雖然朋友們可能已經係Facebook睇到我部份嘅相相，但呢個始終都算係一個「旅行」，點都要打番篇blog俾番個「名份」佢丫﹗而且唔打blog的話過得耐咗記憶會變得含糊，打咗第時睇番又有番啲鮮活嘅回憶出番嚟﹗
今個聖誕有連續四日假期，我哋都冇乜特別編到要玩啲咩，26號就有一整個full day，day提議不如去下離島行下啦(少有喎，唔怕人多～)，係長洲同南丫島之間我哋揀咗南丫島，記得南丫島有啲靚靚餐廳，又有啲靚靚小店子，行嘅山路又唔困難，感覺長洲總係多啲人，而家我嘅身世又唔入得張保仔洞，下次BB出世之後先一齊再去啦﹗
因為係超級悠閒假日，我哋係冇較鬧鐘之下大瞓特瞓至起身出門口的﹗簡單食埋尋晚剩低嘅兩件麵包同埋醃雞剩低嘅乳酪，我哋就出發了，反正去到再食嘢啦～
早一日教會嘅Daniel至問起我哋會唔會去AIA，兩個大鄉里都唔知佢講嘅AIA係乜，原來就係中環海傍嘅嘉年華會，啱啱先答咗唔會去嘅我哋，估唔到之後嗰日就嚟咗⋯附近呢﹗新嘅摩天輪已經啟用了，我哋決定由南丫島返嚟之後要去望望～
仲有差不多半個鐘至有船，慢慢嚟唔駛趕～
咁多戈時間？坐係碼頭邊望望海、望望九龍嗰邊嘅建築物～見到IFC同ICC時，諗起上次上韓文班時啱啱學到點樣講幾多層樓，老師輪住問我哋屋企住幾樓啦，上堂嘅課室係幾樓啦，乜乜building有幾多層樓啦，哈，大家都唔係好熟悉香港嘅摩天大廈有幾高，但問到台北最高嘅building時大家都0.1秒思考，101層﹗果然改名好有用丫～
船程唔耐，但我旁邊嗰個即使瞓到咁晏都繼續下半場，我？soda crush下啦～一樣咁無聊囉～
好，到咗離島就放低電子產品，親親大自然咯～多謝一家四口嘅爸爸幫我哋影咗有南丫島代表性嘅靚合照～呢張相入面22w6d嘅肚子都突得非常完美呢～:p
第一件事，填飽肚子要緊﹗榕樹灣行入大街兩旁都好多餐廳食肆，經過以前食過嘅BB海景餐廳，記得嗰次食得好飽呢﹗大住肚子嘅我都無謂食海鮮了，貝殻類又唔暫時食住～我地揀咗呢間Jing Jing Bar，坐得都舒服丫﹗
我哋share咗soup of the day、beef stew配白飯同埋fish and chips，南瓜湯夠足料，兩份飲都夠滿足，beef stew肉有啲韌，蔬菜就煮得好腍好入味，又有得撈汁，俾我哋食清光，fish and chips都好食，因為樣樣新鮮炸，所以脆得嚟唔會油，好鍾意粗薯條外脆內軟嘅口感丫～滿意嘅一餐﹗我哋仲留咗quota之後坐低飲嘢添～
之後我哋就沿住入山裡嘅路行過去索罟灣方向，其實都冇乜目的地㗎，行行下決定，不如去洪聖爺泳灘去個洗手間、休息一下，去參觀風車就回頭由榕樹灣走啦～
好多年前我哋都有係呢個洪聖爺泳灘游過水呢，我人生中嘅第一套bikini就係呢度買的了，雖然買得cheap cheap地，但因為全綁繩，冇咁容易擠啲肥肉出嚟，著得好睇啲所以我都幾鍾意﹗唔知生完baby之後身材可以變番做點嘅樣？﹗著唔著得番？大家幫我手打打氣，希望回復舊舊觀啦～有冇機會變番大學時代嘅55kg？
