我有鼻敏感就細細個開始嘅事啦，近年最愛Avamys噴鼻劑同埋Telfast-D抗敏收鼻水藥丸，反正之前Staff Clinic都有得拎，只要發病時用就冇有怕﹗不過呢，說來慚愧，咁多年來我實在掌握唔到trigger我發作嘅係乜⋯^^”

有咗BB呱之後一直個鼻都算係咁，早上起身嘅乞嗤都係10個以內，用嘅紙巾都係一張起兩張止，所以完全唔理都冇問題～直至兩星期前⋯乞嗤打極都唔停，鼻水流極都唔停，到咗天黑都仲係咁糟糕都真係好少見～

當然，我知道黃色小丸子－－Piriton－－係孕婦嚟講係最安全啦，一來我都盡量唔想食藥，二來我唔想食完之後迷迷糊糊，所以都冇行動～day見我成日都慘慘樣，佢睇到雜誌有曼秀雷敦嘅新廣告，話不如試下啦～

網頁話不含藥性，原理應該主要係鹽水洗鼻，不過ingredients方面有多幾樣唔知係乜嘅東西喎，而specification只話適合成人及小童長期使用，咁孕婦呢？雖然咁樣講得，多數都ok嘅，但知識分子嘅女性到有咗baby時就會變成layman，而且有啲paranoid，乜都驚一餐⋯於是我send咗個e-mail去問曼秀雷敦，結果reply係⋯你向你嘅醫生查詢啦﹗﹗(馬上咆哮～～～～～)我就係唔知先問你丫嘛～

就係因為咁嘅e-mail reply，佢哋失去咗一個客戶，而嗰個客戶仲幫埋佢哋嘅敵人免費賣廣告添⋯

我結果買咗呢隻放係佢旁邊嘅安鼻靈潔鼻海泉，講真，不嬲我對呢個牌子都冇乜好感，因為佢哋平時賣通鼻藥水嗰個廣告我真係唔鍾意囉，口號係「不含類固醇，安全可靠」，但佢哋製藥嘅明知topical nasal decongestant唔可以用得長時間，用得太耐之後停咗會有反彈，而明知evidence方面，類固醇噴鼻劑至係幫助鼻敏感長期控制嘅藥，分明係搏市民大眾怕咗類固醇而設計嘅口號⋯結果到醫生要開藥時，要花嘅唇舌就更多了～

不過我今次幫襯咗佢，係因為佢成份方面好清楚寫明只係得水同海水，冇啲唔識嘅成份係入面，咁即是對孕婦絕對安全啦﹗不過返到屋企試用呢，又有少少論盡⋯唔知係咪啲鹽水嘅jet太猛，一噴入個鼻就好刺激，馬上狂打幾個乞嗤，再送兩筒鼻涕，不過，清潔乾淨之後又好似舒服咗啲嘅～我堅持用咗三日，唔知係佢有效定係我個鼻自己收歛咗，又好似好咗啲喎～我見好咗咁多又停咗冇用了(讀者千祈唔好亂學，如果係醫生處方嘅，記得按醫生指示完成療程呀，if any～)，佢而家就係我屋企個浴室stand-by，等我隨時呼召啦～

P.S.其實睇啲app同書講，到咗second trimester，好多孕婦都有鼻炎嘅徵狀，主要係因為全身都多咗血液循環，而鼻黏膜都唔例外，suggestion都係用鹽水洗鼻﹗不過我咁嚴重，恐怕都係我嘅宿疾發威了﹗哈～

前往其他懷孕扎記blog

Comments

comments