25-12-2014:自家製作聖誕大餐& sweet sweet聖誕禮物

今年聖誕假期真好,25、26兩日連埋星期六日就有四日連假,day日日都可以係屋企﹗25號嘅早上我哋去完教會之後,考慮考慮今年嘅聖誕大餐,呢陣子腸胃麻麻地,唔好食太油膩同過飽,都係屋企自己煮穩陣啲,所以豪豪地去咗一田超市shopping﹗:D睇下有咩靚嘢特別嘢賣~逛一圈之後我哋今晚嘅餐單有:無酒精香檳、龍蝦湯、煎帶子、燒春雞、蔬菜、蛋糕﹗都好豐富吧~馬上返屋企準備咯﹗螢幕快照 2015-01-04 下午10.12.44

所謂首先嘅準備其實最緊急就係解凍隻春雞﹗﹗比起我哋想像中要花更多時間呢~我哋就咁放係室溫就走咗去瞓晒覺⋯:p差不多到準備晚飯時間去摸摸佢先發覺仲好冰﹗弊﹗俾著煮藝高超嘅人睇我哋可能睇唔過眼,我哋放咗佢係暖風機前俾熱風吹下先~差唔多八點佢都仲好凍,正係度考慮要唔要改聖誕大餐26號先煮,今晚出住街食先之際,摸摸佢都好似勉強ok⋯算啦,照煮吧﹗不過我哋都想像到呢隻雞會係我哋今晚最大嘅考驗了﹗﹗

反正只有我哋兩個,為咗煮得輕鬆啲、食得輕鬆啲,我哋決定煮一道食一道,咁就樣樣都夠熱又可以慢慢食啦~螢幕快照 2015-01-04 下午10.12.48

呢個似模似樣嘅龍蝦湯⋯基本上係現成品﹗heehee~急凍嘅龍蝦湯已經調好味,充份加熱就可以即刻飲了,佢包裝話有4%龍蝦㗎,果然好鮮美~:)兩人share一盒都夠了,少食多滋味~麵包烘得脆脆的,配上剛好﹗專登拎咗一對嘅Franc Franc碗出嚟裝湯,感覺靚啲(冇的話就係平時食飯用嘅飯碗﹗)~螢幕快照 2015-01-04 下午10.12.46

影番張聖誕大餐紀念合照先~冇辦法啦,iphone前面個鏡頭解像度差少少~

螢幕快照 2015-01-04 下午10.12.52

其實呢個唔算係無酒精香檳,只係樽裝青檸梳打,但買時都估唔到斟出嚟係靚靚嘅粉紅色呢,好有驚喜丫~專登搵番結婚時人哋送嘅一對香檳杯,即刻有晒氣氛﹗細樽又係兩份share啱啱好~螢幕快照 2015-01-04 下午10.12.56

平時掌廚嘅雖然大多數時候係我,但要煎呢幾粒貴帶子我真係有啲緊張,怕糟塌咗,老公你來啦~:p煎得幾靚~螢幕快照 2015-01-04 下午10.12.54

蔬菜有barbecue菇菇同埋洋葱,唔識整呀,只係中式地用蒜蓉炒咗咋~螢幕快照 2015-01-04 下午10.12.50

終於到燒春雞了﹗﹗我哋半參考網上嘅幾個食譜,又半自己按有嘅材料modify下,用咗鹽、黑椒、橄欖油、rosemary、原味乳酪哋醃,人哋講緊要醃10小時,但我哋醃咗⋯半個鐘only﹗因為解唔切凍嘛~人哋話用260度,但我哋個焗爐max得220度,盡人事吧~因為爐又唔大,所以怕個頂容易燶,要緊密監察狀況丫﹗螢幕快照 2015-01-04 下午10.12.58

初初烘咗,哇,個頂果然最快變色,之後拿拿聲搵錫紙蓋一蓋個頂,隻雞真係比起我哋想像中難熟透,平時焗雞翼雞扒18-20分鐘就好,但成隻雞要花嘅時間長好多呢,而且每個部位熟嘅情況唔一樣,可能都同焗爐唔夠大、溫度唔夠高有關吧~我哋早一晚睇咗法國名廚Raymond Blanc嘅節目,佢整咗個聖誕大餐,每一道菜都叫人流晒口水,我立定決心BB呱變成淑女之後要帶埋佢一齊去Raymond Blanc英國嘅餐廳度試下佢手勢﹗Raymond整咗烤鵝,佢好犀利呢,脾先開始烤,因為時間要較長,而個身就用斬成塊狀嘅鵝頸墊起嚟烤,咁受熱會更均勻~我哋係度處理呢隻雞時都不斷拎出Raymond嘅理論嚟幫助思考呢,heehee,後嚟仲成日係youtube search佢嘅video嚟睇﹗﹗

