3-12-2014:懷孕扎記19w4d.孕婦瑜伽@香港瑜伽舍

其實呢篇blog已經係心入面draft咗好多個星期,不過一直有其他題材可以寫,所以呢個每星期都發生嘅事就留嚟遲啲先啦遲啲先啦﹗嚟到19w4d其實我已經上咗五堂啦﹗

一過咗1st trimester我就開始考慮要開始做番運動﹗孕婦運動?任何書藉嘅頭兩項都係步行同埋游水﹗只步行嘛,覺得太小兒科,而且要專登出去行都唔係咁易實行~游水嘛,早一個月前天氣都仲好熱,游泳池好多人,怕人多時會保護唔到肚子,諗住要是去都係等天氣凍啲去游暖水池+老公陪至去~上網都見到有孕婦專用嘅aerobics,不過屋企又細跳唔到,落街嘛又擔心會有好多熱心嘅街坊俾意見⋯運動都係有個固定嘅schedule比較好,我上網search咗,決定參加呢個:

logo

孕婦瑜伽都好丫,平時都有係Physical上開瑜伽班,對於柔韌性同埋strength嘅鍛練都有,雖然唔屬於帶氧運動(大家要注意,唔係話個身體熱+出汗就叫帶氧運動,帶氧運動嘅意思係指大肌肉大動作重覆郁動一段時間,帶氧係講緊cellular level嘅energy consumption呀~),但都係全身運動﹗加上專為孕婦設計就肯定好安全啦﹗其實都有好多孕婦瑜伽教室,有啲就係中環呀嗰啲serve鬼婆嘅英文網站,睇個網頁就覺得貴,而且冇理由搭車來回兩個鐘去做一個鐘運動㗎~另外有啲就係大型瑜伽中心當中提供嘅孕婦瑜伽課程,呢啲最擔心就係銷售手法,見有啲討論區講嘅都叫人怕怕﹗

結果揀咗呢間「香港瑜伽舍」,幾個原因啦,一來位置比較方便,鄰近荔枝角地鐵站,屯門搭一程巴士就到,二來似乎對孕婦瑜伽好專門呢,一個星期有多堂孕婦瑜伽,又有孕婦fitball,老師資格更加唔嘢小,除咗係瑜伽導師之外,亦係游泳教練同埋空手道教練(雖然履歷好似好man,其實係有兩個小朋友嘅爽朗太太﹗﹗),最重要令我敢approach嘅一點就係明碼實價同埋有得試堂﹗於是我就e-mail咗導師,安排咗去試孕婦瑜伽嘅循環班~

地點係工廠大廈頂樓,都算寛敞寧靜(話晒而家啲工廠大廈都係office多,冇乜幾多個單位真係操作大型機械從事生產⋯),不過電梯只到九樓,要行樓梯上一層,不過嘛,連一層樓都行唔到嘅人恐怕都上唔到瑜伽班吧?﹗一堂最多可以容納十幾廿個學生,而你交咗10堂學費之後,就可以星期一至日任何一個時段嘅班都可以自由上,逐堂扣數~而且下午嘅堂、放工時間後嘅堂、星期六嘅堂都有,任君選擇﹗

孕婦瑜伽大致上比平時嘅輕鬆啲,可能我係當中個肚最細嘅吧(老師話,你平時一定有做開運動,唔做就唔安樂嗰啲吧~原來多數太太們都係週數大啲、開始腰酸背痛腳腫至開始參加,好似我15週就開始上堂嘅比較少~),所以做起來都輕鬆~由頭至腳嘅伸展都有,我估唔到嘅係一啲classic嘅、不是超級容易嘅瑜伽pose都會練,好似下狗式、樹式、貓式、三角式等等都會做,而特別for孕婦嘅就教一啲減少下肢水腫、減少小腿抽筋嘅練習,仲有教定一啲開始陣痛時可以舒緩嘅伸展動作等等~雖然係循環班,但上咗五堂每堂都有少少唔同,有時會用道具添,有次用咗橡筋膠帶,所以持續都有趣味﹗到咗懷孕最尾兩個月左右,老師就會建議轉上fitball班,到時我再報名吧﹗

而家呢段時間,我認識嘅人之中都好多「同期」呢:D,表嫂又preg緊、Helen又preg緊、教友之中又有preg緊⋯大家有興趣嘅一齊去上堂啦﹗﹗高興啲~

香港瑜伽舍網頁:

http://www.hkyogastudio.org/

前往其他懷孕扎記blog

Comments

comments

發表迴響

你的電子郵件位址並不會被公開。 必要欄位標記為 *