15-12-2014:台北babymoon day 4(part 2).西門町食食食.byebye台北

離開故宮博物院距離搭巴士去機場都仲有個幾兩個鐘,我諗我哋仲可以去多個地方,近近地有得食下嘢又可以逛逛街,第一時間就諗到西門町﹗反正西門町距離台北車站只係一個捷運站,時間應該好就啲吧~SONY DSC

雖然台灣好似成日都嚟咁,但台北嚟講最近嗰幾時都只係落一落腳,跟住就去宜蘭同花蓮,宜蘭嗰次住係住西門町,但只係一個晚上一個早上,冇乜點行過,印象都唔深刻~嚟到感覺有少少弘大街頭嘅feel,街道窄窄的,四通八達,又有好多賣小食嘅鋪頭仔同埋小檔口~

SONY DSC

雖然檔口賣啲嘢五花八門,遊客又多,但街道總算乾乾淨淨整整齊齊~

我哋向邊面行?跟現場觀眾同埋食物香味嘅來源啦~SONY DSC

見到呢檔最多人係門口聚集同埋有條長隊,麵線喎,應該啱食,排咗至算啦,唔該一份細嘅丫~一個收錢、一個夾麵、一個加餸&湯再撒一撒嘅青,完成,非常迅速~SONY DSC

我拎到手影「紀念照」時都仲笑咪咪,但食兩啖就變成喊咪咪了,因為⋯原來係內臟麵線﹗﹗好似有啲腸狀嘅東東~好在啲湯同啲麵都冇內臟味,我都可以揀啲麵出嚟食~見到啲內臟時我先諗起,叮,係喎,旅遊書好似有介紹過呢一家,當時仲諗,有腸腸即是唔關我事啦,唔駛去搵嚟食⋯點知⋯都係幫襯咗﹗﹗

食食下腸腸嘅比例越嚟越高,剩低嗰半碗都係day幫手解決啦~心有不甘+肚腹唔滿足之下決定要再搵嘢食﹗﹗下一樣好好味嘅係香腸,我哋買咗小粒裝,細細個紙袋每人有兩三粒好似只賣台幣35,烤到熱烘烘,香腸裡面仲好juicy非常好味,不過我哋冇手影相了,而且掛住食嘛~SONY DSC

賣嘢嘅鋪頭仔貨品都不太吸引,仲好似質量麻麻地咁,購物意慾都唔高,但食慾就幾好⋯行行下抬頭一望,原來呢度都有豪大大雞排﹗﹗好呀好呀﹗我諗食完就會非常滿足了~SONY DSC

我哋只叫咗一件雞排咋,咁大塊,兩個人share都食飽了,可能下次好多人時先可以試埋其他炸嘢~雞排件件即叫即炸,我哋買飛後應該都有等咗10分鐘,唔緊要啦,我最欣賞啲堅持食品質素嘅店家﹗為咗靚or為咗賺錢or為咗快而犠牲咗味道係不要得嘅行為丫~

SONY DSC

握上手已經非常有份量﹗即使係啱啱炸好,但咬落去都唔油,果然係炸物嘅專家~外脆內嫰,保持一貫水準,完全冇失望~:D

時間夠啦,我哋要搵番捷運站返去台北車站啦~

SONY DSC

途中見到神魔之塔嘅聖誕樹呢,果然係台灣仲hit過係香港~btw,我哋件雞排一直食到返台北車站,真係夠晒抵~

話說去locker拎行李時有少許阻滯,因為最初投幣係for頭三個鐘,所以取回行李要補差額,唔知點解入紙幣嗰部份唔work,我哋散子又唔夠,所以急急腳去便利店買少少東東唱番啲散子,買咩好買咩好?買啲咩可以找到最多嘅散子呢?哇,果然台灣啲物價夠平,俾我哋搵到一盒台幣10嘅奶茶,俾100找番90,乜都夠晒數啦~

搭國光客運好迅速就去到桃園機場,我哋check in後仲有好充足時間享用一下國泰係台北嘅lounge呢,今次個胃俾雞排fill up咗,所以啲食物吸引唔到我哋,叫做飲咗杯嘢、有個舒服嘅位置坐下同埋R佢啲電幫電話charge下咁啦~

回程嘅business class都坐得好舒服,同樣提供充足嘅飲品同埋服務,不過我發覺啲服務員好似成日都唔知同我哋講咩語言好咁,由呢邊行過嚟時可能係英文,但後面上嚟時又可能變咗廣東話?﹗佢哋記得我哋係Yau同埋Wu,不過我哋兩個同登機證相反咗坐,所以變成Miss Yau同埋Mr Wu,anyway,既然連姓氏都記得,應該要study下客人係邊度人氏,可以講番適合嘅語言啫~食物都好好味,今次食咗海鮮飯,前菜有蝦沙律,都唔錯~day好似睇咗套戲,我就專心睇帶嚟一齊旅行嘅東野圭吾小說,時間好快就過啦~

螢幕快照 2014-12-30 下午10.42.15

返到香港了﹗今個trip影得最多嘅除咗係各種美食之外,我諗另一樣就係聖誕樹了﹗仲要棵棵有特色嗰種~香港機場係Swarovski聖誕樹,咁bling bling,莫非真係水晶?﹗咁咪價值連城?﹗

返到屋企匆匆忙忙梳洗休息了,因為之後一日day要返工,我又有特別活動啦,係咩?請留意下一篇blog啦﹗

西門町網頁:

http://www.ximen.com.tw/

國光客運網頁:

http://www.kingbus.com.tw/

台北babymoon之旅完滿結束~

前往其他台灣旅遊blog

前往其他懷孕扎記blog

Comments

comments

6 關於 “15-12-2014:台北babymoon day 4(part 2).西門町食食食.byebye台北” 的評論

  1. 豪大大雞扒太大塊,而且又不肯幫手剪成小塊,所以現在如果光顧豪大大通常都吃鹽酥菇,好好味道的。
    回程也沒有拍BUSINESS CLASS的食物照嗎?

    • 剪成小塊一方面失去「大大」嘅意義,二來佢又花多啲時間,三來大家可能會幫襯得少啲吧,例如大食嘅後生仔可能都會share instead of一人一大塊?﹗
      冇呀,又係塞晒啲嘢係頭頂⋯:p唔合格做唔到史官﹗

  2. 大腸我都麻麻地~ 沒咩好食! 改成蠔仔便好了!
    雞扒好好食~ 很滿足! 為何沒出炸脾?!

    • 改成蠔仔暫時嘅我都唔食住啦,成碗都係你的了﹗
      雞扒至啖啖肉丫嘛~可能塊扒都有脾嘅成份,只係起咗骨,如果唔係邊度得嚟咁大塊?﹗

  3. 阿宗的大腸麵線….係我第一次食大腸的東東吧~
    吃過之後覺得還蠻好吃的~
    以為自己可以吃內臟了,但再試其他大腸還是no no no….

發表迴響

你的電子郵件位址並不會被公開。 必要欄位標記為 *