28-7-2014:加州婚禮+夏威夷day 3(part 2).Aloha Hawaii.第一餐⋯韓食?

我哋由三藩市機場去Campbell Inn時搭預先book好嘅Super Shuttle,回程都一樣,所以十二點前check out酒店,我哋就係lobby坐坐,等司機嚟接我哋﹗原本講嘅係12:20至12:40之間到,司機早咗呢,都好丫~我哋上車之後仲有兩個pick up先去機場,嗰兩個客人係international terminal落咗車,得我哋去domestic,落車時有少少不愉快經歷呢~雖然上網book車時、車廂裡面標示都有講明小費唔包括收費入面,但我覺得小費應該係optional吧?﹗尤其佢命名叫「gratuity」,gratuity應該係由gratitude同一個字變化嘅noun,根據我認識,gratitude應該係由心而發囉~但個司機一落車就板起口面、攤大打板話:「Tip﹗」我嚇一跳時,完全唔心甘情願咁俾咗啲佢,激氣咗好耐,之後時不時都提起呢件事﹗﹗如果你想要tips,起碼係咪都有少少笑容同態度friendly啲呢?我對你冇gratitude時我都俾唔到gratuity你㗎喎~

我哋去到機場時都算好早﹗分頭行事,day去排長龍將行李寄艙時,我去用自動機拎咗登機證先~我都好疑惑,究竟係咪真係美國人教育程度好咁多?完全冇人手櫃位做check in喎,雖然部機有多種語言選擇,但如果係香港,我感覺有好多人都會唔識操作部機⋯當我哋平時啲病人每兩個月都返嚟一次覆診,佢依然唔記得邊張紙拎藥邊張紙去約覆診期時~呢一程飛機係我自己去priceline.com訂的,事先都知道寄艙行李費唔包括在機票內,我覺得都fair丫,好多domestic旅客唔帶幾多行李,冇理由要佢哋share費用嘅,而家收US$25一件,我哋兩件大大件就好抵了,但另一方面,亦因為同一個價錢,好多人拎嘅hand carry有幾大件得幾大件﹗﹗DSCN0070

我哋今程飛機delay得好犀利呀,一直推遲上機時間﹗我哋本身諗住得半個鐘左右share嚟咬一舊包,點知⋯原來應該慢慢食,食多啲﹗﹗因為之後肚餓得不得了﹗我哋share嘅係reheat咗嘅雞肉包包,都幾好味喎,雖然我唔係太鍾意食包做正餐,如果多餸的、熱的我諗我都可以接受﹗因為等得太耐,我哋開始拎啲Running Man出嚟睇,又怕太投入會唔知道登機,所以要佔個有利位置~結果好似遲咗成兩個幾鐘至起飛﹗﹗DSCN0071

我上一次搭Delta Airlines應該已經係人生第一次去美國時,即是小學時同爹媽去西岸嗰陣,印象最深刻嘅係,點解國泰、新航啲空姐咁靚,但Delta嘅空姐係⋯auntie嚟嘅?今次嘅印象係,勁嘢﹗呢班航機上面有wifi上網,當然要收費啦,而且每個都有插頭俾你叉電,我哋只係坐economy咋喎~非常好﹗不過冇帶到我部Samsung Galaxy Tab個叉電,冇得繼續Running Man添~今次去美國都覺得航空公司對電子產品嘅態度寛容咗好多,可能知道管你唔住,唯有俾條底線你吧,以前講到明上飛機要立即關電話,而家就叫大家轉去飛航模式,而座位上都有張咭講明每一種電子產品嘅限制~幾好丫,極其量方便大家~

一早知道冇飛機餐食,即使要飛五個鐘﹗只有一杯飲品,要食的可以買snack box,唔係錢嘅問題,而係snack box其實係junk box,冇飽肚嘢係入面,只可以過下口癮而已,好在我哋帶咗少少餅乾,頂住先,原本唔應該咁肚餓,因為delay咗兩個幾鐘,我哋本身應該夏威夷時間六點幾就到,而家變成九點鐘﹗我都好擔心返到酒店check in後再出嚟仲有冇嘢食﹗﹗DSCN0074

