12-12-2014:台北babymoon day 1.難得貴賓體驗

對於babymoon一詞,我第一次聽應該係某次去旅行時,去spa嗰陣見過spa menu入面有babymoon package,返到嚟再search先至知咩意思~講緊嘅就係夫婦二人係BB出世前過嘅最後一個二人世界假期,趁機會俾餵奶尿片甚麼困擾之前,好好再一次建立兩人嘅親密關係﹗無論你睇任何關於懷孕嘅書藉同網頁,都會建議要出遊的話,second trimester(中期懷孕)時就係最安全最適合嘅時候啦,因為胎兒比較穩定,好少發生併發症,又未去到有機會早產嗰啲週數~所以擇日之後,就係21週嘅時候去吧﹗地點都係一個concern,要治安良好、飲食安全、又唔會太長途跋涉or艱辛,既然只去澳門都要花千千聲,不如近近地去台北啦,有啱嘅BB用品仲可以買啲返嚟添~

上次去北京時咪有問過大家換機票好定用$$買機票好嘅,結果都係真金白銀用錢買咗機票,所以兌換咗嘅積分嚟緊都會過期,既然有70000幾分,而家又係尊貴嘅大肚婆,就難得豪氣地用咗60000分嚟換咗兩張business class嘅台北來回機票喇﹗呢件事其實都叫我非常期待,雖然以前其實都叫做坐過兩次business class,其實兩次都係因為太遲check in唔夠economy class座位而upgrade的,一次就係大學year 1時去上海交流團大家零零散散咁坐咗business,另一次就係2005年同爹媽姐去首爾時一家四口同時upgrade,印象中食物精彩啲、座位寛闊啲,但自己book最大嘅分別就係可以享用國泰嘅貴賓候機室﹗呢個就真係未體驗過了~螢幕快照 2014-12-16 下午01.20.33

所以今次專登早少少check in,早少少去到貴賓候機室享用下嘅服務﹗我出發前有上網睇過啲資料呀,入面好似有好多嘢食﹗﹗所以晚餐都唔食,入去食啦~SONY DSC

平時都唔留意,原來國泰有好多個貴賓候機室,我哋今次登機係六十幾號,所以揀咗最近嘅玉衡堂,入面都仲有再分first class lounge,但望到入去似乎設施應該差不多,只係再進一步「隔渣」啫~SONY DSC

入面有好多梳化椅,大家可以輕鬆隨意入座﹗酒吧serve有酒精同無酒精飲品,倒米嘅day只飲咗可樂(佢話:「咁我係想飲可樂丫嘛~」),我反正都唔飲得酒精,相對地抵啲咁飲咗fruit punch~令外都有小食吧有小型自助餐,主要都係中西小食,好似三文治、蛋糕餅點、炸物、中式點心等等,對我唔太肚餓嚟講吸引力一般~枱面有震震牌?我稍後再介紹﹗SONY DSC

窗外面嘅景色就係停機坪啦~SONY DSC

震震牌要領取嘅就係撈麵啦﹗noodle bar有幾款麵食俾你揀,全部都即製熱辣辣﹗我哋諗住上機又再食,就兩個人share咗一份啦,雖然薑葱撈麵都唔算有餸,但居然好好味喎,薑磨得好細,只有香味冇辣味,麵煮得啱啱好又冇梘水味~螢幕快照 2014-12-16 下午01.22.10

預番咁上下時間出返去候機室,點知⋯飛機又delay了﹗﹗﹗我哋係度研究究竟我哋兩個邊個至係「帶來delay的人」(唔知咩意思請參閱叮噹「帶來雨水的人」篇),我哋出遊唔算太多又唔算太少,但好似飛機經常delay囉~講番最近期七月時去美國由三藩市飛檀香山delay得好慘好肚餓啦(請參閱:28-7-2014:加州婚禮+夏威夷day 3(part 2).Aloha Hawaii.第一餐⋯韓食?),但更經典應該係去上海影pre-wedding回程返嚟嗰次,delay咗十幾個鐘,直情航空公司安排咗我哋坐旅遊巴出返市區住賓館(我居然嗰次blog爛咗尾冇打到呢一段,記得手續煩得滯冇claim到保險,但航空公司現兜兜地每位乘客即時賠咗RMB600﹗我哋總有呢啲「不幸的橫財」,上次去澳門睇唔成水舞間有金牛送又係~)﹗我話我自己去東馬、同家姐去曼谷又冇delay喎,係day了﹗佢無力嘅反駁係,可能家姐係「避免delay的人」呢~哈哈哈,笑死了~

