門口影嘅一張合照呢,笑容比起pre-wedding更真實、更甜蜜,而當時嘅我哋已經結為夫婦啦~近照呢,本來想專登影張突肚子連埋BB呱的,但都冇時間著得好樣啲去影,結果揀咗結婚三週年晚飯嗰張,都好有意義,當時枱底下其實BB呱都係度啦~爹媽嗰張近照反而不太近,但就好有意義,係佢哋結婚30週年婚姻祝福禮嗰張,有埋我哋呢pair同埋家姐嗰pair係度﹗﹗IMG_5495

呢個花花結婚蛋糕係搞手專登預備嘅呢,雖然唔食得,但滿載愛意嘅花花之後由每一個丈夫送俾佢哋嘅妻子~IMG_5615

活動正式開始﹗上去三樓活動室大家圍圈坐低,首先輪流一pair pair介紹自己,我哋仲以為我哋三年係婚齡最淺的,原來仲有一對係一年嘅呢,至於最長嘅沈生沈太有47年了﹗我哋係度計數究竟我哋有機會幾多年?我相信我哋會一直恩愛下去,需要嘅係健康嘅身體咯﹗day話慶祝唔到結婚50週年都可以慶祝相愛50週年嘅~:)每對夫婦要講幾樣最欣賞對方嘅東東,好多couple聽到另一半嘅真情剖白都眼濕濕呢,呢啲活動嘅目的唔單單祈求係從天父而來嘅祝福,而且可以提供大家溝通嘅機會呢~

睇咗兩段短片,一段係一個talk show,講者講好多所謂「夫妻相處之道」,不過就搞笑多個乜,咁就都有啲反映現實嘅,睇完都可以回顧一下自己嘅夫妻生活~另一段就好感動了,有志願機構為結婚幾十年嘅老人家們舉行類似婚姻祝福禮嘅東東,參加者個個都白髮蒼蒼咯,佢哋係鏡頭前分享夫妻相處之道,又俾機會佢哋重新著住禮服影婚紗相,之後仲有一對對手拖手重新發誓嘅時刻,好sweet sweet~IMG_5497

樓上嘅分享會結束後就到雨天操場聚餐了,有祝酒啦、頒發紀念品俾最長婚齡嘅三對夫婦啦咁~之後就jap jap jap了﹗之後仲有得打包番屋企~IMG_5506

八點鐘彌撒開始,講道後有婚姻祝福禮嘅時間,28對夫婦手拖手再一次感謝主嘅眷顧、再一次向對方許諾,之後就收到神父頒發由湯漢樞機簽名嘅紀念狀,有寫明我哋三週年㗎~願我哋以後恩愛下去~:)

Comments

comments

在《28-12-2014:聖家節婚姻祝福禮》中有 2 則留言

  1. 我們不是去了旅行,而是晚上早就買了票看演唱會,如果婚姻祝福禮在早上或下午舉行我們就可以參加了。

    • 係bor,寫時記錯咗~^^”
      今年錯過咗係有啲可惜,不過我覺得安排係夜晚都幾好,感覺隆重啲,而且之前可以安排一系列活動,到祝福禮高潮後就結束~

Rita 發表迴響 取消回覆

你的電子郵件位址並不會被公開。 必要欄位標記為 *