13-12-2014:台北babymoon day 2(part 3).寧夏夜市.勇氣即興主舞臺.地道宵夜

雖然小15總站係劍潭站,但因為人太太太太多,我哋決定提早落車係士林站落,不過都唔會去士林夜市啦,因為要轉地鐵去今晚嘅另一個重要節目﹗SONY DSC

士林附近見到有人報佳音呢,我哋今個trip都唔止一次見到人上街報佳音,似乎佢哋興提早出動呢~不過嘛,人就多喇,但好似只有拎住大聲公嗰位女士唱得好,其他有點七零八落⋯欣賞佢哋嘅係有大banner﹗﹗即使唱得唔大聲,大家聽唔到歌詞,message都可以出到嚟~

今晚嘅重頭節目係去睇劇,其實係我出發前上網隨便search下我哋係台北呢幾日有咩節目睇,音樂戲劇舞蹈乜都得,反正就係開開眼界,而且一整日行行行會太累了,有啲靜態啲嘅活動都唔錯~於是我上網買咗呢個名為「黑祼Harold」嘅即興劇場門票,今日一大早我哋就係台北車站附近嘅7-eleven用ibon系統領取咗門票啦~

我哋去到雙連站,按地圖先搵好劇場位置先,ok,認低條路,陣間8點鐘前返來~時間好多,但腳仔好攰,其實我哋最想搵間cafe坐低飲啲嘢休息下~但雙連站附近好似唔覺眼咩cafe,反而地道小店就好多,都係唔適合坐得耐嗰種,賣茶賣飲品的嘛就全部都係take away~

SONY DSC

但反而行下行下我哋忽然見到寧夏夜市喎~哈,寧夏夜市本來就係我今個trip打算去嘅地方,但冇諗過今日去﹗﹗既然嚟到就逛埋啦~SONY DSC

寧夏夜市唔算好大,結構有少少似女人街咁,就只係一條直路,中間有兩旁嘅攤子而路嘅最邊邊就有一列店子,入口嗰邊全部都係熟食,而最篤篤裡面就有啲乾貨同埋遊戲攤子~不過我哋中午充滿能量嘅超級午餐都仲好強勁,我哋見到啲美食想試嘅意欲都好低添~而且好似寧夏夜市嘅內臟食物比例比起其他夜市更多咁?﹗內臟實在唔啱我,係旁邊食其他嘢食慾會減低,不過我哋講笑話,係內臟旁邊總好過係蠍子旁邊﹗諗起去北京嗰啲一串串嘅蟲呀、蠍子呀真係毛管凍﹗﹗(請參閱:31-5-2014:三十登長城day 2(part 2).國家政治與文化之中心)吸引嘅東西都有嘅,記得有一檔好多人排係炸芋丸,廣東人嘅芋角咁好食,炸芋丸肯定好正啦,但見到入面包嘅係蛋黃﹗﹗好邪惡丫﹗要趁40歲前食,我諗40歲後會怕膽固醇爆燈~SONY DSC SONY DSC

除咗食物之外仲有好幾檔遊戲攤子,對於我哋成年人嚟講禮物就不太吸引了,但遊戲都幾有趣味嘅,睇下都唔錯,見到有個少女槍法如神呢~唔知最後拎咗咩禮物返屋企?記得上次去花蓮嘅南濱夜市都有啲遊戲攤子~(請參閱:23-6-2009:花蓮day 1(part 3).南濱夜市吃看玩)而我同家姐高高去日本中部嗰次就係祭典嘅攤子贏咗禮物添~(請參閱:6-6-2008:遊金澤.祭典once more)

SONY DSC

今次大緊肚唔食得蚵仔煎住了,望下都好丫,見呢個阿叔好有經驗咁、充滿自信咁煎,忍唔住唔幫襯都影咗佢嘅英姿⋯:p下次補數下次補數再幫襯~我記得當年去上海交流團時都好鍾意睇個生煎包大哥煎包呢(2004年時仲未開始打blog丫)~SONY DSC

結果行咗一趟寧夏夜市都冇幫襯⋯出番嚟大街,搵個地方坐低休息下啦~途中見到呢間麵包鋪⋯有咩特別?啲包大大個﹗﹗係香港好耐冇見到~麵包加價就算了,但變得細細個真係好難搞,食一個又唔夠飽,兩個又多得滯(而且貴得滯),好麻煩丫~SONY DSC

終於搵到一間不太靚、飲品味道不太好嘅cafe坐低,總算有得休息下,day話我杯熱朱古力好味過佢杯咖啡,吓?﹗咁佢杯咖啡咪好嚴重?我覺得我杯熱朱古力已經麻麻地㗎啦喎~早知叫細杯啲添啦,唔好味嘅卡路里盡量減少攝取~坐係度我哋打下機、睇下旅遊書諗下之後兩日嘅行程,夠鐘至過去劇場~SONY DSC

呢兩張就係7-eleven兌換嘅劇場門票了~我哋係early bird,所以有九折,每位台幣360~SONY DSC

開頭探路時見到劇場門口只係好似普通民居咁,感覺不太踏實,但差不多開場了,著咗燈,外面有條人龍,冇錯了~觀眾大多都係年輕人,可能中學生大學生更多吧~SONY DSC

