對於早期懷孕嘅女人嚟講，心理上嘅support真係好緊要，冇乜感覺bb嘅存在，患得患失、七上八落嘅心情，其他人實在未必明白到～有呢啲apps真係幾好：

呢兩個免費嘅懷孕apps我好早就download咗係我電話度啦，分別係「What to Expect」同埋「Babycenter」，Babycenter嗰個好似有得揀其他國家語言添，不過我就原汁原味睇番美國版～

對於早期懷孕嚟講，最令我喜愛嘅部份就係比較你嘅baby同水果嘅size，例如我哋嘅BB呱都經歷咗藍莓、提子、西梅、檸檬等等嘅階段先變成今日嘅臍橙BB呱﹗每個星期會update一次水果，等準媽媽們可以想像下佢哋細細粒嘅寶貝而家係點嘅～我諗到肚子一日一日大之後，安全感應該會增加，就毋需借助呢啲東西咯～

而實用性方面，兩個apps每日都會有小貼士，由飲食、運動、工作、生活嘅建議，以至點樣應付身體嘅變化同不適，以至involve準爸爸多啲入嚟，非常全面又體貼﹗飲食對我哋嚟講就用處相對少啲啲啦，因為佢哋講嘅主要係西式飲食習慣～但其他都非常有用﹗除咗每日短短幾段之外，仲會有延伸閱讀，想知深入啲嘅可以click埋入去睇添～

點解呢篇blog要叫做「強力預言書」，因為兩個apps都實在好緊貼你嘅懷孕週數，適當地準確地提出你會遇到嘅事情，同埋俾解答你﹗尋日特別叫我驚訝，所以我決定要打呢篇blog﹗我平時牙齒牙肉都好健康，而四月時都專登檢查咗牙齒仲洗埋牙添，諗住都好放心～但上個星期開始成日刷牙都流牙血﹗而15週嘅內容就正正講孕婦去到呢個週數會多咗流牙血嘅情況⋯真係料事如神﹗之前其實都有咁準㗎，好似1st trimester多啲尿頻，到咗2nd trimester反而會少啲啦，又俾佢講中喎～另外我大概幾時覺得個胸脹需要買bra，考慮到自己幾時見肚⋯真係好似我肚嗰條蟲咁犀利﹗雖然apps嘅內容都係按週數pre-set咗，但似乎啲writer真係不單單係醫護professional，而且累積咗好多經驗，可能係自己親身感受～即使讀醫科，好多小事情老師都唔會話你聽的﹗

每日早上睇一睇兩個apps嘅update真好呢，好似有咗善解人意嘅companion一樣﹗我都幫我老公download埋係佢部電話度啦，記得睇啊～

前往其他懷孕扎記blog

Comments

comments