26-7-2014:加州婚禮+夏威夷day 1(part 1).Silloam Sauna@서울

我呢日同day講咗好多次,我哋個7月26號真係好長﹗大家繼續留意我之後嘅blog就知點解了,其實都係關不斷「賺時差」事,當然之後有借有還啦,我哋先去咗快香港一個鐘嘅首爾,呢度「蝕咗」嘅一個鐘同一日我哋就「賺番」返嚟,從而多咗有太陽日照嘅26號,係首爾我哋有11個鐘,之後搭飛機過去三藩市,呢度飛咗10個鐘全部都係26號嚟㗎噃,去到三藩市,同香港有15個鐘時差,即是同首爾有16個鐘啦,去到只係下晝一兩點﹗﹗我哋繼續7月26號多10個鐘至完﹗﹗好誇張~

雖然飛機delay咗少少,好在去到仁川國際機場時間都唔算太晏,因為唔駛拎行李,我哋好快咁過咗immigration就可以拍拍屁股出去首爾市啦~其實今次呢個轉機11小時我都考慮咗好多去邊度,我知道我哋搭完凌晨機實會好攰,基本上我都打算只去汗蒸幕,不過呢,去邊度嘅汗蒸幕好呢?雖然去過首爾幾次,幾次都係仁川國際機場往來,實質我哋都未遊過仁川市,但我search一search,如果搭巴士由機場去仁川市要大半個鐘,搭地鐵要超過一個鐘﹗﹗返而搭Arex出去首爾站嘛,直達車43分鐘,停站車都只係多10分鐘左右,快慢車夾埋一個鐘有五六班,似乎以唔miss飛機嚟講可靠得多﹗DSCN0037

以前由機場去首爾市次次都係搭機場巴士,搭Arex都係第一次﹗個站好靚呢~DSCN0039

為咗少啲travel時間,我都曾經研究過要唔要去Arex其他站,但⋯umum⋯近嘅全部附近都好荒蕪﹗熱鬧嘅已經係弘大,與其係咁,不如去首爾站算了﹗大火車站附近應該乜都有齊晒啦~DSCN0040

我哋係首爾站嘅locker鎖好我哋嘅東東(包括裙褂﹗﹗)就輕裝出動啦~噢,首爾原來係落雨天﹗又濕又凍,我哋又冇帶遮出嚟啦﹗兩把遮都係寄倉行李入面﹗﹗我哋兩個笨蛋好似幾乎次次去旅行都買咗遮囉⋯濟州嗰次係兩褸,另外釜山同北京嗰兩次都係遮﹗我隨便諗都諗到呢三次了,仲有啲可能未計﹗﹗(10-4-2012:首爾濟洲櫻花遊day 3(part 2).西歸浦、天地淵瀑布27-5-2013:釜山麗水day 3(part 2).甘川洞文化村31-5-2014:三十登長城day 2(part 3).貝洛拉維克與捷克愛樂樂團@國家大劇院)好在雨唔係真係太大,落一陣又唔落一陣咁,我哋決定⋯非到緊要關頭唔好買㕸~

圖中嘅Lotte Outlets係我哋搵路去Silloam Sauna嘅關鍵landmark,我哋其實都有少少迷路,之前download定附近地圖,不過個一號出口好大,orientate唔到自己,後尾問咗一間酒店嘅職員,知道我哋自己係邊就好容易搵到Silloam Sauna了﹗

DSCN0044

去汗蒸幕之前食個早餐先~就係Silloam Sauna旁邊我哋發現呢呢間有得食紫菜卷嘅小店子,阿珠媽俾咗個中英韓文+圖畫餐牌俾我哋,咁就冇有怕啦~不過⋯

DSCN0042

又發生咗「黃花魚事件」,上次去麗水時我哋指個餐牌個中文,點知個中文名近另外一款餸個韓文多過我哋想點嗰款(請參閱:26-5-2013:釜山麗水day 2(part 2).麗水市隨意走),今次又係丫,原本想叫飯糰同烤肉紫菜卷,而家變成兩條紫菜卷了,一條原味一條烤肉,都ok嘅~我怕怕烤肉紫菜卷嗰啲紫蘇葉味,所以問day我可唔可以淨係食原味嗰條+少少烤肉⋯hee,我個老公真係好喇~

