我哋早上出發前都仲商量緊今日去邊度好，唔，貓空纜車啱啱定期維修日，好多博物館星期一都休息，好似只有故宮博物院嘅主館都仲開，好啦，就去睇下啦，何況上次家姐篇blog寫到嗰度好精彩呢～反正一啲都唔趕，第三個早上我哋終於食到酒店附送嘅早餐了～

坐得都幾舒服，Hotel Relax II嘅早餐係半自助式，吧枱有熱湯、各種飲品、麵包大家可以隨意取用，而每位就送上一盤standard嘅plate～

忌廉湯都幾好味，反正滿足「湯王」都唔太困難～:p標準嗰份早餐我哋兩個就冇異議，雞排、炒蛋都正常，又有水果同沙律食下營養都幾均勻丫，但我覺得呢個安排似乎對整體嚟講未必係最合適，例如媽咪唔食雞的話，佢就冇選擇了，而我哋都發現其他好多住客都食剩晒呢碟，特別係水果同沙律><“(大家都係唔食蔬果嘅壞孩子乎？﹗)，好似好浪費咁～如果有少少選擇or全自助會唔會好啲？當然都要考慮好多practical嘅問題啦～

食飽飽我哋直接收拾行李check out了，尋日買咗手信之後行李增加咗一袋添，兩個背脊三個背包點算？辛苦老公了～雖然話酒店同台北車站近啫，可以唔駛返嚟拎行李都節省啲時間，我哋決定存放啲行李去台北車站嘅大locker，順道搵埋國光客運去機場嘅車站，非常好，兩件事都順利完成～

其實我想影下酒店嘅大門，不過反晒光添～呢道玻璃門其實只係出入口，因為lobby係另一層，所以裡面只有兩部lift，呢個入口都認真麻麻地顯眼，頭頂又冇大招牌，第一次一定要順住門牌號搵至得～

下一張相已經係食午餐了，因為國立故宮博物院內嚴禁拍照～我哋坐捷運到士林站，一出站就見到大大嘅指示牌到往博物院嘅巴士站了，係正門口落車，非常方便～買好入場券，租埋語音導賞耳機，存放隨身物品入locker就開始參觀啦～講起語音導賞，去西班牙一行充份發覺設計+內容可以非常參差，而且講啲好專業嘅話題時即使係英文都會聽唔到幾多，所以我提議不如有廣東話就租冇就算，點知雖然有廣東話系統，但服務小姐話普通話version介紹嘅展品多好多，價錢一樣，佢高度建議我哋租用普通話，結果當然係聽咗佢講啦，哎吔，其實後來發現，我哋都唔係件件展品都有興趣聽到咁detail，真係應該租廣東話㗎，聽得明啲至有意思嘛～

星期一只有主展館開放，樓高三層，我哋由底層行起，感覺成個展館冇話好連貫性，每個室確實有自己主題嘅～逛完博物館到打blog嘅呢一刻有兩個幾星期，但好多都唔係好記得了，除咗「必看」嘅珍品之外，其中一個印象比較深刻嘅特展就係畫家陳澄波嘅展覽～佢嘅作品大多係油畫，人像同風景都有，睇番博物院個網站至知原來佢最大嘅特點就係中西融合，學習西洋嘅畫風融入中國人嘅畫作入面～我記得除咗展出佢嘅畫之外，有一部份係展覽佢嘅私人物品，因為有一段時間陳澄波係東京學畫，太太同三個小朋友就留係原居地(好似當時家仲係上海)，展出咗佢日本寄反嚟嘅明信片，我唔明點解係信入面噓寒問暖一兩句寫旁白嘅人就可以結論佢好顧家囉？﹗我一個外人唔能夠否定佢關唔關心屋企人，但作為女人特別係照顧住三個孩子的話，我諗冇一個女人會唔想佢嘅男人係自己身邊囉～(唔好意思，離晒題，但呢個係我真實感想～)

另外又睇咗其他嘅畫呀、雕刻藝術品呀、文物呀等等～我哋決定未睇晒下面嘅展覽室不如都係先上三樓，睇咗嗰啲必睇項目先～我諗故宮博物院最出名嘅珍藏莫過於「翠玉白菜」了，原本就一塊嘅玉石混合咗翠綠色同白色，工藝家靈巧地運用咗天然嘅顏色，雕出一棵白菜來，我諗idea本身點都犀利過手藝了﹗同一系列嘅展出仲有「肥肉」，都係原石雕出一塊酷似扣肉嘅雕塑，兩件都係唯肖唯妙丫～不過我估如果用今時今日最新最好嘅燈光的話映出來應該更靚(受尋日嘅建材展影響咗～)﹗雖然同層仲有好多有趣嘅珍貴文物，但我都行到冇晒心機，因為實在太太太太太多人了，特別係超多旅行團，逼過行花市，仲要實施人潮管制添，行兩步又要截一截，埋到去啲文物前面都唔可以近睇～少少煩躁之下決定去食咗lunch先，睇下轉頭有冇咁多人啦～

我哋上咗頂樓嘅三希堂，好舒適嘅空間﹗即刻呼吸啖新鮮空氣先～呢度可能係全個博物院最少人嘅地方﹗﹗

食嘅係點心，我哋叫咗一個茶香套餐，即是左邊嘅三樣菜色，有貢丸湯、粽子同埋茶凍，樣樣都清新可口，day話坐係我哋隔離枱嘅鬼婆都叫咗呢個餐，食到佢笑咪咪又點點頭呢，確實個茶凍係幾fresh～另外嗰三樣就單點的，右上嘅素菜卷同我想像唔係好同呢，甜甜地嘅外皮，裡面塞入大量清脆嘅蔬菜都好有飽足感，蝦餃就正常嘅好味道啦，右下嘅點心其實我哋係俾佢個名吸引咗，真嘅翠玉白菜欣賞得唔盡興，我哋叫一個翠玉白菜嚟食啦，呵呵，其實係好清淡嘅一道菜肉蝦卷，外面嘅白菜煮得好腍，裡面就有豬肉同蝦嘅餡料，我覺得淡咗啲，如果係浸係上湯入面上就應該更好味了～雖然食咗六樣點心，但好似都唔太飽咁添，可能係樣樣都清清地吧，唔緊要啦，出去再食過啦～

我哋出番去展覽區，都仲係超級逼人，就意興闌珊咁決定早啲走啦～

出去影下博物院外觀啦～

呢張睇得清楚啲～

人人人人人，呢度係旅行團嘅集合處，好誇張～

睇咗、食咗翠玉白菜，我哋決定帶一棵返屋企，係紀念品店買咗張翠玉白菜postcard，即寫即寄啦，旁邊有埋郵政局，一條龍服務，正～

Hotel Relax II 旅樂序旅館網頁：

http://www.hotelrelaxclub.com/

國立故宮博物院網頁：

http://www.npm.gov.tw/

前往其他台灣旅遊blog

前往其他懷孕扎記blog

Comments

comments