終於正式開始夏威夷之旅咯～好期待啊﹗啱啱開始holiday，我哋第一日行程清閒少少～點都好，都食咗早餐先出門啦﹗大多夏威夷酒店都唔包早餐，所以我哋呢七個早上都要好好研究下食咩好～

一起身就俾清朗嘅天空吸引住了﹗大家認唔認得呢個運河+哥爾夫球場景？咪就係由我哋客廳個大窗子望出去個view囉，上一篇blog我post過佢嘅夜景㗎～

側少少望就見到其實更開揚了﹗大家想像一下，我哋處於運河嘅西南邊，我哋呢度一整排都係酒店群，有幾層厚，再西南多少少就係威基基海灘喇，呢一整區都稱之為威基基，我哋住嘅Aqua Skyline at Island Colony離海灘相對遠少少，如果向海方向嘅房間應該都只係遠眺吧～

大家夾手夾腳預備早餐，day就預備cornflakes，我哋尋晚就係貴貴便利店買好咗獨立包裝嘅cornflakes同埋牛奶，開頭以為啲牛奶嗰間賣得特別貴，後來聽火山day tour導遊講牛奶呢啲必需品係夏威夷特貴的，尤其美國大陸啲奶遠遠比香港平好多，因為夏威夷冇自己嘅牛同牧場吧，所以全部都要由大陸本土運過嚟～所以我哋後尾都冇再飲過牛奶啦～

我就幫手預備(我唔飲)嘅咖啡﹗兩間酒店都有咖啡機，而且都提供咗夏威夷產嘅Kona coffee，day要充電之餘都順便試埋當地特產～

我哋就坐係超大露台度享用早餐﹗呢個露台景色未算靚，之後嗰間酒店至正，大家要繼續留意啊，但暫時嚟講呢個露台我已經好開心了～香港啲樓即使有個露台俾你都係勁細，未晾衫都唔夠位放枱椅～邊有得咁樣享受丫﹗

我哋上晝行程係去Royal Hawaiian Centre呢個大型購物商場，第一日就shopping？？nonono，呢個商場提供咗好多免費文化體驗活動呢，旅遊書都有介紹㗎，我一早上網睇好時間表揀星期二嚟的﹗因為上晝有我最感興趣嘅呼拉舞，如果啱嘅話，仲可以去上埋ukulele堂同埋穿花環堂添呢～

去到時間尚早，我哋係商場周圍逛逛先﹗發現叮噹﹗

其實本身都知道夏威夷好多日本遊客，但去到都會驚訝佢哋嘅影響力﹗﹗Royal Hawaiian Centre嘅商店有大半以上嘅店員都係日裔，英文日文都精通，而且周圍嘅指示牌當然都係英日雙語啦，而客人方面真係大多數係日本人﹗我哋發覺日本人都幾鍾意逛商場，譬如我哋去火山tour or Polynesian Cultural Centre，日本人比例火山tour係零，cultural centre都少於10%，水上活動日本人可能有30-50%左右吧，但購物中心有90%以上﹗﹗除咗撞口撞面都日本人之外，威基基市面嘅日本餐廳都多到數唔到咁多間，而且啲食物係好正宗的﹗

差唔多到十點，我哋要去搵ukulele嘅上課地點了﹗開頭以為係中庭後面嘅遊客咨詢中心度登記，但一直都未開門，後來先見到張告示，oh no no，原來係我哋先前經過過嘅美食廣場進行﹗遲了遲了遲了﹗

去到美食廣場已經有好多人圍住咗坐，老師企係咪前面，佢前方嘅枱有好多個ukulele同埋一大叠樂譜，仲有一條人龍，我哋都心知不妙，因為網上講咗每班人數25人，呢度坐係度嘅50人都唔止了～

果然，我哋係簽咗名登記，但老師按順序叫同學出嚟領取ukulele同埋樂譜，我哋個名咁後梗係分唔到啦～原來有唔少同學自備咗ukulele添呢～莫非啱啱係夏威夷買嘅？定係專程係日本帶過嚟？(有90%日本人)感覺上佢哋唔似第一堂嚟上添～

老師都教得唔錯呀，以咁多人大多數初學者嚟講都好容易明白，我睇番轉頭，其實我都唔應該同其他客人爭嗰25個ukulele嘅，話晒我都唔算初學者(雖然冇正式學過，但有啲啲結他底子嘅我都曾經前年母親節用ukulele同day嘅結他合唱咗首「真的愛你」俾媽媽，我諗都唔叫完全初學者吧～)，留機會俾人哋啦(點解講起有少少酸溜溜嘅？)～anyway，亦因為我哋冇拎到ukulele，可以兩袖清風，早少少閃去十一點呼拉舞班嘅地點早少少登記同霸番個靚位﹗

就係呢張poster，宣傳每日有咩免費文化體驗活動可以係Royal Hawaiian Centre參加﹗

呼拉舞原來⋯冇人數限制﹗所以大家企到密密麻麻﹗﹗呼拉舞班係商場嘅中庭舉行，露天嘅中庭有茂密嘅樹蔭，貼近自然得嚟又唔曬，非常好﹗

老師係著花裙子嘅夏威夷本地人，我哋今堂會學識跳一首歌呢～對於呼拉舞嘅認知，一方面係史迪仔個朋友莉蘿去學嘅呼拉舞，另一方面就係戴住花環、圍上草裙嘅夏威夷美女～上完呢堂至知，呼拉舞係講述故事嘅舞，多數以夏威夷生活小節為故事內容，然後用優美嘅動作表現出嚟﹗老師今日教我哋嘅舞就係關於海嘅舞～其實有少少似唱遊，跟住歌詞(當然係夏威夷話啦)嚟跳～「Ike-kai-ike-kai⋯啦啦啦⋯」

海浪海浪、小魚游呀游、滑浪者、海灘、戴上花環、男孩女孩、大陽高掛、到山上去⋯等等嘅題材﹗有興趣我可以再俾video你哋睇啊～我手叉腰嘅動作就係扭pat了，老師多次提醒大家啊，呼拉舞嘅扭pat係輕柔的、溫和的、優美的，要慢慢嚟，絕對唔係肚皮舞嘅強勁shake shake shake﹗

上完堂十二點，下一堂有興趣嘅就係一點嘅Lei making class，大家有留意我上一篇blog就會知道lei就係花環，因為同ukulele堂一樣，呢班涉及材料嘅數目，好似去登記咗先比較好喎，但去到現場都未有人擺檔⋯如果一直等，到完咗先食嘢又好似太餓，我哋都係決定食咗嘢先～

去咗美食廣場，想食白飯丫﹗所以揀咗呢間越南嘢食～冇錯﹗我哋嚟到夏威夷都仲係食緊亞洲美食﹗﹗果然係美國﹗勁大portion﹗﹗啲肉勁多﹗﹗肚子餓嘅兩人都冇辦法食得晒呢～

等食物等得比較耐，結果？lei making class又滿額了～算啦，呢個本身都唔係心目中必上項目，少少失望啫～好啦，我哋出去威基基海灘行下啦﹗

待續

前往其他美國旅遊blog

Comments

comments