3-8-2014:加州婚禮+夏威夷day 9(part 2).Wet ‘n’ Wild水上樂園.最後回味loco moco

彌撒結束我哋就盡快出發去水上樂園啦﹗水上樂園位置比起機場同珍珠港都仲要遠,車程應該都唔短,知道Ala Moana Center有巴士可以去到,我哋上跳上一架Pink Line嘅shuttle過去巴士總站了﹗DSCN0165

總算順利登上正確嘅巴士﹗我哋開頭一個鐘心情都好放鬆,因為知道目的地都遠遠地⋯但係⋯越坐就越不安⋯點解完全冇差不多到嘅感覺嘅?周圍嘅景色,只係一個個住宅小區~坐坐下巴士駛入一個巴士總站,然後叫人嚇一跳嘅係,司機落咗車丫﹗﹗然後換咗另一個司機開車﹗﹗吓?﹗即係未有耐到?已經坐咗兩個鐘lu喎~好在後來漸入佳境,見到有啲乘客上車睇落似係去水上樂園嘅組合,而有個後生仔亦按捺不住問司機仲有幾耐到,冇錯冇錯,我哋冇上錯車,亦冇miss到落車嘅站,冇辦法啦,唯有晏少少去到啦~原來,巴士係會停係Wet ‘n’ Wild正門嘅,大家高興地跳落車咯~DSCN0164

作為家庭醫生,我好欣賞呢度啲巴士嘅public health廣告,影低咗其中呢個fall prevention,另外又有見過教育中風徵狀嘅poster,非常好﹗大家坐車無無聊聊時總會吸收到最多資訊的,睇下poster好過啲做作嘅電視節目啦~DSCN0185

到咗Wet ‘n’ Wild了﹗原來當日有演唱會舉行呢,好似係水上樂園關門之後?我哋買好門票入場~對於當地人嚟講應該upgrade做全年入場證,好似只係加少少錢咋,再俾多少少錢做VIP會員仲可以入去食嘢飲嘢有折扣添~DSCN0166

對於水上樂園嘅第一個印象不太好,因為我哋開頭一個鐘做咗嘅事就只有排隊﹗sorry,唔係排隊玩遊樂設施,而係排隊租locker同埋買嘢食﹗我哋見形勢唔對路已經兵分兩路,day去排locker,我去排嘢食,我排呀排時,day先拎好locker,我叫佢去換衫先,之後再換佢排隊我去換衫搽太陽油,之後再一齊排一輪至有得食﹗效率真係極低﹗要搵個香港人入去整頓一下啲logistics,各位遊客嘅「笑笑」應該會提昇﹗好在我哋善用時間,一填飽肚子就可以開始玩了~DSCN0167

食飽飽唔好咁刺激住,我哋去咗最溫和嘅Kapolei Kooler先,即類似開心河嘅東東,不過水泡唔係好夠,所以要係終點等啲水泡返來至有得玩~DSCN0170

一個水泡輪流坐啦~好清涼丫﹗

之後我哋周圍逛逛睇下有咩玩~DSCN0173

有兒童遊樂區Keiki Kove,我哋經過散一散步~DSCN0174

我哋排隊玩滑梯時旁邊係呢個人造浪嘅池,因為係夏威夷吧,一般呢呢池都只有水泡俾家浮下,呢度有得借body board﹗﹗不過數量有限~可能body board都有相當危險性吧,一日好似得兩個session只准body board入場,我哋錯過咗啦~其實今個trip一開頭有考慮過上滑浪堂,後來又唔係點安排得到啲時間,中間有考慮過body board會唔會容易少少,見成日逛嘅ABC Store有啲好平嘅body board賣,一張只係美金十幾蚊,買一塊係度玩完帶埋返香港啦~上youtube睇下body board嘅教學短片,原來一啲都唔易﹗﹗睇嚟都係下次再去夏威夷,or其他滑浪勝地再正正經經搵教練教啦~DSCN0178

我哋排嘅係呢個﹗係年紀大咗細膽咗定係點呢,覺得好刺激﹗﹗真係忍唔住要大叫~睇番之前嘅blog,我哋2010年去中山長江水世界都有玩過類似嘅滑梯,但嗰陣嘅comment係⋯歡樂度高﹗不過,咁樣形容今次嘅Shaka都冇錯嘅~(請參閱:1-8-2010:中山即興trip day 2.長江水世界.孫文西路步行街)

今個trip發覺啲鬼好hit用Hero相機,Hero最大賣點係佢啲自拍配件非常齊全,配合大家錄影各種極限運動,滑浪可以夾係滑浪板上面啦,單車又可以勾係車頭,而輕巧嘅機身加上棍子就係好質素嘅自拍神器,加上佢又防水,所以好多遊客都帶埋嚟水上樂園,玩Shaka時都可以邊影衝落嚟嘅刺激景觀,又影下自己or同伴嘅驚嚇表情,加番啲音樂、剪接一下,share出嚟俾人睇一定好正﹗

Hero嘅產品網站:

http://zh.shop.gopro.com/camerasDSCN0180

跟住排隊去玩各式各樣嘅滑水梯﹗排隊唔係問題,最大問題係,你坐上水泡or滑水梯梗係要除拖鞋啦,但究竟要係邊個位除鞋真係高深嘅學問﹗:p太早除就會早早變成熱鍋上嘅中螞蟻,太遲除嘛,玩完落嚟搵番拖鞋又係要熱到跳跳紮﹗DSCN0182

大多數嘅滑水梯都係悠閒type,坐雙人水泡嘅Waianae Coasters、三人水泡嘅Big Kahuna同自己坐嘅Flyin’ Hawaiian同Surf Sliders都係輕鬆之作~DSCN0184

