最後一日嘅行程，我哋都唔好話一起身去去機場就飛返屋企啦，起碼都係夏威夷食埋最後一個靚早餐先啦～因為餐廳的話時間比較難掌握，我哋決定食麥當勞，睇下有冇本地special？
Park Shore Waikiki酒店步行距離嘅麥當勞嘛，經過就有好多次了，今次就第一次幫襯～雖然我哋一早就決定買外賣返酒店食，其實鋪頭都幾靚丫，又有得坐下outdoor～
外面係悠閒舒適設計，裡面就時尚摩登，day揀咗早晨全餐，我就叫咗個香港冇得賣嘅包包餐，咦，side dish有得揀水果喎，咁呀，健康啲啦﹗
點解要買外賣，咪又係因為留戀呢個view囉，今次真係最後一餐了～:( 隔咗兩個幾月先打最後呢篇blog，味道係記憶之中已經變得好模糊了，我相信個香港冇嘅包包應該都不甚特別，起碼影相我冇影到個包嘅close up囉～至於水果杯其實係菠蘿粒，鬼佬真係應該學下我哋用鹽水浸下啲新鮮菠蘿囉，好食啲㗎～
食飽飽，執好行李，我哋就落大堂等了，早係香港已經book好咁多程嘅airport shuttle～因為係shared ride，所以接咗我哋之後仲有好幾站至到機場～
離境大堂係半open設計，旅客係臨走前都仲可以享受下夏威夷嘅好天氣～
要丟掉最後嘅Aloha水了，因為唔慣飲水喉水，煲又麻煩，我哋呢幾日都係買呢啲超平嘅樽裝水，發現係ABC Store最平嘅呢隻牌子只係99 cents咁大樽，正～
臨上機前有啲時間，我哋隨意逛逛鋪頭，我哋一人揀咗一本雜誌買上飛機睇，day嗰本係木工雜誌，我嗰本係女仕健身雜誌，呢啲咁專門嘅雜誌香港真係唔多見呢，我買嗰本裡面仲有Jillian Michaels專訪呢～
韓亞航空真係唔錯，位雖然唔算特別舒服，但飛機餐真係好好味，而且仲有韓食選擇呢，繼去程食過生菜包肉之後，回程有拌飯食，仲有雞蛋卷同埋熱湯，好豐富啊～有得食呢啲，總好過時時都係chicken or beef丫～
我哋係首爾轉機，中間有三個幾鐘，搵咗個可以躺躺嘅地方都幾好，不過最怕瞓過龍，所以都唔敢熟睡，用埋之前剩低嘅少少won買啲飲品正好﹗首爾返香港嗰程飛機嘛，不愧係香港人，好嘈好嘈好嘈好嘈呀～～～～～anyway，回到家真好﹗:D
加州婚禮+夏威夷之旅完滿結束
前往其他美國旅遊blog