出遊時send咗幾張相俾家人睇，佢哋問到人多唔多，哈，起碼少人過屯門市中心丫﹗雖然係冬天，但始終係假日，其實人都多，不過平時市中心簡直日日都好似行花市咁，嚟到呢度已經好滿足了～
原來洪聖爺泳灘後面就係之前旅遊網站介紹過嘅一間新精品酒店，主題係每間房間都由日本一個插畫家設計，地下嗰層係酒店reception、cafe同精品店，我哋入去兜咗一轉，但每張枱都寫明reserve俾酒店住客，即是唔歡迎街客入嚟飲下嘢啦？咁我哋去旁邊大間啲嘅酒店茶座度坐下啦～
我哋都唔知呢度原來有間浪濤軒酒店，露天茶座好大，我哋揀咗梳化椅嚟攤下～環境好舒服，原來早幾日係度有婚禮呢～唔知呢度搞婚禮會點，客人咪要著得靚靚地搭船再攀山入嚟？﹗
day就啡一啡，我就乖乖嘅焦糖朱古力，上面嘅花花好靚丫～補充水份、補充體力，我哋再出發﹗
對上一次嚟南丫島時個風車已經起好，但我哋冇上到嚟近睇呢，今次有機會了﹗上嚟條斜路都斜斜地，行下休息下吧～途中見到有個兩歲左右嘅妹妹同媽媽講我行得好慢呀，呢個好媽媽冇鬧佢或順手抱起佢，而係鼓勵佢慢慢都要自己行上去，讚呀﹗
原來除咗睇風車本身之外，都同時係一個戶外博物館嚟㗎，講好多關於能源、發電嘅知識，對於兩個理科人嚟講，甚麼可再生或不可再生嘅能源以前就學好多啦，不過關於風力發電，今次確實係知多咗新嘢～
原來選址都好多要求，規劃時要考慮風速夠唔夠啦、位置近唔近原有嘅電網啦冐而民航處會限制高度，所以山坡上已經有多少高度的話個風車又要唔可以起太高，另外又唔可以太近民居，遠睇嘅風車轉動得好優美，原來企正係佢旁邊都幾嘈㗎，太近民居真係唔得掂～原來扇頁嘅方向可以跟風向而轉，以為越大風越好，但原來風速太高時為咗安全又會反而有所限制，真係唔學都唔知呢～
可以用大自然嘅能源嚟轉化電能真好，可惜香港地太少，要再起多啲風車都唔容易呢～
風車前仲有片大空地，都可以係小朋友遊樂嬉戲嘅場所丫，有人踩單車，又有人吹泡泡～
之後我哋就慢慢散步出番去榕樹灣，搭船出去市區咯～到中環落少少雨粉呢～
上就唔上去啦，一來人太多，二來天氣灰濛濛都冇乜嘢睇，三來收費太貴唔係咩紀念日就費事啦，四來感覺摩天輪應該係要浪漫的，仲要同陌生人share車廂好似有點那個～唔上去玩都影張相到此一遊啦﹗
去到嘉年華門口時發生咗「老餅事件」，原來每位入場$125，包括$100代幣係入面玩遊戲，大肚婆就唔玩得機動遊戲啦，咁即是兩人共$200玩攤位遊戲？老餅嘅我就話喇，玩遊戲冇理由唔想贏㗎，但贏咗又會送啲你不太喜歡嘅毛公仔，但又唔想輸⋯結果，算啦，等BB出世之後先再同佢嚟啦～
所以今日嘅活動就結束啦，臨走係IFC影埋靚靚聖誕樹先～
浪濤軒酒店Concerto Inn Lamma網站：
http://www.concertoinn.com.hk/
南丫風采發電站港燈網站：
http://www.hkelectric.com/web/AboutUs/RenewableEnergy/Index_zh.htm
AIA友邦歐陸嘉年華網站：