因為delay,所以先睇到咁靚嘅日落景色,都唔知開心定唔開心好~DSCN0075

anyway,我哋終於到了﹗第一樣提醒我到咗夏威夷嘅係呢個「Aloha﹗」,唔好意思,手震~:pDSCN0076

仲有廁所標誌﹗係戴住花環嘅女士呢,夏威夷話花環叫做「lei」~DSCN0077

檀香山國際機場都算係比較舊嘅機場,佢嘅行李提取處令我回味起啟德機場﹗我哋去到行李帶時,已經見到預約好嘅SpeediShuttle員工接待我哋啦~有啲旅客已經有得戴上lei了,其實book我哋間shuttle都有得book埋lei,但貴咁多~~都係唔好了~DSCN0078

shuttle開始進入熱鬧啲嘅區域,見到外面好多亞洲面孔﹗應該都係日本遊客吧~我哋講起去夏威夷旅行,總會記起成日去夏威夷嘅阿福一家,邊個阿福?叮噹入面,大雄個朋友丫﹗

我哋去到Aqua Skyline at Island Colony--我哋會連續住四晚嘅酒店時,已經又累又餓了~今次向西飛,又賺多咗幾個鐘時差,即是今日過得又長咗幾個鐘﹗前台幫我哋check in時,話因為我哋住四晚,所以幫我哋upgrade房間喎,咁好?原本我book嘅係studio kitchenette,而家upgrade成one bedroom suite﹗

上到房,狼狽的搵唔到燈掣,今次住嘅美國幾間酒店都冇插咭取電槽,但只有佢⋯個燈掣唔係門口旁邊﹗終於著到燈,間房好大~~~~大過我哋住緊嘅單位﹗我哋即刻⋯食多少少餅撐住先,再落街搵嘢食﹗

當選嘅餐廳,就係我哋見到嘅第一間餐廳﹗我哋食咩?DSCN0079

見到呢兩杯水,有冇咩idea?DSCN0081

我哋食嘅係韓國餐廳(又)﹗咁餓嘛,近近地最好﹗

後來發現,夏威夷本土特色餐廳真係唔多,隨處都有嘅係日本餐廳﹗其他亞洲食物都好多~之後大家就會見到~DSCN0084

先嚟小菜四碟﹗同韓國一樣,任添啊~除咗一般嘅辣白菜同芽菜之外,比較特別嘅係醃菜芯﹗味道就好似醃菠菜咁~另外就係通心粉沙律啦~DSCN0086

燒烤同韓國一樣,都係店員幫你燒﹗我覺得個牛都係比較美式,係肉眼扒instead of牛肋肉~另外仲有薯仔、洋葱同蘑菇,啲蘑菇好厚肉呢~DSCN0087

等食中﹗未食得主菜,超肚餓嘅我哋已經掃咗小菜嘅一半填填肚子先~DSCN0088

香氣四溢﹗DSCN0089

就係呢間餐廳了﹗招呼我哋嘅店員係年輕韓國女生,佢好friendly呢,知道我哋係香港嚟都講咗啲佢知道關於香港嘅嘢~

我哋係呢度見到隔離枱嘅鬼佬埋單時分開一人一張單,想問下美國嘅朋友們,係美國出街食飯AA制,餐廳係咪可以幫你分埋單?﹗

我哋食飽飽,係餐廳旁邊有間(小up dup)便利店,我哋高興地買咗少少粮草,包括聽日嘅早餐,後尾我哋認識咗威基基地區知名嘅ABC Store之後,呢啲唔入流嘅小店我哋永遠都唔再幫襯啦~哈~SONY DSC

食飽咗,返到酒店有心機影下相了﹗其實點解七晚都住威基基,要搬酒店呢?因為夏威夷啲酒店都幾貴,要靚的就更貴了,所以我決定一部份住靚啲嘅,一部份住普通啲嘅,梗係先「苦」後甜啦,所以頭四晚嘅Aqua Skyline at Island Colony相對平少少,既然要平啲,就索性唔好要海景了~叫我surprised嘅,除咗係upgrade咗房間之外,就係冇海景之餘個景都幾靚﹗﹗廳個大大大窗口望嘅係運河(可以睇成一條河),對面係哥爾夫球場,都叫做有水又有綠色的~比我expect的好好多呢~aqua skyline island colony

而且房間都好四正丫﹗睡房仲有大露台添,晾衫、食早餐都一流﹗呢幾晚都住得好舒服丫~

漫長嘅一日過去,要好好休息了~

待續

前往其他美國旅遊blog

Comments

comments

在《28-7-2014:加州婚禮+夏威夷day 3(part 2).Aloha Hawaii.第一餐⋯韓食?》中有 6 則留言

    • 最傳統嗰啲應該同Fiji嗰啲差不多,地熱烤肉之類~
      不過現代夏威夷人有好幾道引以自豪嘅fusion菜,你繼續留意blog就會陸續出現了﹗

發表迴響

你的電子郵件位址並不會被公開。 必要欄位標記為 *