27-11-2014:懷孕扎記18w5d.奇妙時刻第一次胎動

呢排技術上問題個blog唔係好穩定,呢篇blog要面世時可能已經係一至兩星期後,那管我之前仲構思咗幾個想寫嘅懷孕扎記topic,但呢個題目唔可以拖﹗﹗

繼幾時見肚之後,下一個問題就係幾時會感覺到BB郁動,一般資料都會話16至20週之間,之前生過嘅媽媽會早少少,因為一來有經驗知道感覺係點唔駛估估下,而且子宮鬆少少BB多啲空間郁,而第一次懷孕嘅媽媽就大概18至20週吧~至於感覺係點,其他人講嘅都只能係用文字去形容吧,有啲話好似bubble冒出來,有啲話好似爆谷爆開,有啲話好似金魚係肚皮下游動,有啲就話好似腸腸蠕動,媽咪話當年覺得好似心跳噗噗噗,而Helen就19週時經歷第一次,佢話好似flutter一樣喎~

我呢??幾時會感覺到BB呱嘅第一次呀?17週後我就開始仔細留心有冇類似嘅情況﹗首次有懷疑係17w6d,嗰晚去聽「港樂星夜交響曲」,放工後食個tea之後出發過去中環,其間行路時感覺好似有東東係肚皮下左內側篤咗我一下咁﹗不過只此一次﹗﹗我都唔知係唔係嚟嘅~之後嗰日18w0d完全冇感覺,所以我都唔敢抱咁大奇望呢個就係傳說中嘅「第一踼」(應該係「第一篤」至啱…^.^”)~

dancing frogs

但到咗18w1d連續成個星期都間歇感覺肚皮有不尋常感覺﹗有時係短促嘅跳動感覺,而比較令我覺得在意嘅係「波浪」,好似有個小波浪係肚皮下面出現,點解會形容為不尋常呢?因為平時啲腸郁的話通常會咕一聲,而且位置恐怕都係肚中間,但呢排各種嘅「新感覺」都係做咗30年人從未體驗過的,慢慢我越嚟越相信呢啲就係BB呱嘅大動作了﹗我正式宣佈:第一踢係17w6d出現﹗﹗呢個由頭至pat pat大約6吋長嘅人仔開始越嚟越大力啦~

正如書本所講,最早期嘅胎動唔係咁易感覺到,要媽媽最relax最安靜時先會有微弱嘅感覺,所以我返工忙碌嘅時間基本上極少有感覺(18w6d下晝返工時有少少),但我坐定定或瞓定定時就會容易啲feel到﹗唔知點解我係梳化躺下開始轉珠打神魔之塔時就會感覺到BB呱,莫非佢都好鍾意打?哈哈﹗佢都好鍾意食嘢,我一jap jap jap時好似就會多啲出現~:D

相信嚟緊嘅每一日感覺會越嚟越頻密,越嚟越強烈﹗而家我感覺到時肚皮都仲未摸到,即使我叫BB呱俾下面爸爸郁俾佢feel下,爸爸暫時都無緣感覺到住﹗所以好多人都講,女人陀baby咁辛苦,胎動呢啲咁奇妙嘅時刻都算係早期嘅回饋吧﹗blublublu~~(心心頭頂冒出來…)

前往其他懷孕扎記blog

Comments

comments

2 關於 “27-11-2014:懷孕扎記18w5d.奇妙時刻第一次胎動” 的評論

發表迴響

你的電子郵件位址並不會被公開。 必要欄位標記為 *