結果上飛機時已經累到半夢半醒,亦冇心機影相(所以day話我唔係做史官嘅材料),今次business class都幾大,座位係2+3+2,我一早上網自己揀位當然兩個人孖住坐窗口位啦,上飛機有飲品同熱毛巾serve,day拎咗嗰杯奇異果椰奶shake都幾好味喎,好refreshing~機程太短吧,起飛無耐就開始serve飛機餐了,亦係我期待的,上海嗰次食乜唔記得了,但首爾嗰次我記得係有鋪枱布啦、有瓷器嘅鹽胡椒粉樽、一道道菜分開上啦、仲有最尾有聖誕樹頭蛋糕添(嗰次正值聖誕節﹗﹗),今次都有枱布,不過係鋪係托盤上面,刀叉亦係economy class見唔到嘅金屬餐具,全部容器都係比膠高貴啲嘅瓷器,而且有布質餐巾添~主菜我哋都揀咗咖喱蝦,我話啲西蘭花煮得好味過我煮,hee,白飯分開用碗裝,不過翻熱令飯嘅邊邊有啲硬呢,甜品嘅焦糖朱古力撻超級好味﹗食得好滿意呀~未係first class,只係business都已經同economy冇得比了,好好享受今次啦,下個trip我哋又返去economy啦,除非又儲咗好多Asiamiles啦~

飛機只係遲咗45分鐘到,而台灣過關亦非常快﹗我哋寄艙行李高興地有標籤priority baggage,所以好快出嚟,拎埋行李都唔駛15分鐘﹗不過⋯慘慘嘅係⋯冇的士丫﹗太夜了,機場巴士都收晒檔,人人都要搭的士,排超長龍,而的士又供不應求,只見的士counter嘅大叔不停打電話,可能call的士台叫啲的士嚟接客吧?我都冇計時等咗幾耐⋯好在排隊嘅地方都有得坐下~終於有車了﹗係個大姐,感該安心啲,但開車後就發覺自己高興得太早了,佢----駕----得----好----快----﹗﹗﹗我整個旅程處於僵直嘅狀態,但唔知點解坐我隔嚟嗰個都可以係車上瞓得著覺囉,真係好神奇﹗﹗未試過由桃園機場去到台北車站只需要25分鐘﹗﹗禍不單行嘅係落車錯咗路段,原來漢口街有幾個15號囉,於是我哋浪漫地散步去酒店啦,吹吹夜晚嘅涼風,個人又醒神番了⋯:p,我哋極速梳洗,盡快爭取休息丫﹗

前往其他台灣旅遊blog

前往其他懷孕扎記blog

Comments

comments

6 關於 “12-12-2014:台北babymoon day 1.難得貴賓體驗” 的評論

  1. 我們有一次陪捐方到青海主持學開幕,他雖然陪我們坐經濟艙,但他的身份,讓他可以在first class counter check in ,而且還可以帶我們入機場貴賓室休息及吃小食。

    • 國泰的話,佢係咪嗰啲馬可孛羅會or甚麼寰宇一家會員?有啲信用卡卡主都可以用機場嘅貴賓候機室~我嗰張Citibank Premiermiles信用卡都可以用貴賓候機室,不過好似唔可以帶朋友入去?anyway我都未用過呢~

  2. 竟然難得坐BUSINESS CLASS無影相…試下貴賓候機室都係好好的經驗,我好似有幾張咭都可以免費使用貴賓候機室,但一次都無試過~

    • 因為累得不得了,一坐低又將所有東東放晒上行李架,再拎落嚟影太麻煩了~
      下次我哋姊妹倆再去旅行可以一齊去試,我哋都有Citibank Premiermiles嗰張嘛~

  3. 做空中服務員真的不容易~ 一坐下又要送上welcome drink,轉頭 便要準備食物給大家!
    我又不覺她駕得很危險,快左d je!

    • 雖然business class空服vs客人嘅比例高過economy class,但太多「li-lo」,可能做得更疲累~
      快已經夠恐怖⋯^^”

發表迴響

你的電子郵件位址並不會被公開。 必要欄位標記為 *