14-12-2014:台北babymoon day 3(part 2).范姜牛肉麵.亂闖建材展.101大樓

我哋逛完建國假日花市,其實出口大概就係返咗去大安森林公園捷運站附近,講真我哋之後已經冇事先編排咗嘅必去行程,所以好free嘅~我哋發現身處嘅位置就已經見到台北101,我記得有一間誠品旗艦店就係101附近,反正我都冇乜點好好去過101,我哋就散步過去啦~不過行遠路之前要填飽肚子先,就係附近睇睇有咩食~SONY DSC

就係附近發現咗呢間范姜牛肉麵,格局就似大排檔一樣,但乾乾淨淨,都好多女士同小朋友幫襯,感覺良好,我哋今個台灣trip反正未食過牛肉麵,就佢啦﹗SONY DSC

睇呢個牌匾好似有多少歷史咁,會唔會無啦啦去咗間老店or名店?SONY DSC

大食二人組除咗一人一碗牛肉麵之外,仲忍唔住係咁抵食嘅地方叫多幾樣嘢,我哋食咗燙青菜,似乎燙青菜就等於菠菜+肉燥?尋晚嘅外賣宵夜都係咁嘅配搭﹗不過呢個少油啲、清新啲,感覺到食菜嘅健康感覺~SONY DSC

小貢丸湯只有兩粒,咁平仲想點?﹗貢丸好大粒好彈牙~仲附兩條生菜添~SONY DSC

叫我哋覺得神奇嘅係牛肉麵,小牛肉麵台幣100,大嘅110,我哋係度諗點會有人叫小㗎?﹗尤其大嘅真係大咁多,抵好多喎~不過同枱有個美女就食小嘅牛肉麵,冇錯,平嗰10蚊唔係重點,而係店家可以幫你減少吸收卡路里量﹗哈~我哋就話台灣啲嘢好真材實料,俾著係香港的話,恐怕用嘅係大碗,但裡頭份量大概都係小㗎囉~牛肉麵都屬中上水準啦,係香港賣的話算好味過大部份,牛肉夠腍、麵質夠彈牙、湯夠濃郁,整體都好食,不過未有令人眼前一亮嘅感覺~

食完要叫一句:「哇,好飽~」但係好抵丫﹗SONY DSC

呢個就係我哋同101嘅距離,食飽飽正好散散步,悠閒逛下台北遊客景點以外嘅街道~發現呢一頭特別多戶外活動/體育用品店呢,究竟係呢邊係呢類店嘅集散地,定係台北人比起香港人喜好戶外活動呢?不過香港人實在太累了,我同day講起,上韓文班時老師問我哋上星期做咗啲咩呀?週末會做咩呀?past tense的是--上班、回家、上班、回家,future tense的是--睡、休息、睡、休息~當然大家vocab大少都係原因啦,但確實我未轉返part-time之前每日都係處於一pat狀態,香港人生活實在太枯燥了~SONY DSC

係牛肉麵店淨係share咗貢丸湯,都冇飲咩嘢,我哋行行下時見到間靚靚茶飲店,就share咗杯烏龍奶茶了,好香丫,佢哋係用新鮮茶葉泡㗎,完全唔係「塑化劑飲品」,飲得健康、飲得暢快~而且孕婦都唔怕太多咖啡因,因為茶淡淡的,奶好多~

SONY DSC

終於行到101了,行下飲下嘢坐下睇下嘢,好快就到~天橋上影得正好~

我身後嘅係世界國際貿易大樓,原本想入去借個洗手間一用,點知發現有個建築材料展喎,好似好有趣咁,簡單填少少資料就可以免費入場了,我哋入去運下吉先~SONY DSC

展覽都好大喎,仲分成唔同區域,day都唔算100%運吉嘅,佢本行做thermostat,都係為家居、旅館、office大樓嘅設備出一分力㗎,佢對同電子電子有關嗰啲特別有興趣,好似照明燈飾區呀、智能家居呀嗰啲~我就鍾意睇啲同自己生活息息相關嘅新產品或者靚產品,最想擁有嘅一樣產品就係電動晾衫架,晾衫架懸係天花板高處,有鋼索吊落嚟俾太太們「上落貨」,非常節省空間~另外印象深刻嘅就係其中有一個參展商係賣隔音門的,有間房播住強勁party音樂,關晒門之後外面就係一粒聲都冇﹗勁﹗不過我就唔想裝係屋企了,好似有咩意外都叫天不應叫地不聞咁,有啲恐怖~參展商都非常熱情,你行埋去近少少佢哋就會主動介紹佢哋自豪嘅產品,其中有個賣燈嘅叔叔就同我哋講咗好耐,講佢哋燈光點樣均勻,有別一般慳電膽同埋LED燈膽,雖然我都讀過AL physics,但丟低呢啲知識好耐啦嘛,加上用普通話嚟講啲專門嘅科技,好在有個老公係旁邊應對啫~不過阻佢咁多時間真唔好意思呢~SONY DSC

展覽除咗啲product吸引之外,參展商仲各出其謀去吸引客人,其中一個方法,古今中外都冇錯㗎啦,就係--美女﹗﹗我係女人都埋去八下先~人哋啲龍友用長鏡頭影,sorry,我係遊客相機﹗:p不過做呢啲model真係唔容易呢,要對於毫無好感嘅男人騷首弄姿,呢啲就係佢哋嘅專業﹗SONY DSC

比起美女,我覺得呢間店家嘅宣傳更成功,免費派嘅小禮品都係唔值錢嘅小東西,不過大家都想要,造勢方面比美女更成功,女郎係派禮物之間介紹公司,又要客人大大聲答問題(其實每一個問題嘅答妹都係貴寶號⋯),客人都幫埋手做宣傳啦,其實我對佢派嘅青蛙杯子都有興趣,不過好似搞極都未派到咁,又多人,都係影張相記念算啦~heehee~SONY DSC

我哋入咗去運吉都有成個鐘嘅就係呢個第26屆台北國際建築建材暨產品展了~

SONY DSC

終於到咗101大樓了~SONY DSC

四處有濃濃嘅聖誕氣氛呢~我哋冇上到觀景台,一方面收費太貴啦,最主要係今日天陰陰,能見度低,反正上到去都冇乜睇到啲咩就索性唔上去了~反而我哋入去個supermarket就大豐收,買咗啲手信~之後一路拎住就辛苦大家了~SONY DSC

唔知呢個咁可愛嘅公仔係咩呢?好似係啲手機遊戲嘅廣告,LINE嘅game?冇呀,見佢哋咁搞鬼我又走埋去先~

前往其他台灣旅遊blog

前往其他懷孕扎記blog

Comments

comments

在《14-12-2014:台北babymoon day 3(part 2).范姜牛肉麵.亂闖建材展.101大樓》中有 2 則留言

  1. 我去開的林東芳牛肉麵,價錢是你的一個DOUBLE,你個碗真係好抵食~
    竟然在台北無端端去左參觀建築材料展,不過可能行業特性的關係,我都好鐘意睇建材~

發表迴響

你的電子郵件位址並不會被公開。 必要欄位標記為 *