第六日嘅行程，又係一早係香港book好了的，我哋會full day去歐胡島North Shore嘅Polynesian Cultural Centre (PCC，即玻利尼西亞文化中心)，類似一個主題公園嘅地方啦，各個Polynesia嘅民族，即是夏威夷、斐濟、紐西蘭、大溪地、Tonga、Samoa仲有Marquesas，佢哋會每族有一條村子，present俾遊客睇佢哋嘅傳統文化習俗～因為North Shore嘅交通唔方便，如果唔自己駕車，肯定係預約接送比較好，所以我係出發之前已經上網預訂咗門票+酒店接送+睇show入場券+自助晚餐了，睇show張飛有得劃埋位啦，早啲買都好，因為我買時啲位都剩番唔太靚嗰啲了～

PCC正午十二點至開門，我哋pick up時間係十點半左右，係Aqua Skyline at Island Colony行出去1分鐘嘅Waikiki Trade Centre度等，之前記得嗰度有間Jamba Juice，所以我哋早餐分上下兩集，先係酒店食，再出去飲～

尋日提過幾次嘅Starbucks scones，放入微波爐叮一叮，又好似新鮮出爐了﹗

Jamba Juice係我極力推薦的﹗記得2006年嗰次第一次去加州探珊珊時佢就帶過我去飲，印象最深刻嘅係，店員可以貼心地將你點嘅「大杯」重新分成兩小杯俾你share飲，仲不另收費添～(請參閱：28-6-2006：我愛水族館)我哋今次試咗香蕉berries乳酪smoothie，營養十足又好味﹗

準時上到PCC嘅shuttle，非常好，原來係可以坐四十幾人嘅大旅遊巴呢～有個導遊沿途講解下，幽默風趣，帶大家愉快地度過個幾鐘頭嘅車程～原本我哋自閉地瞓覺+聽歌，直至導遊叫大家認識下身邊嘅朋友時，我哋就加入咗佢了～

North Shore景緻同威基基好唔同﹗威基基充滿現代化建築，好多又高又大嘅酒店，夜裡都非常熱鬧～至於North Shore就保留原始風味，聽講為咗保育係專登禁止起酒店呢，由於遠離威基基，North Shore嘅海灘比較多本地人～我哋尋日去過Kilauea Volcanoes，其實Oahu都係火山島嚟㗎，導遊話有唔少電影係山裡面嘅雨林拍攝呢，佢講咗幾套我都唔係好識，只記得有「飢餓遊戲」同「侏羅紀公園」～

海上嘅小島同樣係電影拍攝場景喎，見到好似帽子嘅小島嘛？嗰幾套電影我哋就唔識了～原來有啲day tour就專係帶你去睇呢啲電影景點，除咗香港人鍾意跟著Running Man遊韓國or跟著韓劇遊首爾之外，鬼佬都鍾意呢啲嘢～

好﹗到了Polynesian Cultural Centre啦～導遊分番入場券俾大家，佢係度講解有啲客人係甚麼「ambassador」，我哋都唔知係乜東東，好似係有張貼紙係身，跟住又會有多啲好處咁⋯我上網買飛時好似又冇見過呢啲東東～果然我哋唔係ambassador，原來門票上有標明的，人哋係ambassador會有職員全天候照顧你一group人，帶你周圍行同介紹，點樣安排時間去想去嘅東東等等，各有各好啦，我哋最後自己行又真係冇充分用好啲時間嘅，但另一方面又free啲～

十二點半後就陸續有活動開始了，我哋聽導遊建議，先去食飽飽先開始活動～

兩份share果然係聰明嘅選擇，因為個飯又好－－巨－－了－－－﹗蝦用咗放大電筒，飯有兩大球，仲有雞同粟米，一齊食都食飽飽﹗

我哋決定先去就近嘅Aotearoa－－即是紐西蘭群島﹗馬上就要開show了﹗

入村子嘅範圍啦～

節目由戶外開始，原來係應對外人嘅禮節，有外人嚟到村子，先唔好失威，認清來者，冇惡意就可以以禮相待喇﹗

呢啲遊客就係「入侵者」了﹗

大家和好之後就一齊入去會堂睇表演啦﹗

有歡快嘅舞蹈，另有嚴肅凶狠嘅「示威」舞蹈，即是土人要嚇走敵人時嘅吶喊，點解咁熟口面嘅呢？明明我哋未去過紐西蘭㗎？諗起了﹗係世博時睇過丫﹗(想搵番嗰篇blog出嚟，但click嚟click去都搵唔到嘅？莫非我冇打落嚟？﹗但隔咗四年都仲咁深刻bor～)後來村民又示範咗幾款傳統遊戲，演出結束之後有得出去試玩呢～

有呢個流星錘遊戲，要跟住導師用唔同方法揮動波波，技術好就會好華麗，我哋初學者嘛，就會好興幸個波波好柔軟，經常打中個頭同個身都唔會受傷囉～

另外兩個分別係長棍子遊戲同埋短棍子遊戲，我欣賞嘅係，用咁簡單嘅道具都可以咁有趣﹗長棍子係反應協調嘅遊戲，四五個人企係度圍圈玩，每人胸前手握兩支長棍子橕地，發號施令嘅人就大喊「左﹗」或「右﹗」，大家就要放手迅速移動，改去旁邊個位度握實咯，遊戲嘅變奏就係加上其他語言，我哋嗰日玩嘅就係英文同紐西蘭土話mix埋一齊嘅左右，咁就亂糟糟啦～我進入二強，最後小女孩獲勝﹗短棍子就坐係度玩嘅，唱住民謠，大家拋下棍子交換，錯咗？俾棍子擊中囉～所以要，集中﹗集中﹗

玩完遊戲可以整番個免費tattoo，呢個臨時tattoo比起印水紙更好，其實係蓋印，但又整得幾靚喎，我哋揀咗「family tattoo」，好過印水紙啲咩？返去一沖涼就乾乾淨淨了～:D我哋出去逛一逛，門票已經包括可以坐呢啲獨木舟，結果我哋時間上都配合唔到呢～

下晝兩點半有個水上巡遊，我哋決定之前去睇咗IMAX電影先～IMAX最好嘅係⋯涼冷氣﹗呢套名為「Hawaiian Journey」嘅電影內容唔算好特別，講嘅係夏威夷土著嘅生活，亮點係用大銀幕帶你睇睇靚景，郁郁椅同噴水係呢套電影嚟講其實冇乜加分，我哋睇完之後總算恢復元氣﹗後來後悔嘅係，原來唔應該用而家呢啲黃金時間去睇電影，因為電影到夜晚開show前都不停播放，但村子嘅活動到四五點就結束啦，冇ambassador待遇就爭少少囉，我哋唔識分配時間嘛～

好，下一站：canoe pageant﹗

我哋去嘅Polynesian Cultural Centre網站：

http://www.polynesia.com/

待續

前往其他美國旅遊blog

Comments

comments