DSCN0047

食飽飽﹗我哋去嘅就係呢間Silloam Sauna了~因為地點便利,又有得預訂過夜嘅床位,所以特別多搭夜機嘅旅客先嚟瞓一晚,關於佢嘅blog都特別多~

俾咗錢入場就分道揚鑣了﹗其實去韓國嘅汗蒸幕我哋都有經驗,舊年就去過釜山嘅Spaland(請參閱:29-5-2013:釜山麗水day 5(part 2).買手信去.期待已久的Spaland),程序都大概知道,我今次有少少尷尬嘅係,搭完凌晨機我冇戴con,戴住副眼鏡係個浴室度行嚟行去又怪怪地,唔戴就簡直唔知要行去邊,冇辦法,odd都要戴眼鏡了,尤其Silloam Sauna個浴室同locker唔係同一層﹗我哋乜工具都冇,唯有用心咁用僅有嘅番梘洗洗洗洗洗,之後先浸浴啦~Spaland係豪華style的話,Silloam Sauna就更貼近韓國人嘅日常,裝修少少舊舊地out out地,但就乾乾淨淨企企理理~浴池都有好多個丫,唔同溫度㗎啦、按摩啦、水柱啦、蒸氣浴⋯裡面仲有理髮店添﹗ok我就換好蒸氣房指定運動衫出去同day會合了﹗

Silloam Sauna有好多層﹗入口係locker啦,底下一層係浴室啦,我同day會合嘅二樓係好大嘅休息室、地熱休息區、小賣部,上去各層有好多唔同theme唔同溫度嘅蒸氣房啦,有餐廳啦,睡眠間啦,令人驚訝嘅係有好多娛樂設施﹗﹗之後我再講多啲~我哋焗咗sauna先啦~

IMG_3157

我哋試咗木炭房⋯

IMG_3159

黃土房⋯

IMG_3161

仲有我最喜愛嘅⋯鹽房﹗

IMG_3162

因為暖粒粒嘅鹽可以鋪係你特別攰or唔舒服嘅地房熱敷一下,而且暖度都非常舒適,既出到汗又唔會熱到頂唔順~

IMG_3163

參觀下都要嘅冰房~

有啲明知太熱我哋會頂唔順嘅都唔入去lu~有啲房好快出嚟係因為有人係入面呼呼大睡,鼻鼾超嘈~day話係sauna入面瞓唔到,所以我哋周圍參觀一下至搵個位瞓~

IMG_3164

頭先咪講過有好多娛樂設施嘅,唔駛額外俾錢嘅我哋去咗棋室,有象棋同圍棋,對奕咗一盤﹗我哋又去咗gym,設施都唔少呢~外面有付費嘅按摩椅,又有卡拉ok室,你又可以book間房搞下家族、公司活動~氣氛真係同Spaland好唔同呢~

之後我哋搵咗個比較靜嘅地熱室瞓瞓覺,較定鬧鐘就安枕無憂啦,暖暖的,個人又好攰,我哋兩個都瞓著了,好在準時起到身,再梳洗一下,我哋要出去食lunch跟住就返機場啦~

有興趣Silloam Sauna嘅朋友可以去佢哋官方網頁睇睇:

http://www.silloamsauna.com/site_en/main/main.asp

DSCN0048

之前上網搵資料見附近應該有間部隊鍋,有考慮過去試下﹗但出嚟時又落微微雨,反正我對部隊鍋唔係太堅持,Silloam Sauna附近都有好多餐館,我哋揀咗呢間明洞刀麵﹗DSCN0050

揀佢係因為我哋透過玻璃見到人哋食緊呢個靚靚嘅蒸餃,吸咗入去了﹗蒸餃材料就好普通,都係菜肉餃子,但做工就好仔細,皮薄薄的,入面啲餡料又切得細細的,好好味~DSCN0051

呢間明洞刀麵冇中英文餐牌,我哋就示意要同隔離嗰枱一樣,除咗餃子之外,仲有呢個湯麵,根據價錢嘅分佈,我睇佢係算淨麵,但都有少少餸呢,辣辣嘅洋葱、韮菜同肉碎,正好填飽肚子~好滿足呢~

