13-12-2014:台北babymoon day 2(part 1).陽明山中極上料理@松園禪林

講真今個trip plan得唔係好多,因為係relax為主,而且係幾時都可以再去嘅台北,所以都毋需趕行程,不過有一樣嘢我就一定想做嘅,就係食靚靚全餐~睇家姐其中一次去台北個blog,去咗山邊一間餐廳,有好多道菜,食完又飲嘢飲完又食嘢,又精緻又豐富,我決心再去台北時一定要食下類似嘅餐廳~於是我上網search咗一間係陽明山嘅餐廳叫「松園禪林」,有呢啲全餐食,打電話去話兩位唔需要book枱,而星期一公休,我唯一嘅必去行程就係星期六去食呢個全餐啦,好期待呢~

因為早一晚抵達實在太夜了,所以我哋決定任意瞓﹗﹗﹗不過大肚婆都係唔爭氣,瞓覺都係麻麻地,好早就醒咗,由得老公瞓瞓瞓瞓瞓⋯直至我肚子餓了就出發啦﹗出發時酒店早餐已經結束,我哋決定係附近隨便咬啲嘢食就過去食大餐了~SONY DSC

我哋住嘅酒店Hotel Relax II(旅樂序二館)係一間位於台北車站附近嘅精品酒店,行過去台北車站都只係幾分鐘,台北車站當然多嘢食賣啦﹗不過我哋唔得多,一份三文治兩份share,隨意填一填肚子,留番啲空間去到至食﹗美食廣場見到呢間賣台式茶飲嘅樺達奶茶,我就一早戒咗咖啡啦,不過淡淡地嘅茶都有間中飲下嘅,自己就唔會買,同人一齊時就淺嚐啦,我哋share咗杯紅龍奶茶,味道唔算突出,但台幣55大大杯700cc,兩個人都覺得好多丫﹗

爹媽今次借咗「台灣八達通」悠遊卡俾我哋,我哋充值後就可以搭車啦,不過估唔到台北啲車費咁平,每張咭佢哋之前用剩大約90台幣,我哋每張充200,結果到咗最尾一日先至開始用我哋入落去啲錢喎?﹗我哋去陽明山要先搭捷運到劍潭站,係嗰度再轉巴士﹗

SONY DSC

搵個巴士站都有少少驚慌呢,因為上網資料話劍潭站一號出口轉右嘅巴士站就見到小15號巴士,搭到松園站就到松園禪林,但點解唔見個站嘅?﹗我哋又冇買上網電話卡,個站個遊客中心又暫停服務,心灰意冷之際,我哋打算兜一圈再搵唔到就就咁去陽明山算數⋯點知轉兩個彎就見到小15個站了﹗好在咋~如果唔係就miss咗今日咁精彩嘅節目了﹗

因為車上張貼行山路線,司機亦會廣播嚟緊嘅站(雖然係懶洋洋嘅聲線),所以我哋都好輕易係正確嘅車站落車,上呢條彎彎曲曲嘅山路時諗起上次去釜山時去甘川洞文化村,又係坐架小巴上山,嗰次就慘咯,落錯車之餘仲要落大雨⋯(請參閱:27-5-2013:釜山麗水day 3(part 2).甘川洞文化村)又諗起去西班牙嘅阿爾汗布拉宮,嗰架車逼到好似屈蛇咁﹗(請參閱:6-11-2013:西班牙day 7(part 1).阿爾汗布拉宮@Granada之上集)

好,落車﹗其實松園站就只有松園禪林一個建築物,我哋直畢入去吧﹗原來入去唔食飯的話要收50蚊入場費,不過我估都唔會有人唔食飯又專登走過來吧?星期六都唔駛等位呢,我哋跟服務員入去就坐~

SONY DSC

行過長長嘅走廊,餐枱一張張有屏風隔開,有啲私隱,情侶、家人聚會都唔錯,朋友聚會嘈嘈的就唔係好啱feel了~SONY DSC

我哋座位嘅view﹗正,落地玻璃有無敵山景呢~可能冬天唔係陽明山嘅旺季吧,所以人唔多,不過嘛,春夏的話有各種花花盛放可能景色更靚~外面凍凍的,裡面著咗適中嘅暖氣,加上入室內就脫鞋,所以好舒服好自在呢~為咗欣賞靚靚景,我同day直情坐埋同一邊了~

坐低settle down就開始上菜啦﹗呢度12道菜餐單係廚師發板的,你唔會知道下一道菜上啲乜,所以充滿驚喜,不過偏食嘅人就唔適合啦~你可以選擇嘅係葷菜or素菜,兩樣都係每位台幣1000,睇落你就會知道好抵﹗﹗SONY DSC

所謂12道菜其實包括埋飲品小食水果甜品,第一道就係薑茶,先嚟暖一暖身﹗大家要留意,每一道菜都有精心嘅擺盤呢~SONY DSC

第二道菜係三小碟嘅冷盤,服務員上菜時會介紹菜色,同埋教你點樣食,呢三小碟要由右邊食起,因為味道由淡至濃~最右嘅手工花生豆腐一放落口就要瞪大眼睛望一望day了,與其話係豆腐,反而似係花生pudding,花生濃郁嘅香氣係口中散開,加上上面少少鹹嘅一滴醬汁,味道更加複雜了﹗中間嘅煙三文魚我哋就食得多,不過下面加咗爽爽嘅野菜口感就唔一樣啦,上面嘅醃果實吊一吊味添~最左邊嘅係醋醃小紅茄,圍住佢嘅係酸酸嘅海葡萄,非常醒胃﹗食咗第二道已經覺得不枉此行,同埋對之後嘅10道更充滿期待了﹗SONY DSC

