16-11-2014:懷孕扎記17w1d.超級大掃除

因為17w0d時照唔到男仔定女仔,未有得開始購物住,day話:「BB呱話等你哋執好地方放我啲嘢,我至俾你知﹗」所以就決心要大--掃--除--﹗過新年都冇咁有決心,heehee~加上呢排鼻敏感好嚴重,可能都用雜物太多有關,而雜物多嘛,要吸塵要清潔都份外困難~之前有考慮過搵家務助理幫手「深層清潔」一下家居,但你未執通啲位人哋都好難同你清潔,冇辦法,第一步都係要靠我哋自己﹗而家做啱啦,遲少少個肚再大啲就仲辛苦了~home大家可能以為呢三張相係「before」⋯其實係「after」﹗:p只怪iphone5個鏡頭唔夠廣角,其實已經多咗非常多空間,好耐冇試過係間屋行路可以打斜行or挑選路線,之前由一點去另一點都只有一條路,入去儲物房吸塵只需要吸兩下就吸晒expose出嚟嘅地板~

最大嘅改變係清咗客廳茶几上面嘅喜瑪拉雅山(書+雜誌),將儲物房嘅鋼架maximize到儲物量120%,儲物房地面空間增加咗300%,同埋同一日換咗季,將唔再著嘅衫搬落recycle收集箱~可以achieve到呢啲成果嘅方法係要--狠﹗有時啲嘢明知冇用,理性上知道要丟掉,感性上未必可以馬上接受得到,有時需要嘅係時間、或者身份上嘅轉變~

今次丟掉得最多嘅係我啲舊嘅醫學雜誌同書,之前成日都覺得啲CME雜誌、HK Practitioner、AFP同CHECK未睇過就丟掉好浪費,仲有好多知識我可以吸收,但要知道連2013、2014嘅都仲有好多時,攬住2011、2012又有咩用?﹗而且2015嘅仲要嚟緊添﹗之前考Part 1、Part 2嘅溫習notes全部唔要了,undergrad時用嘅Davidson同Bailey and Love都唔要了,2003年嘅書,而家2014了,隨時上網都可以搵到呢啲資料,有需要時買過電子版新version吧﹗

衫衫方面,似乎有紀念價值嘅情侶裝都唔一定要keep住實物嘅,我哋人生第一套情侶裝係Giordano嘅Mickey tee,我以為只有我嗰件係度,我換季時塞咗入床下底,到整day個櫃時發現佢嗰件都仲係度﹗已經殘舊到唔會再著,keep住純粹係感情,我話不如下次換季時影張相打篇blog留紀念就好了~

今次成果都好滿意,今日好好咁享受呢間寛敞嘅「大屋」﹗希望可以keep到長啲時間~:p 遲啲過多兩三個月就肯定要購入BB呱嘅東東啦,而家都構思點樣放嚟緊嘅新傢俱~

P.S.我哋有好多小說可供朋友們借閱丫,有興趣可以message我或留言﹗:D

前往其他懷孕扎記blog

Comments

comments

2 關於 “16-11-2014:懷孕扎記17w1d.超級大掃除” 的評論

    • 是丫﹗好似個鼻都好少少~但你我都要努力合作保持住丫﹗距離BB呱出世仲有21個星期,唔好打回原形﹗

發表迴響

你的電子郵件位址並不會被公開。 必要欄位標記為 *