我哋食飽飽都仲有少少時間去咗Lotte Mart逛咗一陣,買咗個粉底掃,Innisfree個sales仲好字正腔圓咁同普通話講「送你洗面奶」(有5小包丫﹗可以洗10次面~),可想而知有幾多中港台遊客~

今次試搭Arex嘅直通線,貴都幾多下,時間唔節省好多,但椅子就舒服好多,我哋兩個繼續呼呼大睡~DSCN0055

機場原來有個溜冰場呢,啲細路雖然著嘅係刀片溜冰鞋,但點解個地唔係好似真雪嘅呢?有趣嘅係,香港啲初學小朋友會俾張椅子佢哋推住溜,呢度會俾個walking frame佢哋﹗小朋友變咗老人家咁呢~IMG_4659

過關後都仲有少少時間,我哋去Caffe Bene買咗嘢飲,開部電腦上上網,我嘅第一篇blog就係呢度打㗎啦~

呢程飛機又delay咗少少呢,今個trip都多飛機delay,不過最嚴重都係三藩市去檀香山嗰程~

雖然攰,但都冇辦法瞓到幾多覺,呢程10個鐘嘅飛機我同day一齊睇咗兩套戲,兩套都幾好睇喎,有講虛擬嘅未來世界嘅「Divergent」,到時候為咗維持社會嘅穩定,人會根據本質去分唔同嘅組別去服務,男女主角就係異數,測試話佢哋唔完全屬於任何一組嘅特徵,當權者覺得呢啲人會造成不穩定因素,所以要剷除,睇下佢哋點樣救自己咯~另一套係「Her」,個Her就係男主角嘅女朋友,但佢唔係普通嘅女人,而係一個電腦operating system,設實感受到嘅愛情唔係真實,其他人又點睇佢呢~

除咗睇戲,另一亮點就係飛機餐了﹗之前短嗰程個粥唔好味,但今次挽回印象啦~登登登登~DSCN0056

居然飛機餐會有生菜包烤五花肉﹗菜都有幾款,上面嘅係豆皮,肉都俾得好闊綽,可能為咗外國人嘅口味吧,蒜頭唔係生蒜,而係煮熟的,仲附上麵豉湯啊~DSCN0058

親切的有中英日文嘅instruction,教你點樣食~DSCN0057正﹗好好味丫~

中間派咗個burrito,第二餐正餐係早餐,我唔俾機會佢個粥了,直接食咗西式早餐,味道就中規中矩啦~

經過10小時嘅飛行,我哋疲憊不堪咁落機,抵達三藩市了﹗

待續

前往其他美國旅遊blog

Comments

comments

在《26-7-2014:加州婚禮+夏威夷day 1(part 1).Silloam Sauna@서울》中有 6 則留言

  1. 個蒸餃子好靚,見到就想食,諗起韓劇《一起吃飯吧》入面劇中人吃餃子是用手拈來吃的。
    個飛機餐也太誇張了吧…我都好想試下~

    • 用手拈住食咪好熱囉?﹗
      係呀,呢個生菜包同之後回程嘅拌飯都好正﹗而且都附熱湯呢~

  2. 飛機餐食包飯….真係估佢唔到呢~~~

    你地凌晨機仲咁好精神出去玩,佩服!

    • 坐長途機咁鬱悶時有啲複雜嘢搞下都幾好,仲要好好味喎~
      諗住出去休息咋~沖個靚涼refresh下~

  3. 韓國的汗蒸幕,裡面享用的東西花款多,又可以逗留頗長的時間,每人每次收費少於港幣100元,實在很化算。我們去的龍山spa,連泳池都有。

    • 我諗汗蒸幕已經變成每次韓國旅行嘅必去項目了﹗
      哇,連泳池都有,咁要唔要另外收費?係咪有埋泳衣賣?應該好多人見人哋游又心思思想游噃~

CHUNGLANYING 發表迴響 取消回覆

你的電子郵件位址並不會被公開。 必要欄位標記為 *