估唔到臨走先俾我哋玩咗最刺激嘅兩樣,我身後嘅Island Racer有啲似長江水世界嘅飛越彩虹,但呢個係刺激版(定係因為年紀大咗?﹗)﹗都係伏係軟板上面滑落嚟,但頭一段係黑漆漆的,只覺個身拋下拋下咁高速滑落嚟,到見光時已經全速前進,呼~~~~刺激嘅程度?我其中一隻隱形眼鏡沖到移歪咗囉﹗

仲有最後一個Raging River要玩,我單眼上陣﹗呢個係四至六個人坐係同一個圈圈大水泡入面滑落去,所以我哋要「搭枱」,雖然網頁撥入「moderate」嘅類別,但我覺得刺激程度同啱啱嘅Island Racer差不多囉,轉彎時簡直好似拋高到差不多要出界一樣,忍唔住要不停大叫﹗正~

玩埋呢個Raging River之後,我哋都換衫回程了,一方面樂園都差唔多關門,另一方面我單眼極度唔方便行動~好想好想一跳上巴士就除埋另外嗰邊呼呼大睡﹗好好彩呢架咁疏嘅巴士俾我哋好快等到,我哋兩個都好放心進入睡眠mode,事關今次已經清楚知道車程係超級長同埋今次總站落車~到咗Ala Moana Center,我牽住我嘅導盲犬小day,搭番Pink Line shuttle返酒店⋯第一件事:戴眼鏡﹗舒服晒~

我哋去嘅Wet ‘n’ Wild水上樂園網頁:

https://www.wetnwildhawaii.com/IMG_3356

又未係好餓,又唔捨得我哋呢個無敵露台嘅最後一個黃昏,晚飯稍稍押後吧~IMG_3361

好好咁欣賞埋呢個美妙嘅日落美景先~IMG_4737

下次幾時可以睇到咁靚嘅日落呢?DSCN0188

講到最後一個晚餐,我哋考慮要食啲咩,我哋都想最後再回味一下地道嘅loco moco,記得酒店附近嘅呢間Eggs ‘n Things好似有得食,裝修又靚靚地,就試下啦~DSCN0189

呢度原來係門口排隊先點餐,我哋揀咗loco moco同埋墨魚扒,飲品day就飲咖啡,我就飲咗水果茶~

但失望嘅係,原來點餐之後係上去再等﹗你要先付款,然後先等位入座﹗即是焗你唔准等到唔耐煩走人~但等位嘅地方一張椅子都冇囉~我哋兩個人,容易少少入座,雖然有好多望海嘅大玻璃卡位,但只限3-4人,我哋?嗚嗚⋯俾咗我哋坐面壁位⋯唔開心﹗DSCN0187

唯有保持心境平靜去享用呢餐都唔算平嘅晚餐囉~DSCN0186

食物味道其實都ok,但用嘅碗盤係我最唔喜歡嘅即棄膠盤紙碟,每人用餐都要超過十美金,唔算認真太平吧,洗兩隻碟都咁困難?用即棄餐具即刻cheap晒,functionally仲要有影響添,切墨魚扒時連隻碟都郁埋﹗所以點解我哋平時咁喜歡丼丼屋,每位用餐都係十幾美金左右之嘛,有靚靚碗盤、穩定食物質素、服務貼心又叫人舒服~Eggs ‘n Things真係要學習下丫﹗點解我會特別失望,係因為其實Eggs ‘n Things係日本人開嘅餐廳,工作嘅都係日裔職員,我會要求高少少囉~

主角loco moco老實講冇上次去火山tour嗰個頹飯咁好食,因為呢個落咗煙肉同埋芝士,搶走咗純粹嘅肉味同半熟蛋嘅魅力,上次嗰個味道?留係心入面啦~

Eggs ‘n Things網頁:

https://www.eggsnthings.com/

食完之後心情並冇好暢快,但我哋咁好嘅旅程由失望結束好似好可惜,所以我哋去逛多陣街至返酒店~好在我哋遇到佢:DSCN0191

我形容為「車仔麵人字拖」嘅DIY人字拖鋪頭,又靚靚又高興啊~day見我雙眼發光就送呢對「咁大個女未著過咁貴嘅人字拖」俾我喇~我哋要先揀「麵底」--即是揀人字拖鞋底同埋人字膠帶嘅顏色,之後就係自由decoration了,每款「餸」都按價值加錢,因為係自由搭配,你可以左右腳唔一樣,cute嘅、高貴嘅、casual嘅都得﹗

揀好材料,決定好每一粒飾物要放邊個位置,親切嘅少女店員就會幫你打窿窿fix上去﹗因為製作需時,甜美嘅少女店員就好似友誼小姐咁同你閒話家常一番,大家等嘅時候都會笑咪咪,到交對鞋到你手中時加多一句「It’s sooooo cute~」,你俾嘅$$即刻覺得值回票價了~非常成功嘅銷售﹗有冇得加盟?﹗:pIMG_4738即刻試著我嘅世界唯一人字拖~可愛嘛?

於是乎我嘅心情即刻up,可以半跳躍半散步咁返酒店了~呵呵~

待續

前往其他美國旅遊blog

Comments

comments

在《3-8-2014:加州婚禮+夏威夷day 9(part 2).Wet ‘n’ Wild水上樂園.最後回味loco moco》中有 2 則留言

  1. 實際上你地係水上樂園玩左幾耐呢?又搭車途車又排咁耐隊…
    車仔麵人字拖唔關我事,我HANDLE唔到人字拖,佢有無其他拖鞋款式的選擇?

    • 我諗三四個鐘啦,唔算好長時間,不過大多數ride都玩咗,最可惜係試唔到body board囉~
      冇其他款丫,全部都係人字拖~:p

發表迴響

你的電子郵件位址並不會被公開。 必要欄位標記為 *