第三道係賣相比較平常嘅雞肉菜沙律,不過調味汁就好蜜味,似乎用某種生果調配,而且今次旅行係我哋第一次見到咁樣一排過嘅粟米呢,成排咁食又冇渣真係唔錯,口感比起一粒一粒更特別~SONY DSC

食咗兩樣凍嘢嚟啲熱嘅暖暖肚先,係日式蒸蛋,蛋滑就不在話下啦,最吸引嘅唔係內裡豐富嘅餡料,而係濃濃鮮美嘅高湯,食落係昆布柴魚煮成嘅湯汁,食到最尾一啖都仲好鮮美呢~

SONY DSC

光線問題,呢度咁豐富嘅第五道係影嚟影去都影得唔好嘅綜合冷盤,我都考慮咗一陣要唔要食啲魚生,不過見只係四款,每款每人得一件,呢度啲食物又咁企理,食少少應該唔怕嘅,所以都破戒食咗,不過令人讚歎嘅反而唔係我好耐冇食過嘅魚生,反而係啲蔬菜喎~杯子裡面嘅係醃白蘿蔔,入味得嚟唔嗆喉嚨,食落好順口,脆脆嘅金黃食醃蔬菜片質感好好(唔好意思,我哋兩個都食唔出係咩蔬菜,南瓜?紅蘿蔔?or香港唔常見嘅蔬菜?)改變質感嘅茄子亦唔錯,沾上特製洋葱醬汁都好清新,但我最愛嘅係木耳絲丫,好厚肉好有彈性,係香港真係食唔到﹗我哋食呢道冷盤時不住讚歎台灣人對烹調蔬菜嘅用心,香港出街食飯,蔬菜彷彿係為咗健康而食嘅一樣食物,而唔多餐廳會花心思氣力去研究點樣令佢哋變得好味,但係松園禪林,你會深深感受到廚師們視蔬菜如珍貴嘅食材,用巧手去令佢哋變得更美味,咁先係對食物嘅尊重同埋發揮嘛~讚丫﹗所以即使唔係素食者,我估揀素菜餐單應該都會驚喜不停﹗SONY DSC

第六道係清一清味蕾嘅酸味啫喱飲,我都唔係好識形容,滑滑的蒟蒻(?﹗)係微酸嘅醋入面,幾好味~SONY DSC

第七道係主菜烤豬肋骨,廚師細心的用錫紙包住骨頭,等你拎起食都唔會污糟,好細心~味道方面不過不失啦,加上芝麻都幾香,肉質都好嫰滑多汁~SONY DSC

第八道係唯一一道我哋冇食清光的,就係俾你食完肥膩肉類之後清清口嘅梅醋,實在太太太太太酸了,雖然服務員叫我哋等冰塊融啲至飲會淡口啲,但似乎融晒都唔ok⋯anyway,next~SONY DSC

食完第九道嘅蒸飯我哋就飽咗啦,好好味嘅蒸飯就脆脆嘅小黃瓜片,煎雞蛋絲同埋香甜嘅櫻花蝦,拌勻之後食飯粒都充滿餸菜嘅香味,讚丫~soup

第十道嘅湯真係好勁﹗﹗day話食完之後充滿能量~未開始品嚐之前先將蓮花乾放上面,蓮花乾係湯面盛放除咗靚之外,仲等香味滲透係湯汁入面~2分鐘後撈起蓮花,可以開始食了﹗材料好豐富呢,雞有啲硬反而食唔到幾多,但入面嘅其他餸菜我哋都食咗好多丫,最濃烈嘅有新鮮竹筍啦、鮮淮山啦、細細粒嘅無花果啦(最初我哋以為係栗子)、牛蒡啦⋯係咪充滿能量呢~落咁多材料,湯嘅味道當然好鮮美啦,我呢個湯王絕對最後一滴都唔可以放過丫~SONY DSC

最後嘅第十一道同十二道就係糖水同埋水果,西瓜我就真係俾咗day食了,水果盤嘅亮點係台灣特產芭樂,好香好清甜~糖水係紅棗雪耳糖水,調得唔算太甜,都幾好,不過呢個時候實在太飽啦,味道度相對地下降了,對佢哋冇咁公平啦~SONY DSC

食飽飽滿足嘅笑容~鮮荷花好靚呢~似乎係園子嘅池塘度種的﹗

SONY DSC

係招牌前影張相先~SONY DSC

出去園子逛咗一陣~後面嘅就係我哋食飯嘅地方了~SONY DSC

荷花池冇乜盛放嘅荷花,可能係剪咗出嚟拎入室內插吧?SONY DSC

松園禪林當然有松啦﹗仲見到小小松果長係上面呢~

非常滿意嘅一餐,好高興啊~我推介每一個將要去台北嘅朋友仔去食丫﹗

松園禪林網站:

http://www.pinegarden.url.tw/

前往其他台灣旅遊blog

前往其他懷孕扎記blog

Comments

comments

在《13-12-2014:台北babymoon day 2(part 1).陽明山中極上料理@松園禪林》中有 6 則留言

  1. 樣樣都好好食,看and食得出廚師花了計多的心思! 現在最記得的是花生豆腐和雞湯~

    • 雞湯好正,另一樣居然係花生豆腐?我覺得最感動係佢哋對平價蔬菜都俾好多心思去煮,蔬菜都係珍貴嘅食材,而唔係「食菜為咗健康/便便」~

Rita 發表迴響 取消回覆

你的電子郵件位址並不會被公開。 必要欄位標記為 *