就係呢個勇氣即興主舞臺,招牌都似模似樣㗎~

夠鐘排隊入場,每場觀眾最多70人,不切劃位,我哋好好彩都坐得好前下,睇睇場刊,劇團都好多人丫,最有經驗嘅有11年演出即興劇了~SONY DSC

所謂即興劇就係指無劇本嘅隨機演出,我哋今晚嘅演員就係呢四位,佢哋自己開場前都唔知今晚會演乜東東,開始時先同觀眾們一齊brainstorming,佢哋提出幾個open-ended嘅問題,問大家關於嗰個題目嚟講會聯想起嘅東東,例如問小學時代--擦膠、罰企、出貓、橡筋繩之類,大家係個位度大叫出來就ok了,佢哋會揀其中兩個,然後俾觀眾拍手投票出喜愛嘅keywords,再嚟幾個唔啦更嘅問題,於是佢哋就用呢幾個keywords嚟做今晚嘅題材了﹗四位演員會飾演超過一個角色,冇年齡冇性別嘅界限,佢哋各自創作場景同埋scenario,再帶同伴們入戲,有好幾個故事就分頭展開、輪流上演,慢慢隨住時間過去,劇情嘅推進,原來幾個故事之間可以慢慢有連繫,再加上內在嘅意思~佢哋個個都好勁丫﹗我特別欣賞左二嘅閃閃背心女生,佢演唔同角色時真係完全唔同一個人﹗﹗我覺得時時演即興劇應該可以預防老人癡呆,因為腦筋要轉得好快,用好多working memory,同伴拉你到台中間你就要即時作出反應,仲要有埋對白同表情喎~結果我哋睇嘅劇情有鍾意管三管四嘅阿媽和兒子,有離家出走少女同漫畫店男生嘅愛情故事,有向尼姑訴苦嘅女生等等,非常豐富~加上演員們都好幽默,不停發放笑彈,大家哈哈哈哈大笑時佢哋都可以專業地若無其事喎,勁﹗不過呢,當佢哋化身為小區阿豬媽時就會自動轉台變成台語,day聽得明我就聽唔明,唯有靠body language估估下,係空隙時問下day啦~非常讚嘅演出,我極力推薦大家去睇丫~臨走前我哋仲買咗兩件tee做紀念呢~SONY DSC

睇完劇我哋行番過去地鐵,咦,原來返台北車站只係兩個站,而且地下街可以連接番去呢,咁呀,不如行啦,唔好搭車了~SONY DSC

不過可能時間都夜夜地,大多鋪頭都關門了,好在人唔多,行得都舒服~ SONY DSC

吸引我嘅係每一道門都有一位AKB48嘅相片,似乎係最近總選嘅排行榜,吓,乜我鍾意AKB48?未聽過嘅?唔係,我係鍾意睇AKB49呢套漫畫,漫畫講有個男生為咗支持佢喜歡嘅女生,就扮女仔陪佢一齊audition打下氣,點知兩人雙雙入選,佢就三年來一直扮女仔又唱又跳演出了~講故事時當然講唔少AKB48嘅東東啦,自然好似變成小小專家咁弓解釋俾day聽~但大家記住,我知嘅內容只係漫畫入面嘅only~

SONY DSC

去到台北車站,結果都幫襯番我哋早上買茶嗰個美食廣場,今次幫襯咗台灣地道嘅鋪頭,因為人太多,我哋買外賣返酒店食啦~SONY DSC

開餐﹗除咗外賣有飯有菜有湯之外,我哋仲可以飲酒店嘅免費minibar喎~

SONY DSC

食物咪就係美食廣場嘅準囉,我哋share咗肉燥飯同埋乾麵,我就飲排骨酥湯,day就飲涼瓜湯,有啲菜食下都好,味道ok,不過油咗啲~day有得撈電視汁就ok了,哈~SONY DSC

前一晚我哋太夜到,都冇心情影下酒店介紹下~我哋今次住嘅Hotel Relax II屬於比較新嘅精品酒店,裝修就新穎舒適,但房間比較細,如果有大喼就可能唔可以攤開放係地下了,衣架亦只係一條鋼通橫係茶水間上面~

SONY DSC

浴室只有淋浴就啱晒我,屋企冇浴缸,平時去旅行好恨有得浸下浴,但大緊肚唔浸得浴,浴缸都冇就更好,唔駛引誘我﹗

寧夏夜市網頁:

http://www.nx-yes.tw/

勇氣即興劇場網頁:

http://www.gutsimprov.com/

Hotel Relax II 旅樂序旅館網頁:

http://www.hotelrelaxclub.com/

前往其他台灣旅遊blog

前往其他懷孕扎記blog

Comments

comments

6 關於 “13-12-2014:台北babymoon day 2(part 3).寧夏夜市.勇氣即興主舞臺.地道宵夜” 的評論

  1. 即興劇真的好誇張,真的藝高人膽大! 腦袋不可以空白~可能發夢都不斷會練出劇情來,好好睇:)

    • 發咗3秒呆已經可以催毀整個劇,不過有好拍擋的話應該可以救到你嘅,將發呆變成劇情﹗﹗

    • 我都成日去大會堂睇下有咩節目好似都未見過喎~
      你下次去台北睇下仲有冇得演出,你會喜歡的~

  2. 炸芋丸真的好好食!
    是台灣朋友帶我們去食的,本來看見條隊咁長都想走了,但她們說她們也要吃,所以才乖乖排隊~~結果不枉排了好一會~
    還記得排隊時有路人經過,聽到我跟阿麟在說廣東話,那位叔叔就跟他的太太(?)說,「都係香港人黎咋嘛,台灣人唔食架,走喇」,然後我兩位台灣人朋友知道後就說,「我們真是台灣人啊」XDD

    還有從夜市轉出來一角的蚵仔煎,也是台灣朋友介紹的,我本來有點怕吃台式蚵仔煎,但那個真的好好吃~有機會再去吃吃看~~~

    • 下次再試﹗如果多啲同行嘅人更好,好似兩個人食heavy咗啲~
      蚵仔煎我不嬲都鍾意丫,只係而家暫時唔食蠔,第時大解放就要食食食﹗

發表迴響

你的電子郵件位址並不會被公開。 必要欄位標記為 *