我哋今次隻雞都係唔多成功啦,分開幾次先熟晒,搣兩隻翼出嚟咬住先又放入去焗過,後來直情將雞撕開幾份嚟等佢容易啲熟透,而我哋食嘅時候亦變身野人,並非優雅地用刀叉切開啲肉,而係用揸住嚟咬,BB sorry,媽咪話等你變為淑女,但我哋兩個今晚都絕非紳士淑女丫﹗不過好在隻雞細小,即使醃嘅時間唔耐都好夠味,調味我都有自信嘅~:p螢幕快照 2015-01-04 下午10.13.00

休息一陣我哋食埋甜品,甜品本來係一田買咗包玫瑰花茶果凍粉返來,但行過東海堂時被吸住咗,啲cake實在太靚了~今次兩款都係抹茶口味,但我特別推介右邊嘅抹茶紅豆杯,咁複雜嘅東西係屋企真係冇可能整得到,上層嘅抹茶mousse、下層嘅牛奶布甸,搭上紅豆蓉同粉糰幾樣一齊食真係好調和,微微嘅甜味,自然口味嘅材料,食落有種優雅嘅感覺﹗左邊嘅玉露蛋糕相對就失色啦,食完抹茶杯之後就冇乜味道了,同埋口感味道都太單一,反而餅底牛油味太濃,失去咗綠茶嘅清爽感覺~因為右邊個杯今好味,一個星期後嘅爹爹生日飯我又買咗俾佢試下呢~

另外要多謝老公嘅聖誕禮物﹗﹗

螢幕快照 2015-01-04 下午10.12.33

禮物其實較早前已經收咗啦,呢個係我有一日返到屋企時收禮物嘅場景﹗﹗禮物我一早講好咗話想要銀包,款式就當然等老公揀啦~估唔到係咁嘅形式出現,有我愛嘅斑海豹戴上聖誕帽present--

銀包我好喜歡,纖細嘅銀包正好俾我幫銀包「減肥」,狠心啲,好多唔係日日用嘅唔好帶了,而家輕巧咗好多,可以放得入大褸口袋入面,返工出街食飯都唔一定要拎食飯袋啦~螢幕快照 2015-01-04 下午10.12.42

另一個亮點係,點解斑海豹頂聖誕帽咁粉紅嘅,近睇之下我即刻大笑了﹗﹗要讚下老公嘅創意,原來粉紅色帽子係吸水毛巾,毛毛球竟然係耳屎挖⋯哈哈哈哈哈,笑死我了~

我嘅禮尚往來其實都有少少慚愧,因為係必需品之餘,其實我比起佢更需要呢份禮物﹗螢幕快照 2015-01-04 下午10.13.02

係Muji嘅情侶拖鞋,其實啱啱我嗰對拖鞋爛咗,咁不如一齊換新嘅啦~一齊去俾錢時day話,乜原來咁貴㗎?﹗哈哈,因為我哋嘅先一對Muji拖鞋係當年結婚時用高高送嘅禮券買的,對拖鞋太好著了,著上癮,爛咗都要再買番同一品牌﹗恐怕將來我哋都會繼續陷係呢個循環入面啦~

Comments

comments

在《25-12-2014:自家製作聖誕大餐& sweet sweet聖誕禮物》中有 10 則留言

  1. 主要是未解凍! 所以焗極都唔得~
    梳打好飲~ 得閒要買渣渣水回家, 飲埋D 果汁

  2. 順序看下去,怎麼會在2020年2月,跳出2014年的貼文呢?
    其實你的爐有解凍功能,何以不把春雞拿來試試?

    • 你可能按入了「自家廚房blog」的分類裡順序看~
      而家學精了,其實放雪櫃下隔解凍全雞,其實需要超過一日時間,只要唔好臨時起意就ok,焗爐/微波爐既解凍功能需要掌握得好精準,過咗龍會唔小心煮咗隻雞﹗

Rita 發表迴響 取消回覆

你的電子郵件位址並不會被公開。 必要欄位標記為 *